ھەڤسەرۆکێ پارتیا وەکھەڤی و دەمۆکراسیێیا گەلان (دەم پارتی) تونجەر باکرھان راگھاند، په‌كه‌كێ ب ئاوایەکی فەرمی ھێزێن خوە ژ ناڤ ئاخا ترکیەیێ ڤەکشاندنە و پێڤاژۆیا ئاشتیێ ل بەر داویا قۆناغا خوە یا یەکەمە. باکرھان ھەروھا بال کشاند سەر وێ یەکێ کو ھەرێما کوردستانێ دکارە د پرۆسەیا چەکدانینێ دە رۆلەکە چاڤدێر و ھێسانکار یا بباندۆر بلیزە.
تونجەر باکرھان ل پایتەختا ھەرێما کوردستانێ ھەولێرێ، ل پەراوێزا فۆروما میری د ھەڤپەیڤینەکە تایبەت دە لگەل کوردستان24ێ، پێشڤەچوونێن داوی یێن پێڤاژۆیا چارەسەریێ ل ترکیەیێ، قۆناغێن دانووستاندنان، رۆلا سەرکردایەتیا ھەرێما کوردستانێ و رەوشا رۆژئاڤایێ کوردستانێ نرخاندن.
دەربارێ رەوشا لەشکەرییا د ناڤبەرا ترکیە و په‌كه‌كێ دە، باکرھان ئاشکەرە کر: “پشتی بانگا رێبەرێ گرتییێ په‌كه‌كێ ئابدوڵاھ ئۆجالان، ھێزێن په‌كه‌كێ ژ ناڤ ئاخا ترکیەیێ ڤەکشیان، وەکی چاوا موراد کارایلان ژی ئەڤ یەک راگھاندبوو. ئەڤ پێنگاڤەکە گەلەکی گرینگە و نیشانەیا جدیەتێ یە. ئێدی دەما وێ ھاتیە کو دەستھلاتا ترکیەیێ ژی ب ھەمان دلسۆزیێ پێنگاڤان باڤێژە.”
دەربارێ ئاوایێ دانینا چەکان دە، ھەڤسەرۆکێ دەم پارتیێ دیار کر، په‌كه‌كێ بریارا خوە دایە و رێیا تێکۆشینا دەمۆکراتیک و ھقووقی ھلبژارتیە. باکرھان گۆت: “ژ بۆ پرۆسەیا چەکدانینێ ژی، ھەرێما کوردستانێ دکارە رۆلەکە چاڤدێر یان ژی ھێسانکارەکی گەلەکی چالاک بلیزە، دا کو زەمینا ڤەگەرا ئەندامێن په‌كه‌كێ بۆ سەر جھ و وارێن وان و تەڤلێبوونا وان د ژیانا سیاسی و سڤیل دە بێ دابینکرن.”
باکرھان دا زانین کو پێڤاژۆیا چارەسەریێ د رێیەکە باش دە دمەشە و وھا پێ دە چوو: “نھا ئەم د قۆناغا یەکەما پێڤاژۆیێ دە نە و ئەم نێزیکی داویا ڤێ قۆناغێ بوونە. ئەگەر ئەم ڤێ قۆناغێ ب سەرکەفتی دەرباس بکن، د قۆناغا دویەم دە دێ ل سەر ماف و ئازادیێن دەمۆکراتیکێن کوردان گۆتووبێژ بێن کرن؛ ل سەر زەمینەکێ کو چەک بێدەنگ ببن و سیاسەت لگەل ھقووقێ باخڤە.”
ھەڤسەرۆکێ دەم پارتیێ مەرجێن سەرەکەیێن دەرباسبوونا بۆ قۆناغا دویەم دەستنیشان کرن و گۆت کو دڤێ دەولەتا ترکیەیێ پێگەھ و رۆلا یاسایییا ئۆجالان زەلال بکە، قەیوومان ژ سەر شارەداریان راکە و ھەڤشارەدارێن ھلبژارتی ڤەگەرینە سەر کارێن وان، گرتیێن سیاسی ئازاد بکە و دەرفەتا ڤەگەرێ ژ بۆ وان کوردێن کو ل ھەولێر، سلێمانی و دەرڤەیی وەلات د سرگوونێ دە نە ئاڤا بکە. باکرھان ھەروھا تەکەز کر کو پێویستە دەستوورەکە نوو و دەمۆکراتیک بێ ئامادەکرن دا کو مافێن 25 ملیۆن کوردان ب ئاوایەکی دەستووری وەرن میسۆگەرکرن.
تونجەر باکرھان رۆلا سەرکردایەتیا ھەرێما کوردستانێ بلند نرخاند و گۆت کو د دەما بۆری دە سەرۆک بارزانی، سەرۆکێ ھەرێما کوردستانێ نێچیرڤان بارزانی و ئالیێن سیاسی رۆلەکە ئاڤاکەر لیستنە و دکارن د ڤی واری دە بەردەوام بن.
باکرھان ئاشکەرە کر کو د ھەڤدیتنا وانا داوی یا ل ئیمرالیێ دە: “برێز ئۆجالان سلاڤێن خوەیێن تایبەت ژ ھەموو سەرکردەیێن باشوورێ کوردستانێ و تەڤاھیا پارتی و رێخستنێن ھەرێما کوردستانێ رە شاندن. ئەم د ناڤ سینۆرێن جودا دە دژین، لێ ئەم خوەدی یەک دل و یەک چارەنڤیسن و پێویستە ئەم پشتگریا ھەڤ بکن.”
ل سەر رەوشا رۆژئاڤایێ کوردستانێ و سووریەیێ ژی، باکرھان دەستنیشان کر کو ئەزموونا مەزنا سووریەیا نوو ئەوە کو دێ چاوا نێزیکی مافێ پەروەردەیا ب زمانێ زکماکی و دابینکرنا مافێن گەلێ کورد ببە. ھەروھا بانگ ل ترکیەیێ کر کو ل رۆژئاڤایێ کوردستانێ رۆلەکە ئەرێنی بلیزە، دا کو وێنەیێ وێ ل جەم کوردان باشتر ببە.
ھەڤسەرۆکێ دەم پارتیێ ئالۆزی و ئالۆزیێن داوییێن ھەسەکێ ژی شەرمەزار کرن و داخواز ژ دەستھلاتا شامێ و ھێزێن ناڤدەولەتی کر کو رێ ل بەر کۆمێن دژ-کورد بگرن و نەھێلن ئارامیا ھەرێمێ خەرا بکن.
د داویێ دە، باکرھان گەشبینیا خوەیا ژ بۆ سەرکەفتنا پێڤاژۆیا ئاشتیێ نیشان دا و تەکەز کر کو شەرێ 50 سالێن بۆری ت سوود نەگھاندیە ترکیەیێ و تەنێ بوویە سەدەما ھلوەشینا ئابۆریێ، لەوما دەما وێ ھاتیە کو پرسگرێکا کورد ب رێیێن دەمۆکراتیک بێ چارەسەرکرن.
