ھەپەگێ د 8ی جۆتمەھێ دە راگھاند کو وان چار تونەلێن ل ھەرێما گوندێ بازێ یا ل رۆژئاڤایێ مەتینا ڤالا کرنە. لێبەلێ، داخویانیا پەکەکێ یا ب کێموکاسی بوو. ژ بەر کو پەکەکێ ئەو ڤالا نەکرنە، بەلکو راستەراست رادەستی لەشکەرێ ترک کرن. د جھ دە پشتی داخویانیا پەکەکێ، ئاژانسا نووچەیان یا فەرمی یا دەولەتا ترک، ئاژانسا ئانادۆلو، وێنەیێن تونەلان وەشاندن.
ل گۆری ئاگاھیێن مە، د دەستپێکا جۆتمەھێ دە، گرووپەکێ ھەپەگێ یێ پلەبلند ژ بەرێ گارە گھیشت ھەرێما بازێ یا ل رۆژئاڤایێ مەتینا. یەکینەیەکا لەشکەرێن ترک یێن کو گرێ بازێ دگرتن ژی چوون ھەرێما کو شکەفت لێ بوون و پێڤاژۆیا رادەستکرنێ دەست پێ کرن.
ئەڤ شکەفت ئەو تونەلن کو پەکەکێ ژ سالا 2023یێ ڤر ڤە ڤالا کربوون و ژ وێ دەمێ ڤە ڤەنەگەریابوون ور. ئارتێشا ترکیێ د سالا 2023یێ دە ل گرێ بازێ یێ ل ژۆری تونەلان ب جھ ببوو. لێبەلێ، ئارتێشا ترکیێ ب خوە راستەراست نەکەت ناڤ تونەلان.
د 6ێ تیرمەھا 2025ێ دە، لەشکەرێن کو دکەتن تونەلێن ل گوندێ سیدا، کو پەکەکێ رادەستی دەولەتا ترکیێ کربوون، ب گازا میتان ژەھری بوون و 12 لەشکەر مرن. ڤێ جارێ، دەولەتا ترک چەکدارێن پەکەکێ ژ بۆ مسۆگەرکرنا ئەولەکارییا لەشکەرێ خوە ل پێشخوە دا شاندن بۆ ناڤا توونێلێ.
پشتی رادەستکرنا تونێلان، ئەندامێن پەکەکێ ڤەگەریان بەرێ گارە و جەنازەیێن گەریلایێن کو بەرێ د دەمێن جوودا دە ل ھەرێمێ مربوون، کۆمکرن. ژ خزیرانا 2026ێ ڤر ڤە، پەکەکە ب دەستوورا دەولەتا ترکیێ جەنازەیان ژ مەتینا کۆم دکە. تەرمێن گەریلایێن کو د پەڤچوونێن سالێن داوی دە ژییانا خوە ژ دەست دابوون و ل ھەرێمێ ھاتنە ڤەشارتن، ب ترومبێلان بەر ب بەرێ گارە ڤە تێنە ڤەگوھاستن. پەکەکە ب دەستوورا دەولەتا ترکیێ ل دۆرا گوندێن ئێکمالێ و مەیرۆکێ یێن گارە گۆرستانان چێدکە.
ئەڤ نە جارا یەکەمە کو چەکدارێن پەکەکێ یێن ل ھەرێما بەھدینانێ لگەل لەشکەرێن ترک ھەڤدیتنان دکن. د گولانا 2025ێ دە، ب تەعلیماتێن ئۆجالان، پەکەکێ لژنەیەک د ناڤبەرا ھێزێن خوەیێن ل ھەرێما بەھدینانێ و دەولەتا ترک دە ئاڤا کر. ب رێیا ڤێ میکانیزمایێ، پەکەکێ د سالا 2025ێ دە ل مەتینا ھەرێما سەرگەلێ و گوھەرزێ ھندەک چەکێن خوەیێن گران ژی رادەستی ئارتێشا ترک کرن. ھەر وھا ئەو سەنگەرێن خوە یێن ل دۆرا گوندێ بەرچی، بالاڤە و گوھەرزێ د بن کۆردیناسیۆنا لەشکەرێ ترک دە ب ترومبێلان ڤەگوھەستن بوو ھەرێما گارە.
ل گۆری چارچۆڤەیا قانوونا نوو، ژ بۆ کو گەریلایێن پەکەکێ چەکێن خوە دەینن، دڤێت کۆنسەیا ئەولەکاریا نەتەوەیی یا ترک پشتراست و تەئیید بکە کو وان خوە بێچەک کرییە. ھەر چەند رێڤەبەرێن پەکەکێ جارنان ب ئەشکەرەیی دبێژن کو پێڤاژۆ پێش ناکەڤە، لێ بەلێ پێڤاژۆ ل بەھدینانێ برێڤە دچە. کۆنسەیا ئەولەکارییا نەتەوی چەک و تونەلێن پەکەکێ تەسپیت دکە و دەور دگرە. و ژ بۆ کو ئەڤ پێڤاژۆ باش بخەبتە، چاوا کو ل ژۆر د ناڤبەرا ئۆجالان، دەولەتێ و رێڤەبرێن پەکەکەیا ھلوەشیایی دە میکانیزمایەک ھەیە، ل ژێر ژی ل دەڤەرێن وەکی مەتینا، گارە، خاکورکێ و سلێمانیێ میکانیزمایەک ھەیە کو پێڤاژۆیێ دمەشینە.
راستی نایێ ئەشکەرەکرن، لێ پێڤاژۆ ب لەز و بەز تێ مەشاندن. تێ پێشبینی کرن کو پەکەکە د رۆژێن پێش دە تونێل و سەنگەرێن دن یێن ل ھەرێما گارە ژی رادەست بکە.
