لە چیایێ شنگالێ ئیرۆ، د مەراسیمەکا ھەڤپارا ئارتێشا ئیراقێ و فەرمانداریا یەکینەیێن بەرخوەدانا شنگالێ (یەبەشێ) دە، پەیمانا د ناڤبەرا ھەر دو ئالیان دە ب فەرمی ھاتە راگھاندن. ب ڤی رەنگی، داوی ل تێکلیا لەشکەری یا سەربخوە یا یەبەشێ و یەژەشیێ ھات و 4 ھەزار و 165 شەرڤان بوون بەشەک ژ سیستەما ئەولەھیێ یا ئیراقێ.
د مەراسیمێ دە کو شێورمەندێ سەرۆکوەزیرێ ئیراقێ، پارێزگارێ نەینەوایێ، رایەدارێن لەشکەری و فەرماندارێن یەبەشێ-یەژەشیێ ئامادە بوون، داخویانیێن فەرمی ھاتن خوەندن. داخویانیا فەرمانداریا یەبەشیێ کو ژ ئالیێ “تیرێژ شنگالی” ڤە ھات خوەندن، بال کشاند سەر پاراستنا روومەتا گەلێ ئێزدی یێ کو د تەباخا 2014ێ دە ب کۆمکوژیا داعشێ رە رووبروو مابوو. د داخویانیێ دە ھات دەستنیشانکرن کو یەبەشە و یەژەشێ ژ ناڤ ئێشا جینۆسایدێ دەرکەتنە، 530 شەھید دانە و پشتی تێکبرنا داعشێ، وان یەکەم جار ئالایا ئیراقێ ل شنگالێ ھلدایە.
بەردەڤکێ ئۆفیسا راگھاندنێ یا سەرۆکوەزیرێ ئیراقێ سەباح نومان ژی د مەراسیمێ دە ئاخڤی و ئەڤ پێنگاڤ وەکی گاڤەکە گرینگ ژ بۆ سەروەریا دەولەتێ و کۆنترۆلکرنا چەکان بناڤ کر. فەرمانداریا یەبەشیێ د داخویانیا خوە دە تەکەز کر کو سەرکەفتنا ڤێ پەیمانێ گرێدایی بجھانینا خالێن وێیە، ب تایبەتی چارەسەرکرنا شۆپێن جینۆسایدێ، ئەشکەرەکرنا چارەنووسا ونداهیان، ئاڤەدانکرنا ھەرێمێ و خورتکرنا رۆلا سازیێن سڤیل و رێڤەبەریا خوەجھی یا شنگالێ.
