د چارچۆڤەیا پێڤاژۆیا کو وەکی “ترکیەیا بێ تەرۆر’ تێ بناڤکرن دە، ل گۆری زانیاریێن مەدیایا ترکیەیێ ژ چاڤکانیێن ئەولەھیێ بدەستخستنە، خەباتێن ڤالاکرن و تونەکرنا ستارگەھێن پەکەکێ ب لەز بەردەوام دکن. ھات راگھاندن کو پشتی ھەرێمێن مەتینا و گارێ، نھا ژی کامپێن ل خاکورکێ تێن ڤالاکرن و چەکێن د ڤان ناڤەندێن لۆژیستیکی دە پشتی تۆمارکرنا وان تێن تەقاندن.
ل گۆری ئاگاھیێن کو مەدیایا ترکیەیێ ژ چاڤکانیێن ئەولەھیێ وەرگرتنە، ئەڤ پێڤاژۆ د بن چاڤدێریا رێخستنا ئیستیخباراتا نەتەوەیی یا ترکیەیێ (میت) و ب هەماهەنگییا رێڤەبەریا ھەرێما کوردستانێ تێ برێڤەبرن. پشتی ڤالاکرنا شکەفت، نەخوەشخانە و جھێن لۆجیستیکی یێن ل ھەرێمێن جیاواز، ئەندامێن رێخستنێ بەرێ خوە ددن ھەرێما قەندیلێ. ھات دەستنیشانکرن کو ڤەگەرا ڤان کەسان یا بۆ ترکیەیێ دێ ژ قەندیلێ ب ئاوایەکی پلانسازکری و ب رێیا لیستەیێن کو دێ بدن کۆنسولخانەیا ترکیێ هێن کرن، و پێڤاژۆیا تونەکرنا شکەفت و ستارگەھان ژی تێ پێشبینیکرن کو ھەتا مەھا کانوونێ ب داوی وەرە.
ڤەبژارکا وەلاتێ سێیەمین ژ بۆ سەرۆکێن رێخستنێ
د ناڤا چارچۆڤەیا قانوونی یا کو ھاتیە ئامادەکرن دە، ژ بۆ کەسێن کو نکارن ژ عەفوویێ سوود وەربگرن و ڤەناگەرن ترکیەیێ، رەوشەکا نوو دەرکەتیە ھۆلێ. ل گۆری زانیاریان، حکوومەتا ئیراقێ ب چ ئاوایی ناخوازە کو سەرۆک و رێڤەبەرێن بلند یێن پەکەکێ ل سەر ئاخا وان بمینن. ژ بەر کو قەندیل ژی دێ ب تەمامی هێت ڤالاکرن، ژ بۆ ڤان کەسان فۆرمولا چوونا بۆ وەلاتەکی سێیەمین د بن چاڤدێریا ترکیەیێ دە تێ گۆتوبێژکرن.
پێڤاژۆیا شنگالێ و ھەلوەستا بارەگەھا باشیکێ
ل ئالیێ دن، خەباتێن ڤالاکرنا شنگالێ ژی د بن چاڤدێریا راستەراستا حکوومەتا ئیراقێ دە تێن مەشاندن. چاڤکانیێن ئەولەھیێ دان زانین کو ئەڤ پێڤاژۆ دێ ب ھەمان رەنگی وەکی یا ل سووریەیێ بەردەوام بە و دیار کرن: “یێن ل ڤر یان دێ هێن ترکیەیێ یان ژی دێ ل ئیراقێ بمینن. گەر ئەڤ ھەرێم ب تەمامی ژ تەرۆرێ بهێت پاقژکرن، ترکیە دێ بارەگەھا خوەیا ل باشیکێ ژی ڤالا بکە.” ھەر وھا ھاتە گۆتن کو دبە کۆما یەکەما کو ڤەگەرا خوە بۆ ترکیەیێ پێک بینە، ژ ھەرێما شنگالێ بە.
ستاتویا عەبدوللاھ ئۆجالان
دەربارێ نیقاشێن کو کا گەلۆ عەبدوللاھ ئۆجالان دێ د ڤێ پێڤاژۆیێ دە خوەدی ستاتویەکا فەرمی بت یان نە، چاڤکانیێن ئەولەھیێ ئەڤ ئاگاھی دان: “ئەو خوەدی رۆلەکێ فەرمی نابیت. تشتەکی وەکی سەرۆکاتیا ئەنجومەنا بێچەککرن و ئاشتیێ تونەیە. ئۆجالان د ڤێ قۆناغێ دە تەنێ د پێڤاژۆیا ھلوەشاندنا رێخستنێ دەیە.”
