ھەڤسەرۆکێ دەم پارتیێ تونجەر باکرھان رەخنە ل سیاسەتا حکوومەتا ترکیەیێ د وارێ پرۆسەیا ئاشتیێ دە گرت و راگھاند کو ئاشتی ل ھۆلا چاڤەرێکرنێ نامینە و نابە ب ھنجەتێن ھەفتانە و مەھانە ئەڤ دەرفەتا دیرۆکی بێ ونداکرن. ئەشکەرە ژی کر کو ل گۆری زانیارێن وان و بەرپرسێن ھەرێما کوردستانێ، ت چەکدارێن په‌كه‌كێ د ناڤ ئاخا ترکیەیێ دە نەمانە.
ھەڤسەرۆکێ پارتیا وەکھەڤی و دەمۆکراسیێ یا گەلان (دەم پارتی) تونجەر باکرھان دوهـ سێشەم، 20ێ جۆتمەھا 2026ێ، د گۆتارەکێ دە د جڤینا فراکسیۆنا پارتیا خوە دە ل پارلامەنتۆیا ترکیەیێ، بال کشاند سەر رەوشا رۆژھلاتا ناڤین و رەخنەیێن توند ل ھەلوەستا دەستھلاتا ئەنقەرەیێ گرتن.
تونجەر باکرھان گۆت: “جەنگ و قەیرانێن سیاسی و جڤاکی ل رۆژھلاتا ناڤین بەردەوامن، ئێدی ت پێشھاتەک د سینۆرێ وی وەلاتی دە کو تێ دە روو ددە نامینە، کەس جەنگەکە مەزن ناخوازە، لێ بۆ ئاشتیەکە راستین ژی پێنگاڤێن پێدڤی نایێن ئاڤێتن.”
ھەڤسەرۆکێ دەم پارتیێ ھەروەسا راگھاند: “ئەڤ زێدەتری دو سالانە ئەم د قۆناغەکە گرینگ رە دەرباز دبن، پێنگاڤێن مەزن ھاتنە ئاڤێتن؛ داوین پێنگاڤ د 8ێ جۆتمەھێ دە بوو ب بریارا ڤەکشینا ب تەمامی ژ ترکیەیێ، سەرکردەتیا وێ تەڤگەرێ (په‌كه‌كێ).
ناڤبری ھەروەسا راگھاند کو یەک ئەندامێ وان ژی نەمایە و بنگەھ و کامپێن خوە ڤالا کرنە، چەک ھاتنە شەوتاندن و بریارا ڤەکشینێ ھاتیە بجھانین. نھا جڤاک ب حەقێ خوە دپرسە: چ تشتێ دن مایە کو بکن؟ ھوون ل بەندا چ نە؟ دڤێ دەستھلات ژ نیشاندانا نیەتێ دەرکەڤە و بچە قۆناغا بریاردانێ.”
باکرھان ھەروەسا گۆت: “خەلک ژ مە دپرسە؛ کەنگێ ژ ئابدوڵاھ ئۆجالان رە شەرت و مەرجێن پەیوەندی و ژیانا ئازادانە تێنە دابینکرن؟ کەنگێ دکارە راستەراست پەیامان ئاراستەیی رایا گشتی بکە؟ کەنگێ گرتیگەھ تێنە ڤالاکرن و کەسێن دوورخستی ڤەدگەرن؟ کەنگێ قەیووم تێنە راکرن و ئەحمەد تورک و ھەڤسەرۆکێن شارەدارییا سێرتێ و سەرۆکێن ھلبژارتی ڤەدگەرن سەر کارێن خوە؟ پێدڤییە دەریێ پارلامەنتۆیێ بێ ڤەکرن، قانوونێن پێدڤی بێن دەرخستن، دەست ژ سیاسەتا سەپاندنا قەیوومان بەردن و قانوون نەبە دارێ دەستێ دەستھلاتێ.”
ناڤبری داخوازا پێکانینا دەستەیەکە تایبەت ژی کر و گۆت: “پێدڤییە بێیی پاشخستن دەستەیا ئاشتی و سیاسیکرنێ ب ھەڤاھەنگیا ئۆجالان بێ دامه‌زراندن. چەکدانین تەنێ ب نیشاندانا نیەتێ ب داوی نایێ، بەلکو مەکانیزمایەکە پێدڤییە. ئەو کەسێن د ڤێ دەستەیێ دە کار دکن دڤێ 24 ساعه‌تان لگەل ئۆجالان د پەیوەندیێ دە بن، ژ بەر کو ب نیقاشکرنا چەند ھەفتیان جارێکێ، پرۆسە ب رێ ڤە ناچە.”
پشتی جڤینا وێ فراکسیۆنێ، تونجەر باکرھان د بەرسڤا پرسیارا رۆژنامەڤانان دە ل سەر پرۆسەیا چەکدانینێ و جڤینا چاڤەرێکرییا ئەنجوومەنا ئەولەھیا نیشتمانییا ترکیەیێ د داویا مژدارێ دە گۆت: “ت چەکدارێن په‌كه‌كێ د ترکیەیێ دە نەمانە. ل ھەولێرێ ژی بەرپرسێن ھەرێما کوردستانێ تەکەز کر کو ل سەر سینۆرێن ترکیەیێ ت خال نەمانە کو ببن گەف و ھێز ژ کامپان ڤەکشیانە و ڤالا کرنە.”
