بەردەڤکێ یه‌به‌شێ ئەشکەرە کر کو ب مەرەما چوونا ناڤ سیستەما دەولەتێ و چارەسەرکرنا ئارێشەیێن شنگالێ، ئەو ل گەل حكوومه‌تا ئیراقێ بەردەوام دانوستاندنان دکن و گھیشتنە چەند ھەڤفێمکرنان.
بەردەڤکێ ھێزێن بەرخوەدانا شنگالێ (یه‌به‌شێ) ھادی ئەلیاس ئیرۆ دوشەم، 19ێ جۆتمەھا 2026ێ، ئەشکەرە کر کو ژ سباتا بۆری ڤە دانوستاندنێن وان ل گەل بەرپرسێن بلندێن ئەولەھی و لەشکەری یێن حكوومه‌تا ئیراقێ دەست پێ کرنە، کو مەرەم ژێ لھەڤکرنەکە باشە بۆ رێکخستن و چوونا ناڤ سیستەما دەولەتا ئیراقێ.
ھادی ئەلیاس ئاماژە ب وێ یەکێ ژی دا کو ئەڤ پێنگاڤ د خزمەتا سەروەرییا ئیراقێ دە یە و پرسا ئەولەھی و رێکخستنا فەرمی دبە بنگەھەکە بھێز بۆ پاراستنا ناسنامە و دەستکەفتیێن پێکھاتەیا ئێزدییان د چارچۆڤەیا دەولەتێ دە.
بەردەڤکێ یه‌به‌شێ تەکەز ژی کر کو ئارێشەیێن شنگالێ تەنێ د رەھەندا ئەولەھی دە نینن، بەلکو پرسا ڤەگەراندنا کۆچبەران، قەرەبووکرنا وەلاتییان، ئاڤاکرنا دەڤەرێ و دیارکرنا چارەنڤیسا کەسێن وندا و رەڤاندیێن دەستێ داعشێ مژارێن بنگەھینن و پێدڤیتییا وان ب چارەسەریا قانوونی و فەرمی ھەیە. ھەروەھا روهن ژی کر کو دانوستاندن ل گەل بەرپرسێن ئیراقێ د گەلەک خالان دە گھیشتنە ھەڤفێمکرنێ.
د پارەکە دن یا ئاخافتنا خوە دە، ھادی ئەلیاس بەحسا وێ یەکێ کر کو گیرۆبوونا پرۆسەیا لھەڤکرنێ کارەکی ئاسایی یە، ژ بەر کو ئەو مژار گرێدایی پاشەرۆژا جڤاکێ، جۆگرافیایێ، مافێن ژنان و دەزگەھێن ئەولەھی یە. ھەروەسا ھێڤی ژی خوەست کو د پاشەرۆژەکە نێزیک دە ڤێ پرۆسەیێ د خزمەتا جیگری و سەروەرییا ئیراقێ و جڤاکا ئێزدییان دە ئەنجامێن ئەرێنی ھەبن.
یەکینەیێن بەرخوەدانا شنگالێ (یه‌به‌ش) ھێزەکە چەکدارا ئێزدیانە ل دەڤەرا شنگالێ، کو پشتی ئێریشێن رێخستنا داعشێ و کۆمکوژییا ئێزدیان ل سالا 2014ێ ھاتبوو پێکئانین.
د جۆتمەھا سالا 2020ێ دە، ھەولێر و بەغدایێ لھەڤکرنا ئاساییکرنا رەوشا شنگالێ ئیمزە کر کو د ناڤ دە تەکەز ل سەر دەرخستنا ھەمی ھێزێن چەکدارێن دەرڤەیی سیستەما دەولەتێ و کۆمێن نێزیکی په‌كه‌كێ ل دەڤەرێ ھاتبوو کرن.
د دەما بۆری دە ژی ئیراقێ بریارا قەدەغەکرنا په‌كه‌كێ دەرخست، ئەڤ یەک بوویە سەدەم کو یه‌به‌شه بزاڤێن خوە زێدە بکە داکو ب رێیا دانوستاندنان وەکی ھێزەکە فەرمی و قانوونی تەڤلی سازیێن ئەولەھی و بەرەڤانیێ یێن حكوومه‌تا ئیراقێ ببە و ژ گەفان پاراستی بە.
