پشتی دیتنا تەرمێ مامۆستە و چالاکڤانێ سیاسی حەسەن کەلەش ل گوندەوارێ تل کۆچەرێ، بێدەنگیا پەکەکێ و سازیێن وێ یێن راگھاندنێ راستی نەرازیبوون و بەرتەکێن توندێن مەدیایا ھەرێمی و چالاکڤانێن سیاسی یێن ل رۆژئاڤایێ کوردستانێ ھات. چالاکڤان و چاڤکانیێن ھەرێمی بالێ دکشینن سەر کو ئیدارە و مەدیایا گرێدایی پەکەکێ ل بەرامبەری ڤێ بوویەرێ بێدەنگیەکا تام ھلبژارتنە و ب چ ئاوایی بەحسا رەڤاندن و کوشتنا وی ناکن.
مامۆستە حەسەن کەلەش کو ئەندامێ پەدەکە-سێ و مامۆستەیێ دبستانا جەلاع ا یا رمێلانێ بوو، شەڤا 30ی ئیلۆنا بۆری ژ ناڤا بازارا گرکێ لەگێ ھاتە رەڤاندن و پشتی چەند رۆژان تەرمێ وی ل نێزیکی تل کۆچەرێ ھاتە دیتن. ل گۆری بەرتەکێن کو د مەدیایا ھەرێمی دە جیھ دگرن، نەبوونا چ داخویانی، شەرمەزارکرن یان ژی نووچەیەکێ د مەدیایا پەکەکێ دە، وەکی نیشانا راستەراستا بەرپرسیاریا ڤێ کریارێ تێ نرخاندن.
چالاکڤانێن سیاسی و شێنیێن ھەرێمێ کۆما “جوانێن شۆرەشگەر” کو وەکی باسکەکی سەر ب پەکەکێ ڤە تێ ناسین، ب رەڤاندن و قەتلکرنا حەسەن کەلەش تاوانبار دکن. تێ دەستنیشانکرن کو ڤان گرووپان بەرێ ژی د گەلەک بوویەرێن ب ڤێ رەنگی دە چالاکڤان، مامۆستە و رامانوەرێن ئۆپۆزیسیۆنا کوردی ل رۆژئاڤایێ کوردستانێ ئارمانج گرتنە و ئەڤ بێدەنگیا نھا ژی گومانان ل سەر رۆلا وان د ڤێ کارەساتێ دە بھێزتر دکە.
سازیێن سیاسی یێن وەکی ئەنەکەسێ و پەدەکە-سێ لگەل رێخستنێن سڤیل و خەلکێ ھەرێمێ داخواز دکن کو ئالیێن بەرپرسیار دەملدەست وەرن ئەشکەرەکرن و تاوانبار وەرن سزادان. وەکی کو چالاکڤان دیار دکن، سیاسەتا بێدەنگکرن و ئارمانجگرتنا کەسایەتێن سڤیل و رەوشەنبیر زنجیرەیەکا بەردەوامە کو ژ بۆ چاندنا ترسێ د ناڤا جڤاکێ دە تێ مەشاندن.
