دادگەھا دویەم یا تاوانان یا سلێمانیێ، دەربارێ سەرۆکێ ھەڤپەیمانییا “بەرەیا گەل” لاھوور شێخ جەنگی، برایێ وی پۆلاد شێخ جەنگی و ھەژمارەک گرتیێن دن یێن دۆسیەیا بوویەرا “ئۆتێلا لالەزار” دە جەزایێ گرتیگەھێ بری.
ئیرۆ 15ێ جۆتمەھا 2026ان، ل دادگەھا دویەم یا تاوانان یا سلێمانیێ روونشتنا دادگەھکرنا تۆمەتبارێن بوویەرا ھۆتێل لالەزارێ برێڤە چوو.
دادگەھێ بریارا زیندانکرنێ ژ بۆ لاھوور شێخ جەنگی، پۆلاد شێخ جەنگی، رێبوار حامد حاجی غالب، رێبوار قودرەت، پێشەوا حەسەن، رێنوار زریان و ئاراس حەمە عەلی سەربەست مینا دا.
ھوورگلیێن سزایێن ھاتنە برین ب ڤی رەنگی نە:
– لاھوور شێخ جەنگی: 5 سال و 3 مەھ.
– پۆلاد شێخ جەنگی: 3 سال و 6 مەھ.
– رێبوار قودرەت: 3 سال و 6 مەھ.
– پێشەوا حەسەن: 3 سال و 6 مەھ.
– رێنوار زریان: 3 سال و 6 مەھ.
– رێبوار حامد حاجی غالب: 2 سال.
– ئاراس حەمە عەلی سەربەست مینا: 1 سال و 6 مەھ.
هه‌روه‌ها دو ژ گرتیێن لالەزارێ یێن ب ناڤێن (کەیوان و ئۆمەر شێخ) ب بریارا دادگەھێ ھاتنە ئازادکرن.
بوویەرێن ھۆتێل لالەزارێ ڤەدگەرن بەربانگا 22ێ تەباخا 2025ان، دەما کو ھێزێن کۆماندۆ و دژەتەرۆرێ یێن یەکیتیا نشتمانییا کوردستانێ (یه‌نه‌كێ) ل باژارێ سلێمانیێ ب سەر وێ ھۆتێلێ دە گرتن. د وێ بوویەرێ دە پشتی چار ساعەتێن شەر و پەڤچوونێن چەکداری د ناڤبەرا وان ھێزان و چەکدارێن ھێزا تایبەت یا بەرەیا گەل دە ب بکارئانینا چەکێن گران، چەندین چەکدار ژ ھەر دو ئالیان ھاتن کوشتن و بریندار بوون.
د ئەنجاما وێ ئۆپەراسیۆنێ دە، لاھوور شێخ جەنگی، برایێ وی پۆلاد و ب دەھان کەسێن دن ھاتن دەستەسەرکرن. ژ وێ دەمێ ڤە لاھوور شێخ جەنگی و بەشەک ژ گرتیێن دن د گرتیگەھێ دە مانە.
ئەڤ تۆمەتبار ل گۆری مادەیا 56ەمین یا یاسایا جەزایانا ئیراقێ ھاتن دادگەھکرن، کو ئەڤ مادە تایبەتە ب “رێکەفتنا کۆمەکێ یان چەند کەسان بۆ ئەنجامدانا تاوانەکێ یان چەند تاوانان ب ھەڤ رە”.
