وەزیرێ دەرڤە و کۆچبەران یێ سووریەیێ ئەسعەد شەیبانی، ب مەبەستا بەشداربوونا د جڤینا وەزیرێن دەرڤەیێن رێخستنا ھەڤکاریا ئیسلامی دە، گھیشت بەغدایا پایتەختا ئیراقێ.
وەزیرێ سووری ئیرۆ، 17ێ جۆتمەھا 2026ێ، گھیشت بەغدایێ. ل گۆری داخویانیا رێڤەبەریا راگھاندن و پەیوەندیانا وەزارەتا دەرڤەیا سووریەیێ، شەیبانی دێ تەڤلی خولا 52یێ یا ئەنجوومەنا وەزیرێن دەرڤەیێن رێخستنا ھەڤکاریا ئیسلامی ببە کو کار و خەباتێن وێ ئیرۆ ل پایتەختا ئیراقێ دەست پێ کرنە.
جڤین دێ دو رۆژان، یانی د 17 و 18ێ جۆتمەھێ دە، دەوام بکە و نوونەرێن 55 دەولەتێن ئەندام و چاڤدێر تێ دە بەشدار دبن. بەردەڤکێ جڤینان حەسەنەین کامل د داخویانیەکێ دە راگھاند کو روونشتن ب درووشما “دیالۆگ و ھەڤگرتن؛ دو ستوونێن سەرەکی بۆ بھێزکرنا ئاشتی و پێشکەفتنا دۆمدار” برێڤە دچن. کامل ھەر وھا دا زانین کو ھەموو ئامادەکاریێن ئەولەھی، لۆجیستیکی و رێخستنی ب ھەڤاھەنگیا د ناڤبەرا وەزارەتا دەرڤە، وەزارەتا ناڤخوەیا ئیراقێ و سەکرەتەریا گشتی یا رێخستنا ھەڤکاریا ئیسلامی دە ھاتنە کرن.
بەشداربوونا د ڤێ خولێ دە وەکی دەرفەتەکا گرینگ یا راوێژکاری و ھەڤاھەنگکرنا ھەلوەستێن وەلاتێن ئەندام ل ھەمبەر ئاستەنگیێن ل پێشبەری جیھانا ئیسلامی تێ نرخاندن. وەزارەتا دەرڤەیا ئیراقێ ژی دیار کر کو مێڤانداریا بەغدایێ د ڤێ قۆناغێ دە پەیامەکا خورتە ژ بۆ زێدەکرنا لێکتێگھیشتن، ئاشتی و ئارامیا دۆمدار ل ھەرێمێ.
