مەم ئارارات دەنگەکە کو ژ ئالیێ نفشێ جوان ڤە د موزیکا کوردی دە پر تێ حەزکرنە. ئەم وی ب گرانی ب سترانێن وی یێن ل سەر جەمیلایێ ناس دکن، کو جەنازەیێ وێ د دەما شەرێ خەندەکان دە د سەلاجێ دە ھاتبوو ڤەشارتن، و ب سترانێن وی یێن ل سەر ئەڤین، چووک و زارۆکێن برچی. لێبەلێ، وی ڤێ داویێ ب داخویانیەکێ کو دا، بوو رۆژەڤا ھەمی کوردان. وی راگھاند، “ئەز نە خولامێ بابێ کەسی مە” و دیار کر کو ئەو مافێن خوە دخوازە.
ھندەک کەسان ئەڤ داخویانی وەکی کو تەنێ ژ بۆ “پەرەیان” ھاتیە دایین نیشان دان. لێبەلێ، پرسگرێک نە ل سەر پەرەیانە؛ ئەو ل سەر ھەولدانا پەکەکێ یە کو ھەمی ھێزێن ل دەرڤەیی سیستەما وێ پێشڤە دچن ئاستەنگ بکە و ل سەر ھونەرێ دیکتاتۆرییەکێ ئاڤا بکە.
پەکەکێ ل ئەورۆپا و باکورێ کوردستانێ دەستەسەرییەک مەزن، ب شێوازێن مافیایێ ئاڤا کریە، نە تەنێ د قادا موزیک، شانۆ و فیلمان دە، لێ د ھەمان دەمێ دە ل سەر گەلەک سەندیکا و رێخستنێن پیشەیی ژی مشەخووریەکا مەزن دمەشینە.
یەک ژ وان یێن کو د بن ڤێ دەستەسەرکرنێ دە دخەبتە کۆم موزیکە. کۆم موزیک، کو د سالا 1997ێ دە ژ ھێلا پەکەکێ ڤە ھاتیە دامەزراندن، ھەول ددە کو سەردەستیا موتلەق ل سەر ھونەرمەندان ھەم ل ئەورۆپا و ھەم ژی ل باکورێ کوردستانێ ئاڤا بکە. کۆم موزیک بەرھەمێن گەلەک ھونەرمەندان دەستەسەر دکە، رێ ل بەر کۆنسەرێن کو ب دەستوورا شارەداریان تێن لدارخستن دگرە و ڤان کەسان ب ئەشکەرەیی وەکی “دژمنێن نرخان و شەھیدان” ئیلان دکە، ب ڤی ئاوایی رێ ل بەر ئافراندنا ھونەرێ دگرە. پەکەکە مینا د سیاسەتێ دە، د وارێ چاند و ھونەرێ دە ژی، مینا سیستەما بەعس سەروەرییا پارتییێ دسەپینە.
ب راستی، مەم ئارارات نە تاکە کەسە کو د ڤێ دەستەسەرییا پەکەکێ دە ئاسێ مایەیە. ھەر کەسێ کو فەرمانێن کۆم موزیکێ نەشۆپینە و ب سەربخوە موزیکێ بافرینە، وەکی دژمنێ کۆم موزیکێ تێ راگهاندن. لێ مەم ئارارات ب وێرەکی تەڤگەریایە و دەنگێ خوە بلند کریە.
مەم ئارارات بووتەک شکاند، لێبەلێ، شکاندنا بووتەکێ کریارەک پر خەتەرناکە. ژ بەر ڤێ یەکێ، ھندەک ژ وان، ژ ترسا ئەنجامێن نەرینی، ب ئاوایەکی نەراستەراست پشتگری دان مەم ئارارات، ھندەکێن دن ژی ب ئەشکەرەیی دژمناتیا خوە ل ھەمبەر مەم نیشان دان.
یەک ژ کەسێن کو د دۆزا مەم ئارارات دە بەشدار بوون شڤان پەروەرە. شڤان ب مافخازییا مەم ئارارات یا ل دژی یەکدەستداریێ وەکە کێشەکا پەرەیان پێناسەکر، ئالیگرییا سازییێن پەکەکێ کر. لێ بەلێ، وی ب خوە ل سەر مافێن بەرھەمێن سترانێن خوە دژمناتیەک دژوار لگەل پەکەکێ ھەبوو، و وێ دەمێ، ئەندامێن پەکەکێ ل سەر دکێ ئێریشی وی کرن تەمبوورا وی د سەرە وی دە شکاندن، ژێ رە گۆتن شڤان پەرە-وەر. پاشێ، خێرخوازەکی مافێن سترانا وی کڕین و ب دیاریێ دا وی. ئاینوور دۆگان سترانا وی د کۆنسەرەکێ دە گۆت، شڤان دژمناتیا خوە ل ھەمبەر وێ نیشان دا. لێ نھا، رابردوویا خوە ژ بیرکر و ھەمبەری ھوونەرمەندەکی کورد کو داخوازا مافێ خوە دکە ل کێلەکا ئێرشکارێن مافیایا پەکەکێ جھ گرت.
داخویانیا مەم ئارارات، “ئەز نە خولامێ بابێ کەسی مە” کریارەک شۆرەشگەرییە ل دژی سیاسەتا “تەسلیمبوونا ب زۆرێ”یا پەکەکێ. ھونەرمەند، لیستکڤانێن شانۆگەر، پزیشک، نڤیسکار و ئەھلێ وژدانا کورد دڤێت ل کێلەکا مەم ئارارات ل دژی ڤێ سیاسەتا تەسلیمبوونا ب دارێ زۆرێ و سیاسەتا ھونەرمەندبوونا پارتیزانی راوەستن.
