ئەندامێ ئاکادەمیا زانستێن جڤاکی یا عەبدوللاھ ئۆجالان دوران کالکان دەربارێ پێڤاژۆیا نوو دە داخویانیەک دا و دیار کر کو وان ھەموو ھێزێن خوەیێن چەکدار ژ ناڤا سینۆرێن ترکیەیێ ڤەکشاندنە، لێ ل ھەمبەری ڤێ یەکێ حکوومەتا ئەنقەرەیێ د وارێ گاڤێن پراکتیکی دە بێدەنگ مایە.
کالکان دا زانین کو د سالێن 2025 و 2026ێ دە ھەموو ھێزێن چەکدار ژ ناڤا سینۆرێن ترکیەیێ و ھەرێمێن سینۆری ھاتنە ڤەکشاندن و دیار کر کو ژ ئالیێ وان ڤە چ مەترسیەکا چەکداری ل سەر ئەولەھیا ترکیەیێ نەمایە. وی دەستنیشان کر کو تەڤی ڤان پێنگاڤێن دیرۆکی یێن ژ بۆ چارەسەریێ، ئەنقەرە پێڤاژۆ تەنێ د ئاستا گۆتنان دە ھشتیە و چ گاڤێن شێنبەر نەهاڤێتیە.
سەرکردەیێ پەکەکێ تەکەز کر کو ژ بۆ بەردەوامکرنا ڤێ پێڤاژۆیێ و بجھانینا بریارێن کۆنگرەیا 12ێ، دڤێت بەریا ھەر تشتی ئازادیا فیزیکی ژ بۆ عەبدوللاھ ئۆجالان بێ دابینکرن و زەمینەکا قانوونی و سیاسی ژ بۆ تەڤلیبوونا دەمۆکراتیک بهێت ئاڤاکرن. کالکان داخوازێن کو دبێژن “بلا چەک ب تەمامی بێن دانین” رەد کرن و ئانی زمان کو ئەڤ جورە داخویانی تەنێ ژ بۆ کوشتنا دەمێ و فشارێ تێن کرن، ژ بەر کو ئێدی ھێزەکا چەکدار یا کو مەترسیێ چێبکە نەمایە.
پێڤاژۆیا نوو د دەستپێکا سالا 2025ێ دە، ل سەر بانگا دەولەت باخچەلی و بانگا پشترە یا عەبدوللاھ ئۆجالان یا د 27ێ سباتا 2025ێ دە دەست پێ کربوو. د گولانا 2025ێ دە پەکەکێ کۆنگرەیا خوەیا 12ێ پێک ئانیبوو و د تەباخا 2026ێ دە ژی پارلامەنتۆیا ترکیەیێ رەشنڤیسا عەفوویێ پەسەند کربوو.
