ئایشەگول دۆغان: ستاتویا ئۆجالان ژ بۆ ئاشتیێ مەرجێ بنگەھینە

بەردەڤکا دەم پارتیێ ئایشەگول دۆغان بال کشاند سەر دەرەنگخستنا رێزکنامەیێن قانوونی یێن دەربارێ پێڤاژۆیا چارەسەریێ دە و دەستنیشان کر، ژ بۆ ئاڤاکرنا ئاشتیەکە ماییندە، باشکرنا شەرت و مەرجێن ئۆجالان ھەوجەداریەکە بنگەھینە.

بەردەڤکا پارتیا وەکھەڤی و دەمۆکراسیێ یا گەلان (دەم پارتی) ئایشەگول دۆغان، پشتی جڤینا لژنەیا رێڤەبەریا ناڤەندی یا پارتیێ ل ناڤەندا گشتی داخویانیەک دا چاپەمەنیێ. دۆغان د ئاخافتنا خوە دە گەشەدانێن داوی یێن ل ترکیەیێ، پێشنیارێن ژ بۆ پێڤاژۆیا ئاشتیێ و کریزا ھقووقی نرخاندن.

“پێدڤیا ترکیەیێ ب ئیرادەیەکە سیاسی ھەیە”

ئایشەگول دۆغان دیار کر، وان پێشنیارا دەڤلەت باھچەلی یا دەربارێ “کۆردیناسیۆنا سیاسی” دە د جڤینا خوە دە گۆتووبێژ کریە و وھا گۆت: پێدڤیا بنگەھین يا ترکیەیێ چارەسەریا دەمۆکراتیکە. وەکە دەم پارتیێ ئەم ڤەبوونا رێیێن دەمۆکراسیێ پر گرینگ دبینن و واتەیەکە مەزن ددن پێشنیارێن د ڤی واری دە، لێ ژ بۆ ڤێ یەکێ ئیرادەیەکە سیاسییا خورت و زەلال ھەوجەیە.

ستاتویا ئۆجالان و ئاشتی

دۆغان دەستنیشان کر کو ئۆجالان د پێڤاژۆیا ئاشتیێ دە ئاکتۆرێ سەرەکەیە و بێیی باشکرنا شەرت و مەرجێن وی، ئاشتی پێک نایێ: ھەم ژ بۆ ئاڤاکرنا ئاشتیێ و ھەم ژی ژ بۆ ڤەبوونا رێیێن سیاسی، دڤێ شەرت و مەرجێن برێز ئۆجالان وەرن سەرەراستکرن. ستاتویا وی ھەوجەداریەکە بنگەھینە. نھا د پێڤاژۆیێ دە ختمین و دەرەنگخستن ھەنە؛ دڤێ ھەر کەس ب بەرپرسیاری نێزیکی ڤێ مژارێ ببە.

رەخنە ل دەرەنگخستنا قانوونان

بەردەڤکا دەم پارتیێ رەخنەیێن توند ل دەرەنگخستنا گاڤێن ھقووقی گرتن و ئانی زمان کو سالەک د سەر بریارا ھلوەشاندنا په‌كه‌كێ رە دەرباس بوویە. دۆغان گۆت: پشتی وێ بریارێ گاڤێن دیرۆکی ھاتن ئاڤێتن، ئەندامێن رێخستنێ چەکێن خوە شەوتاندن. لێ تەڤی دەرباسبوونا سالەکێ، ھێژ قانوونێن پێویست نەھاتنە چێکرن. دڤێ سیاسەت گاڤێن وێرەک باڤێژە، زمانەکی سەردەما نوو بکار بینە و زەمینا ھقووقییا کو ئاشتی ببە جڤاکی ئاڤا بکە.

بانگا ژ بۆ ھەڤدیتنا راستەراست

د داویا ئاخافتنا خوە دە، دۆغان داخواز کر کو شاندەیا وان دەملدەست ب ئۆجالان رە ھەڤدیتنێ پێک بینە. ھەروھا تەکەز کر کو دڤێ ئۆجالان بکاربە رامانێن خوە راستەراست ب رۆژنامەگەر و رایا گشتی رە پارڤە بکە، دا کو فکارێن د ناڤ جڤاکێ دە وەرن راکرن و پێڤاژۆ ب ئاوایەکی شەفاف ب رێڤە بچە.