فشارەکان لەسەر هەرێمی کوردستان زیاتر دەبن
ئایا هەرێم دەبێتە ئەکتەر و هاوپشک لە گۆڕانکارییە ناوچەییەکاندا یان دەبێتە گۆڕەپانێک لەژێر کارتێکەریی بڕیای دیتراندا؟
سمکۆ عەبدولعەزیز
هەفتەی داهاتوو حەوتووی بڕیاری گەورە نییە، بەڵکوو هەفتەی دووبارە جێگیربوونەوەی سیاسی دەبێت. لە بەغدا هێزە سەرەکییەکان تێدەگەن کە عێراق چووەتە قۆناغێکی نوێ کە تیایدا پرسەکانی نەوت و وزە و وەبەرهێنان گرنگتر بوون لە ڕکابەرییە ئایدیۆلۆژییە کلاسیکییەکان.
بۆیە حکومەتی فیدراڵی هەوڵدەدات پێشکەوتن لەسەر دۆسیەی نەوت بەدەستبهێنێت و توانای خۆی بۆ بەڕێوەبردنی دەوڵەت لەڕووی ئابوورییەوە نیشان بدات، چونکە شەرعیەتی سیاسی لە قۆناغی داهاتوودا بە توانای حکومەت بۆ دەستەبەرکردنی سەقامگیری دارایی دەپێورێت، نەک بە توانای بڵاوکردنەوەی دروشم.
بەڵام لە هەرێمی کوردستان ململانێی ڕاستەقینە لەسەر پێکهێنانی حکوومەت نییە، بەڵکو گەڕاندنەوەی تواناکانی دانوستانی کوردییە. مێژووی سیاسی کورد دەریدەخات کە هێزی کورد لە بەغدا و ناوچەکەدا کاتێک پەرەی سەندووە کە هێزە کوردییەکان لە پێگەیەکی یەکگرتوو تەعاموڵیان کردبێت و هەرکاتێک دووبەرەکی ناوخۆیی بەردەوام بووبێت، لاواز بووە.
بڕیارە لە چەند هەفتەی داهاتوودا فشارە ناڕاستەوخۆکان زیاتر بن، چ لە لایەن بەغداوە چ لەلایەن ئەکتەرە ناوچەیی و نێودەوڵەتییەکانەوە، بۆ هاندانی هێزە کوردییەکان لە خێراکردنی دانوستان و لێکتێگەیشتنیان. ئەمەش لەبەر خۆشەویستی ئەوان بۆ کورد نییە، بەڵکو لەبەر ئەوەیە کە ناوچەکە بە قۆناغێکی ڕێکخستنەوەی وزە و ڕێڕەوی بازرگانیدا تێدەپەڕێت و کەس نایهەوێت بۆشایی سیاسی لە هەرێمێکدا هەبێت کە خاوەنی پێگەیەکی جیۆپۆلەتیکی بەرچاو بێت، وەک هەرێمی کوردستان.
من پێشبینی توندوتیژی ئەمنی گەورە ناکەم، بەڵام پێشبینی دەکەم فشارە سیاسی و ئابووری و میدیاییەکان زیاد بکەن. چونکە شەڕی داهاتوو شەڕی پێگە و ڕۆڵ دەبێت: ئایا هەرێم دەبێتە ئەکتەر و هاوپشک لە گۆڕانکارییە ناوچەییەکاندا یان دەبێتە گۆڕەپانێک لەژێر کارتێکەریی بڕیای دیتراندا؟
هەفتەی داهاتوو چارەنووسی عێراق و هەرێمی کوردستان یەکلایی ناکاتەوە، بەڵام ڕەنگە ڕێڕەوی مانگەکانی داهاتوو لە چوارچیوەی وەرچەرخانی مەزندا دیاری بکات. ئەکتەرە سیاسییەکان بەهۆی ئەوەوە نادۆڕێن کە توانایان لاوازە، بەڵکوو لەبەر درەنگ تێگەیشتنیان لە دەرەتانی مێژوویی و نەدانی بڕیاری گونجاو لە کاتی گونجاودا، دەیدۆڕێنن.
