هه‌سه‌دێ کوشتنا سڤیلەکی و دو شەرڤانان د ئێریشا ترکیێ دە راگهاند

هێزێن سووریەیا دەمۆکراتیک هه‌سه‌دێ دیار کر، د ئێرشا درۆنەکە ترکیێ یا ل سەر گوندێ مەلە سبات یێ قامشلۆ دە سڤیلەک و دو شەرڤانێن وان هاتن کوشتن.

فەرمانداریا گشتی یا هه‌سه‌دێ ب داخویانیەکێ راگهاند، دوهی دەمژمێر 17:10 درۆنەکە ترکیێ ئۆتۆمۆبیلەک ل گوندێ مەلە سبات یێ قامشلۆ بۆمبەباران کر و د ئەنجامێ دە دو شەرڤانێن وان یێن ب ناڤێن (دژوار کۆبانی و چیا قامشلۆ) و سڤیلەکی ب ناڤێ «ئەدیب یووسف» هاتن کوشتن.

هه‌سه‌ده‌ دبێژە، ئارتێشا ترکیێ د دەمێن داوی دە ئێرشێن خوە ل سەرانسەری سینۆر زێدەتر کرنە، هەر رۆژ هەم ب تۆپبارانان هەم ژی ب درۆنان ئێرشان پێک تینە، د ڤان ئێرشان دە نە تەنێ شەرڤان، لێ بەلێ کەسێن سڤیل ژی تێن ئارمانج گرتن.

ئەڤ یەک د دەمەکێ دە یە، دوهی دەستەیا هوندرین یا هەرێما جزیرێ راگهاند، د ئێرشا ترکیێ یا رۆژا 6ێ تەباخێ ل سەر تاخا پیشەسازی یا باژارێ قامشلۆ دە، فەرماندارەکی پژاکێ هات کوشتن.