فۆروما مێری، کو د 12-13ێ جۆتمەھا 2026 ئان دە ل ھەولێرێ ھات لدارخستن، بوو مژارا رەخنەیێن ھەر کەسێ کو ژ نێز ڤە سیاسەتا کورد دشۆپینە. د دەمێن داوی دە، بارەگه‌ها بارزانی داخویانیەک وەشاند و گۆت چ تێکلییا وان ب فۆروما مێری رە نینە و رەخنەیێن خوە ئانی زمان.
ھن دەردۆران د سەری دە په‌كه‌كێ و پێکھاتەیێن پێڤە گرێدایی کامپانیایەک رەشکرنێ دان دەستپێکرن دا کو ئەساسا داخویانیێ بەروڤاژی بکن. وان رەخنەیێن بارەگاھێ بارزانی ب سەدەمێن بێ بنگەھێن وەکی “تێکۆشینا دەستھلاتداریێ د ناڤبەرا دو پسمامان دە” و “نەرەحەتییا ژ ھەڤھاتنا کوردان” ڤە گرێ دان. تەلەڤیزیۆنا ستێرك یا په‌كه‌كێ وێنەیەکی مه‌زلووم عه‌بدی، ئیلھام ئەحمەد، قوبات تاله‌بانی و تونجەر باکرھان ب ھەڤ رە پارڤە کر و راگھاند، “گەلۆ بارزانی ژ ڤێ وێنەیێ عاجز بوون؟”
لێبەلێ، رەخنەیێن بارەگاھێ بارزانی پر زەلال بوون. داخویانییا بارەگاھێ بارزانی دیار کر کو “مێری ھەموو پارتیێن سیاسی ناگرە ناڤ خوە و ھن ئالی نایێن تەمسیلکرن.” ھەر وھا ھشیاریەک پر ئەشکەرە دا کو گۆت ” ڤێ فۆرمێ دابەشبوون و جودابوونێ د ناڤبەرا گەلێ کورد دە بێتر کوور دکە.”
فۆروما ئیسال یا مێر ژ رۆژا یەکەم ڤە ژ گەلەک ئالییێن سییاسی یێن کوردان ڤە ھات رەخنە کرن. ڤەنەخوەندنا چ نوونەرتییا رۆژھلاتێ کوردستانێ ب تایبەتی بالکێش بوو. نە تەنێ پارتیێن سیاسی، لێ ھەر وەھا رەوشەنبیر و نڤیسکارێن رۆژھلاتێ کوردستانێ ژی نەھاتن ڤەخواندن. وەکی دن، کەسەک مینا بافل تالابانی، کو تێکلیێن وی یێن گومانبار ب ئیرانێ رە ھەنە، دەرکەت و گۆت، “پێڤاژۆیا ئەنتەگراسیۆنێ دێ ل ئیرانێ ژی دەست پێ بکە.”
ژ ئالیەکی دن ڤە، ژ بلی عەبدی و ئه‌حمه‌د، یێن کو سیاسەتا ئەنتەگراسیۆنێ ل رۆژئاڤا تەمسیل دکن، ت کۆمەکە دن نەھاتبوو ناڤ فۆرومێ. ئه‌نه‌كه‌سێ و ھەموو کۆمێن گرێدایی وێ نەھاتبوون ڤەخوەندن بۆ فۆرومێ. وەکی دن، ل باکور، تەنێ تونجەر باکرھان، سەرۆکێ پارتیا دەم، جھ گرت، مینا کو ل باکوور کوردێن دن تونە بن. پێڤاژۆیا “ترکیا بێ تەرۆر”، کو ژ ھێلا باخچەلی ڤە ل باکورێ کوردستانێ ھاتییە دەستپێکرن، ژی ب ئاوایەکی یەکئالی ھاتە پێشکێش کرن. پێڤاژۆ تەنێ ھاتە پەسناندن. لێبەلێ، ل باکورێ کوردستانێ بەشەک مەزن ھەیە کو ئەنتەگراسیۆنێ رەخنە دکە، ژیێن کو پشتگری ددن ئەنتەگراسیۆنێ پر زێدەتر. ئەڤ لایەن ھاتن پاشگوھ کرن.
رەخنەیێن ل سەر یەک دەنگی و یەکئالییا مێری، کو تەمسیلا ھەموو کوردان ناکە، ژ دەستپێکێ ڤە ھاتنە کرن. گەلەک دەردۆرێن سیاسی نەرینێن خوە یێن ل سەر ڤێ مژارێ ژ گەلەک رایەدارێن پەیوەندیدار رە راگھاندنە. بارەگه‌ها بارزانی نێزیکاتییا دوورخستن و پارچەکەر یا مێری یا ل ھەمبەر بەشەک مەزن ژ نفووسا کورد ھەلوەستەک زەلال نیشان دا. سەرۆک بارزانی مه‌رجه‌عێ گه‌لێ کوردە کو بەرپرسیارییا ھەمی نەتەوەیی و د دەمێن کریتیک دە ژ بۆ ھەموو بەشێن کوردستانێ رێبەریێ دکە. بێ گومان، کۆنفەرانسەک وەکی مێری، کو میسیۆنەک ژ خوە رە دانیە، بەرپرسیاریەک ژی ھەیە کو ل دژی روونشتنێن کو کوردان پارچە دکن و وان تەنێ وەکی دیڤەلۆکێن ئەنتەگراسیۆنێ کێم دکن، ھەلوەستەک زەلال نیشان دا.
ژ بەر ڤێ یەکێ، دڤێ مرۆڤ باوەریێ نەدە وان کەسێن کو دخوازن جەوھەرێ داخویانییا بارەگه‌ها بارزانی بێواتە بکە. بەرەڤاژی ڤێ، رەخنەیێن بارەگه‌ها بارزانی ئالیکاری کر کو رۆژەڤا ناڤمالا کورد و جاده‌یا کورد وەرە سەرەراست کرن. ب ڤی رەنگی، رێ ل بەر رەخنەیێن نە تەنێ ل سەر پێکھاتەیا مێری، د ھەمان دەمێ دە ل سەر دوورکەتنا وێ ژ رۆژەڤێ و نیقاشێن کو ژ ھەبوونا نەتەوەیی یا کورد رە سوودمەند نینن ژی ڤەکر.
کۆنفەرانس، کو د ناڤا کریزا رۆژھلاتا ناڤین دە ھات لدارخستن، داخوازیێن کوردان نەئانین زمان. بەرەڤاژی ڤێ، نێزیکاتیێن کەسێن کو دخوازن دەستکەفتیێن کوردان بتەپسینن نەرم کر و دوپات کر. ل دژی ت پێکھاتەیەک کو دخوازە کوردان قەلس بکە، تو رەخنەیەک بچووک ژی نەھات کرن.
ژ بەر ڤێ یەکێ، پرسگرێکا جڤینا مێری یا 2026 ئان نە تەنێ پێکھاتەیا فۆرومێ بوو، لێ د ھەمان دەمێ دە ناڤەرۆکا وێ ژی بوو. بێ گومان، رامانێن کەسێن تەڤلی بوویی مووھرا خوە ل فۆرومێ دان. و ژ بەر کو فۆرومێ ناڤێن نێزیکی په‌كه‌كێ ل رۆژئاڤا و باکور ڤەخوەندن، رەوشا راستین یا ڤان ئالییان نەھات دیتن. خەتا ئەنتەگراسیۆنێ ل سەر کۆنفەرانسێ سەروەر بوو.
میناک، مه‌زلووم عەبدی و ئیلھام ئه‌حمه‌د وەکی قەھرەمان، وەکی نوونەرێن یەکانە یێن رۆژئاڤا ھاتن ڤەخوەندن، تەڤی تێکچوونا ل رۆژئاڤا. لێبەلێ، سیاسەتا کو وان 13 سالان ل سەر رۆژئاڤا سەپاندی، بوو سەدەما رادەستکرنا ھەمی دەستکەفتیێن رۆژئاڤا ژ شامێ رە. و ژ دەسپێکێ ڤە پارتی، رەوشەنبیر و سیاسەتمەدارێن ئەڤ سییاسەت رەخنە دکرن تەڤلی کۆنفەرانسێ نەھاتن کرن. دەنگێ وان ل فۆرومێ نەبوو.
ب ھەمان وایی، تونجەر باکرھان د داخویانیێن خوە دە ھەول دا کو وێنەیەک گەش دەربارێ “ئەنتەگراسیۆنێ” دە نیشان بدە. وی ناڤێ فەرمی یێ ڤێ پێڤاژۆیێ کو دەولەت ژێ رە دبێژە “ترکیەیا بێ تەرۆر” ژی ب کار نەئانی. باکرھان ھەر وھا دەولەتا کورد رەد کر و گۆت، “جارنان نە ھەوجەیە کو ھوون خوەدیێ پەرچەیەک ئاخێ بن دا کو ئازاد بن.” ژ بەر کو کەسەک دن کو باکور تەمسیل دکر تونە بوو، گۆتنێن باکرھان بێ بەرسڤ مان.
ب راستی، ناڤونیشانا کەسێن ڤەخوەندی موھرا خوە ل رۆژەڤێ دا.
ب راستی، دەما کو سیاسەتمەدارێن په‌كه‌كێ ژ باکور و رۆژئاڤا تێن ھەولێرێ، ئەو مێڤانێن پر باشن، ئەو سپاسییا سەرۆک بارزانی دکن، ئەو ب ھەر دەزگەھەکی مەدیایێ رە دئاخڤن، خوە ددن پێش و ب رێزداری تەڤدگەرن. لێبەلێ، گاڤا کو ئەو سینۆر دەرباس دکن و دچن مالێ، ئەو تەنێ دژمناتیێ ل ھەمبەر بارزانی نیشان ددن. ھەمی شێوازێن بێرێزییێ ل نرخێن نەتەوەیا کورد و مه‌رجه‌عێ كوردان دکن.
