شاخەوان عهبدوللا: ل پارلەمەنتۆیا ئیراقێ هشمەندیەکە شۆڤینی و دیکتاتۆری هەیە
سەرۆکێ فراکسیۆنا پهدهكێ ل پارلەمەنتۆیا ئیراقێ راگهاند، حکوومەتا فەدەرال ب تەمامی هایداری وان ئالیانە کو ب مووشەک و درۆنان ئێریشی هەرێما کوردستانێ دکن، لێ ژ بەر کو ئەو هێز خوە ژ دەولەتێ مەزنتر دبینن، بەغدا نکارە رێ ل بەر وان بگرە.
سەرۆکێ فراکسیۆنا پارتیا دەمۆکراتا کوردستانێ (پهدهكێ) ل پارلەمەنتۆیا ئیراقێ شاخەوان عهبدوللا ئیرۆ 29ێ ئادارێ ل قەزایا سۆرانێ سەردانا مالباتێن وان پێشمەرگەیان کر کو د ئێریشێن مووشەکی یێن ئیرانێ دە شەهید بووبوون. عهبدوللا ل ور د کۆنفەرانسەکە رۆژنامەڤانیێ دە ئێریشێن ئیرانێ وەکی “نەهەقیەکە مەزن” بناڤ کر و رەخنەیێن توند ل سیاسەتا بەغدایێ گرت.
شاخەوان عهبدوللا ئاماژە ب وێ کر کو وەکی سەرۆک مەسعوود بارزانی ژی تەکەز کریە، هەرێما کوردستانێ نە بەشەک ژ وی شەری یە کو نها نەڤچە گرتیە بن باندۆرا خوە. هەروها گۆت: “سیاسەتا هەرێمێ بەر ب ئاشتی و ئارامیا ناڤچەیێ ڤەیە. ئەو ئێریشێن کو ل سەر پێشمەرگەیان هاتنە کرن، نەهەقی و تاوانەکە مەزنە و ت هنجەتان قەبوول ناکە.”
دەربارێ ئێریشێن درۆنی و مووشەکی یێن ل سەر کوردستانێ دە، شاخەوان عهبدوللا دەستنیشان کر کو حکوومەتا ئیراقێ ناسنامەیا ئێریشکەران ب باشی دزانە، لێ نکارە چ گاڤان ل دژی وان باڤێژە. هەروها گۆت: “بەغدا نکارە رێ ل بەر وان بگرە، ژ بەر کو ئەو هێزێن چەکدار خوە ژ حکوومەتا ئیراقێ مەزنتر دبینن.”
سەرۆکێ فراکسیۆنا پدکێ رەخنەیێن توند ل هشمەندیا ناڤ پارلەمەنتۆیا ئیراقێ گرت و دیار کر کو هنەک ئالیان هەول دانە رێ ل بەر خوەندنا داخویانیا وان یا شەرمەزارکرنا ئێریشێن سەر پێشمەرگە بگرن. هەروها گۆت: “ل ناڤ پارلەمەنتۆیێ هشمەندیەکە شۆڤینی و دیکتاتۆری هەیە، لێ ئەم ل سەر خوەندنا داخویانیا خوە ب بریار بوون.”
شاخەوان عهبدوللا هەروها رەخنە ل سەرۆکێ پارلەمەنتۆیێ ژی گرت و گۆت کو نابە ئەو ب “هەناسەیەکە پارتیتی و ئالیگرانە” بریاران بدە.
دەربارێ رەوشا سیاسی یا ئیراقێ دە، شاخەوان عهبدوللا ئاشکەرا کر کو داخوازەک ژ بۆ جڤینا پارلەمەنتۆیێ یا دەربارێ هلبژارتنا سەرۆککۆمار دە هەیە. لێ بەلێ وی نێرینا پهدهكێ وها ئانی زمان: “ل گۆری مە د ڤێ قۆناغێ دە هلبژارتنا سەرۆکوەزیر گرنگترە. لێ بەلێ پرانیا سەرکردەیێن سیاسی یێن ئیراقێ ل سەر وێ یەکێ ل هەڤ کرنە کو سەرۆککۆمار و سەرۆکوەزیر ب هەڤ رە بێن هلبژارتن.”
