چاڤکانیەکێ ژ دەڤەرا ئامێدیێ راگھاند کو چەکدارێن په‌كه‌كێ چەندین تۆنێل ل چیایێ مەتینی ڤالا کرنە و بۆ ھێزێن ترکیەیێ ھشتنە، ھەروەسا گۆتگۆتکێن ڤەکشینا وان ژ چیایێن گارە و خواکورکی دووری راستیێ نە.
چاڤکانیەکێ ژ دەڤەرێ ئامێدیێ ئیرۆ یەکشەمی، 18ێ جۆتمەھا 2026ێ، ژ کوردستان24ێ رە راگھاند کو چەکدارێن پارتیا کارکەرێن کوردستانێ (په‌كه‌كێ) ژ چەند تۆنێلێن چیایێ مەتینی ڤەکشیانە و جھێن خوە بۆ ھێزێن ترکیەیێ ھشتنە، داکو سەربازێن ترکیەیێ ل جھێ وان د ناڤ وان تۆنێلان دە جیگر ببن.
وێ چاڤکانیێ د بەردەوامیا ئاگاھیێن خوە دە ئاماژە ب وێ یەکێ ژی دا کو نھا ژی چەکدارێن په‌كه‌كێ ل دەردۆرا چیایێ مەتینی مانە و دەستەیێن وان یێن چەکدار ل دەڤەرێ دگەرن.
د دەرھەقا بەلاڤبوونا گۆتگۆتکێن ڤەکشینا په‌كه‌كێ ژ چیایێن گارە و خواکورکی دە ژی، وێ چاڤکانیێ ئەشکەرە کر کو ئەڤ نووچە ب تەمامی دووری راستیێیە و چەکدارێن په‌كه‌كێ ل ھەر دو چیایێن گارە و خواکورکی مانە و ت پاشڤەکشینەک نەکریە.
دەڤەرێن چیایی یێن دەڤەرێن پارێزگەھێن دھۆک و ھەولێرێ، ب تایبەتی چیایێن مەتین، گارە و خواکورکی، د چەندین سالێن بۆری دە قادا سەرەکی یا شەر و پەڤچوونێن بەردەوامێن ئارتێشا ترکیەیێ و چەکدارێن په‌كه‌كێ بوون.
ھەبوونا چەکدارێن په‌كه‌كێ ل نێزیکی گوندان و تۆپبارانا بەردەواما فرۆکە و تۆپخانەیێن ترکیەیێ بوویە سەدەما ڤالابوونا ب سەدان گوندان، شەوتینا رەز و باخێن وەلاتیان و شەھیدبوونا ب دەھان کەسێن سڤیل ل دەڤەرا ئامێدیێ و دەڤەرێن سینۆری یێن ھەرێما کوردستانێ.
