بووبێ ئەسەر
قادا ناڤنەتەوەیی و ب تایبەتی رۆژھلاتا ناڤین ب مە ددە زانین کو دڤێت کورد ل باکورێ کوردستانێ نوونەراتیەکێ کو بکاربە ل سەر ناڤێ ھەمی کوردێن وەلاتپارێز یێن ل دژی خەتا ل سەر ناڤێ ئەنتەگراسیۆنێ کو د ئەساسێ خوە دە تونەبوونا کوردانە، پێک بینن دا کو ئەو ژی بکەڤن ناڤا ھێز، قاوەت و دەفتەرا جیھانێ.
وەکە تێ زانین کو باکورێ کوردستانێ پارچا ھەری مەزنە، مخابن ژ بەر کو د ناڤا پارتی و ھێزێن سیاسی دە یەکیتی و یەکرێزی تونەیە، کەس وان وەکە موخاتەبێ کێشەیا کوردێن باکورێ کوردستانێ نابینن. لۆما دڤێت دەملدەست بێ کو جوداھیەکێ بخن ناڤا تەڤگەر و پارتیێن کوردستانێ وێ یەکتی و یەکرێزیا تێ خوەستنێ پێک بینن.
ب پێکانینا ھەبوونەکا وەھا دێ کوردێن باکورێ کوردستانێ ببن خوەدی تەمسیلکارێ ملەتێ خوە. دێ ببن ھێز و قاوەتەک ل ھەمبەر وێ ئەنتەگراسیۆنا کو د بنگەھا خوە دە تونەبوونا کوردان ب خوە رە تینە.
کوردێن باکورێ کوردستانێ چقاسی دووری ھەڤ بن. ئەوقاسی ژی دێ ژ دۆزا کوردستانێ د قادا ناڤنەتەوەیی دە دوور بن. خوەدی ل دۆزا خوە دەرکەتاندن، ب یەکتی و یەکرێزیێ پێک تێ. ئەڤ ل ھەمی جیھانێ وەھایە. ژ بیر نەکن کو ئازادیا باشوورێ کوردستانێ ب سایا سەرێ وێ ئەنیا کو ب سەرپەرەشتیا نەمر ئیدریس بارزانی ھاتبوو پێک ئانین، بوو.
دڤێت ئێدی ئەم ل خوە ڤەگەرین، ژ دیرۆک و چاندا خوە میناکێن کو دێ مە بگهینە مافێ مەیێ رەوا، دەرسان دەرخن. ئەم دوور نەچن و ل خوە، ل دیرۆکا خوە، ل قەھرەمان و سەرۆکێن خوەیێن تەکۆشەر بنێرن. ببینن کو وان ژ بۆنا دۆزا گەلێ خوە چ خەبات کرن و چاوا پرانی بوونە جانگۆری.
ئەم تەکۆشینا گەل و یا بارزانیان یا سەد سالان بەرچاڤ بکن، کێمانی و شاشیێن ھاتبوون کرنێ ببینین و وان ژ بۆنا ئازادی و سەرخوەبوونا باکورێ کوردستانێ تەمام بکین. سەرخوەبوونا باکورێ کوردستانێ ئازادی و سەرخوەبوونا پەرچێن دن ژی لگەل خوە تینە.
لێ مخابن ئیرۆ ئەو ھێز و باوەریا کو ژ باکورێ کوردستانێ دھاتە کرنێ مرییە. تەڤگەر و خەباتێن ئیرۆ کەتینە دەستێن داخوازکارێن ئەنتەگراسیۆنجیان. ئەو ژی ل سەر ناڤێ ڤێ تونەبوونا کوردان رۆژ ب رۆژ نێزیک دبە. ھەبوون و نەپەرچەکرنا داگیرکەران خورتر دکە.
د ڤان شەرت و مەرجێن تەڤلیھەڤ دە دڤێت باکورێ کوردستانێ ل خوە، ل دیرۆکا خوە، ل تەکۆشین و بەرخوەدانێن بەری خوە خوەدی دەرکەڤن. ئەڤ ژی تەنھا د یەکیتی و یەکرێزیا وان دە دکارە بێ مسۆگەرکرن.
ھەگەر ئەلتەرناتیڤەک ژ ھەمی پێکھاتیێن ل باکورێ کوردستانێ پێک بێ ئاھا وێ دەمێ ئەم دکارین ب رەحەتی بێژین کو ئەم بوونە خوەدی تەمسیلەکا کوردستانی کو ئێدی دنیا و عالەم ژی دێ مە ناس بکن.
ب سایا تەمسیلکرنەکە وەھا، ئەم ژی ئێدی دێ ل سەر ناڤێ باکورێ کوردستانێ بکاربن بەشداری ناڤا خەبات، جڤین و پلاتفۆرمان، ببین. لۆما ھەتا کو ئەم نەبین خوەدی ھێزەکا یەکدەنگ و یەک تەمسیل دێ قەدەرا مە ژی د دەستێ ئەنتەگراسیۆنجیان دە بە کو ئەو ژی تونەبوونا مە تەڤانە.
مادەم ئەم ھەرکەس ڤێ رەوشێ دزانین و دپیڤین، چما ئەم نکارین ھێز و قاوەتەکا یەکگرتی ب ھەڤرە دامەزرینین؟ گەلۆ چ ناکۆکیێن مەزن د ناڤا پارتی و رێخستنێن باکورێ کوردستانێ یێن ژ خوە رە دبێژن ئەم کوردستانی نە، ھەنە؟
گەلۆ ھەتا کەنگی ئەم دێ ژ جڤین و پلاتفۆرمێن ناڤنەتەوەیی بێپار بمینن؟ ما قەی ئەڤە ب دلێ وە ژی یە کو ھوون یەکتییا خوە پێک ناینن و تەمسیلکاریا باکورێ کوردستانێ ددن ئەنتەگراسیۆنجیان.
ئاستەنگیا پێشیا یەکتی و یەکرێزیا ناڤا پارتی و تەڤگەرێن باکورێ کوردستانێ چنە؟ وێ ئەشکەرە بکن دا کو ئەم ژی بزانبن و ل گۆر وێ ببن خوەدی ھەلوەستێن کوردستانی.
من گەلەک جاران ئاستەنگی و چارەسی ژی نڤیسینە لۆما ناخوازم وان ل ڤر دوبارە بکم. لێ دڤێت ئەم هەردەم بەحسا دوبارەکرنا نەیەکرێزیێ بکن، ھەتا کو ئەو پێک بێ…
