مەجلسا پارتیا سۆسیالیستا کوردستانێ (پەسەکێ) ئەنجامنامەیا جڤینا خوەیا بەرفرەھا ب درووشما “دەم نە دەما بێھێڤیتیێ یە” کو د 11ێ جۆتمەھێ دە ل دیاربەکرێ پێک ھاتبوو، ژ رایا گشتی رە راگھاند. پەسەکێ د داخویانیێ دە دیار کر کو چەکدانینا پەکەکێ و راوەستاندنا شەری د بەرژەوەندیا گەلێ کورد دەیە، لێ بەلێ نیشاندانا ڤێ گاڤێ وەکی چارەسەریا پرسا کورد سەختەکارییە.
د ئەنجامنامەیێ دە ھاتە دەستنیشانکرن کو کریزا ل ترکیەیێ ئەنجاما پۆلیتیکایێن سەد سالی یێن ئینکار و زەختێ نە و رێڤەبەریا ترکیەیێ ب ناڤکرنا “ترکیەیا بێتەرۆر” ھەول ددە داخوازێن ئازادیا نەتەوەیی یێن کوردان پشتگوھ بکە و پرسەکا سیاسی لگەل تەرۆرێ بکە یەک. پەسەکێ دەستنیشان کر کو ژ بۆ چارەسەریا راستین، دڤێت ناسنامەیا نەتەوەیی یا کوردان ب قانوونی بهێت ناسین، پەروەردەیا ب زمانێ زکماکی بهێت مسۆگەرکرن و مافێ خوەرێڤەبەریێ د ناڤا سیستەما فەدەرال دە بهێت ناسکرن.
مەجلسا پەسەکێ ھەر وھا بال کشاند سەر گەشەدانێن ل ھەرێمێ، ئێریشێن ل سەر ھەرێما کوردستانێ و رۆژئاڤایێ کوردستانێ شەرمەزار کر، و تەکەز کر کو پاراستنا دەستکەفتیان د یەکیتیا نەتەوەیی و خورتکرنا سازیبوونا فەرمی یا ل باشوورێ کوردستانێ دە دەرباس دبە.
