مالباتا مامۆستە و چالاکڤانێ سیاسی حەسەن کەلەش پشتراست کر کو تەرمێ بەریا چەند رۆژان ل گوندەوارێ ناڤچەیا تل کۆچەرێ یا رۆژئاڤایێ کوردستانێ ھاتبوو دیتنێ کورێ وانە. مالباتێ ئیرۆ، 10ێ جۆتمەھا 2026ێ، د داخویانیەکێ دە دیار کر کو ئەو دێ تەرمێ وی ژ نەخوەشخانەیێ وەرگرن و ل گوندێ وی یێ رەسەن سێگرکا چۆلێ ب خاکێ بسپێرن.
حەسەن کەلەش شەڤا 30ی ئیلۆنا بۆری د ناڤا بازارا باژارۆکێ گرکێ لەگێ دە ژ ئالیێ کەسێن نەناس ڤە ھاتبوو رەڤاندن و بەر ب جھەکی نەدیار ڤە ھاتبوو برن. تەڤی کو چارەنووسا وی چەندین رۆژان نە دیار ما و چ ئالیەکی بەرپرسیاریا رەڤاندنا وی نەگرت سەر ملێن خوە ژی، د داویێ دە گوندیێن ھەرێمێ تەرمێ وی ل گوندەوارێ تل کۆچەرێ دیتن.
حەسەن عەرەفات کەلەش (ژدایکبوویێ 1970یێ) کو نێزیکی 20 سالان ل دبستانا جەلاعا یا رمێلانێ مامۆستەتی دکر، د ھەمان دەمێ دە ئەندامێ ئەنجوومەنا ھەرێمی یا پارتیا دەمۆکراتا کوردستان – سووریا (پەدەکە-سێ) بوو.
پشتی بوویەرا رەڤاندنا وی، ئەنجوومەنا نشتیمانی یا کوردی ل سووریێ (ئەنەکەسێ)، کۆمیتەیا ناڤەندی یا پەدەکە-سێ و مامۆستەیێن ھەرێمێ ئەڤ کریارا تەرۆریستی ب توندی شەرمەزار کربوون. د ھەمان چارچۆڤەیێ دە د 7ی ڤێ مەھێ دە ژی جیگرێ پارێزگارێ حەسەکێ سەردانا مالباتا کەلەش کربوو و راگھاندبوو کو سازیێن پێوەندیدار ڤێ دۆسیەیێ ب ئاوایەکی جدی دشۆپینن.
