سكۆ عه‌بدولعه‌زیز
نوكه ل توركیا سێ ئیدیه‌م دهێنه بكارئینان بۆ نه‌مانا ناكوكییان د ناڤبه‌را توركیا و پارتییا كاركه‌ران دا، توركیا دبێژیت پینگاڤێن نه‌هێلانا تیرورێ ل توركیا و پارتییا كاركه‌ران دبێژیت پێنگاڤین پیڤاژۆیا ئاشتیێ.
د ناڤبه‌را ڤان هه‌رسێ ئیدیه‌مان دا شه‌ره‌نیخ به‌رده‌وامه و هه‌ریه‌ك ل گۆری به‌رژوه‌ندیێن خۆ شرۆڤه‌كرنێ دكه‌ت و شرۆڤه‌كرنێن هه‌ردو ئالییان د ناڤه‌رۆكێ دا گه‌له‌ك د دویرى ئێكن، ژ به‌ر ڤێ چه‌ندێ مرۆڤ پرسیار دكه‌ت:
ئه‌رێ كێ مافێ راگرتنا شه‌رى هه‌یه؟
كه‌نگى دێ خه‌باتا سیاسی ده‌ستپێكه‌ت؟
پیڤه‌ر و مه‌رج چنه ؟
د گۆتارا توركیا دا، دهیته دیار كرن كو بتنێ ده‌وله‌ت خودانا ڤێ پروسه‌یێ یه، بریارا دوماهیێ د ده‌ستێ وێ دایه كانێ چه‌ك هه‌مى هاتییه دانان یان نه‌هاتییه دانان.
د گۆتارا ده‌م پارتیێ دا كو نوینه‌را سیاسییا پارتییا كاركه‌رانه، دهیته دیار كرن كو په‌رله‌مان و ده‌ركه‌تنا یاسایان و دیار كرنا مافان دبنه گرێنتى بۆ به‌رده‌وامبوونا پێڤاژۆیا ئاشتیێ.
د گۆتارێن سه‌ركردایه‌تییا پارتییا كاركه‌ران یا راسته‌قینه دا، چاره‌نڤیسیێ ئۆجا‌لان و گێرانا رۆلێ وی یێ سیاسیى یێ راسته‌وخۆ دبنه گرێنتیكرنا پێشه‌ڤچوونا پێڤاژۆیا ئاشتیێ.
د ڤان سێ گۆتاران دا، سێگۆشه‌یه‌ك په‌یدا دبیت:
ده‌ستهه‌لاتا ده‌وله‌تێ، ره‌واتییا په‌رله‌مانى، لێڤه‌گه‌رییا سه‌ركردایه‌تیێ د ناڤا ته‌ڤگه‌رێ دا، د شرۆڤه‌كرنا ڤان هه‌لویستێن ئاشكرا دا، ئه‌م دشێین بگه‌هینه وێ باوه‌ریێ كو دیدار د به‌رده‌وامن و رۆژ بۆ روژێ توهمه‌تباركرنا هه‌ڤدو دژوار تر لێ دهێن و گه‌هشتن بوو رێككه‌فتنێ زێده دبیت، لێ خالێن رێككه‌فتنێ د مژه‌وینه و ناكۆكى گه‌له‌ك یا دژواره ل سه‌ر خالێن رێككه‌فتنێ.
خالێن سه‌ره‌كی یێن ناكۆكییان مرۆڤ دشێت بكه‌ته رێزبه‌ندییه‌ك و ئه‌ڤ رێزبه‌ندییه بوویه گرێیا كوره بۆ هه‌ر سێ گۆتاران.
ده‌وله‌ت ئاماده نیینه چ گرێنتیا بده‌ت به‌رى چه‌ك نه‌هێته دانان.
ته‌ڤه‌گه‌ر ئاماده نینه چه‌كان بدانیت هه‌تا گرێنتى نه‌هێنه دان.
ده‌م پارتى بێى ده‌ركه‌تنا یاسا و مافان ژ په‌رله‌مانى نه‌حازره پیڤاژویێ ب سه‌ركه‌فتى رابگه‌هینیت.
دڤێ رێزبه‌ندیێ دا چاڤه‌رێبوون دبیته چه‌قێ هه‌لاوسیتی یێ پێڤاژۆیا دانوستاندنێ. ئه‌ڤ هه‌لاویستنه بوویه ئامیره‌كێ گه‌ش و هه‌رسێ لایه‌ن دكه‌نه بانگه‌شه‌یا حه‌قبوونا خۆ بۆ لایه‌نگیرێن خۆ.
د ڤێره دا ئه‌م دبینین بتنێ جڤاكا كوردى و مافێن وان یێن نه‌ته‌وه‌یى د ئاماده‌نینن و چاره‌نڤێسی زمانێ خۆ و خه‌باتا خۆ یا سیاسی بۆ قوناغا بهێت نزانن، واته جڤاكا كوردى مافێن وان یێن خوزایى گرنگترن ژ چاره‌نڤیسێ سه‌ركردایه‌تییا سیاسی یا ته‌ڤه‌گه‌رێ.
ئه‌ڤ ئه‌نجامه بیرا مه ل سترانا هاتییه گۆتن ژ لایێ شڤان په‌روه‌ری ڤه دئینن، ده‌مێ دبێژیت: (هه‌ركه‌س چوو مالا خۆ و بژیت پێشمه‌رگه و بژیت كوردستان)، لێ مخابن سه‌ركردایه‌تییا ته‌ڤه‌گه‌رێ هه‌ردو كوپلێن دوماهیێ نه‌كرینه چه‌قێ دانوستاندنان، به‌لكو بتنێ كوپلێ ئیكێ كرییه ستراتیجیه‌تا دانوستاندنێن خۆ، ده‌وله‌تا توركى ئه‌ڤ چه‌نده گه‌له‌ك پێ خۆشه، چونكى وان ئارێشه ب سلامه‌تییا سه‌ركردایتییا ته‌ڤگه‌رێ نینه به‌لكو وان ئارێشه د گه‌ل مافێن نه‌ته‌وه‌یى یێن ملله‌تێ كورد هه‌یه و ده‌مێ ته‌ڤگه‌ر ده‌ستان ژ وان مافان به‌رده‌ت، ده‌وله‌تا تورك دێ مه‌حفیرا سۆر بۆ سه‌ركردایه‌تییا ته‌ڤه‌رگه‌ێ دانیت.
