مهسهده: ل کۆبانیێ مەترسییا کۆمکوژیێ هەیە
مەجلیسا سووریەیا دەمۆکراتیک (مهسهدێ) دیار کر کو ل کۆبانیێ مەترسیا کۆمکوژیێ هەیە.
مهسهدێ د داخویانیەکێ دە ل سەر “بپێشکەتنەکە مەترسیدار” یا ل هەرێمێن رێڤەبهرییا خوەسەر هشیاری دا.
مهسهدێ راگهاند کو کۆمێن چەکدارێن توندرەو یێن سەر ب حکوومەتا ڤەگوهێز یا سووریەیێ ڤە، گەفەکە راستەراست ل سەر باژارێ کۆبانیێ چێدکن.
د داخویانیێ دە مهسهدێ ئاماژە پێ کر کو ئێرش گەلێ کورد و وان هێزان هەدەف دگرن کو “د رەفێن پێش دە ل دژی داعشێ شەر کر و د تێکبرنا وێ دە خوەدی رۆل بوو.”
مهسهدێ کریارێن وان کۆمێن چەکدار شەرمەزار کر و گۆت: “ئیدامکرنا شەرڤانێن یەکینەیێن پاراستنا ژنێ (یهپهژێ) پشتی دیلگرتنا وان، هەر وها بەردانا ئەندامێن رێخستنا داعشێ، دوجارە هلبەراندنا تەرۆرێ یە و گەفەکە راستەراستە ل سەر ئەولەهیا هەرێمی و ناڤنەتەوەیی.”
مهسهدێ هەر وها ل سەر ئحتیمالا “ئەنجامدانا کۆمکوژیێن نوو، مینا یێن ل حەلەبێ ل دژی عەلەوی، دورزی و کوردان پێک هاتن” هشیاری دا.
مەجلیسا سووریەیا دەمۆکراتیک هەر وها تەكەز کر کو باژارێ کۆبانێ، یێ کو وەکی “سەمبۆلا بەرخوەدانا جیهانی یا ل دژی داعشێ و دەستپێکا هلوەشینا وێ” تێ ناسکرن، ب گەفەکە راستەراست رە رووبروویە.
مهسهدێ د بەردەوامیێ ژی دە گۆت، “ئێرشا ل سەر کۆبانێ، ئێرشا ل سەر نرخێن دەمۆکراتیک و ئازادیێ یە.
هەر وها هەولدانا تۆلهلدانێ یە ژ وان کەسێن کو تەرۆر تێک بر.”
ل گۆری مهسهدێ، هەڤدەمێ کۆبانێ “هەرێما جزیرێ ژی ب هەموو پێکهاتەیێن خوە یێن عەرەب، کورد، سوورییان و ئاسووری ڤە هاتیە هەدەفگرتن.
ئارمانجا ڤان ئێرشان تێکدانا پرۆژەیا بهەڤرەژیانێ و رێلبەرگرتنا ئاڤاکرنا سووریەیەکە دەمۆکراتیک و ئازادە.”
مەجلیسا سووریەیا دەمۆکراتیک داخوازا پشتگرییا ژ بۆ هێزێن سووریەیا دەمۆکراتیک (ههسهدێ) کر و گۆت:
“پشتگریکرنا ههسهدێ ئیرۆ نە بژاردەیەکە سیاسی یە لێ بەرپرسیاریەکە ئەخلاقی و مرۆڤییە ژ بۆ رێلبەرگرتنا ڤەگەرا تەرۆرێ و پاراستنا هەموەلاتیێن سڤیل.”
مهسهدێ هەر وها هشیاری دا کو “پشتگوهکرنا ڤان مەترسییان دێ وها بکە کو تەرۆر جارەکە دن ل دەریێ جیهانێ بدە.”
مهسهدێ دوجارە کر کو ئەو “پابەندی زمانێ دیالۆگ و دان و ستاندنا ب حکوومەتا دەمکی رەنە.” مهسهدێ کریارێن هۆڤێن دەستهلاتا شامێ شەرمەزار کر کو دیالۆگ و چارەسەریا ئاشتیانە رەد دکن.
