ل ئیمرالیێ ترافیکەکا مەزن یا ھەڤدیتنان دمەشە. جەمیل بایک، دوران کالکان، سەبری ئۆک، بەسێ ھۆزات، مەزلووم عەبدی، ئیلھام ئەحمەد و بەرپرسێن دن یێن ئاستا ناڤین چوونە ئیمرالیێ. رێڤەبەرێن پایەبلندێن پەکەکێ یەک ب یەک دچن ئیمرالیێ و لگەل عەڤدللا ئۆجالان ل سەر ماسەیێ روودنن.
ھەری داوی جەمیل بایک ژی، کو د کانوونا 2025ێ دە رەد کر کو بچیتە ئیمرالیێ و گۆت “سەرۆک دینوھار بوویە” ژ ترسا کوشتنێ پاشڤە گاڤ ئاڤێت، نەچار ما کو بچیتە سەر مێزا ئۆجالان بروونە. گەلۆ ھاژا کی ژ ڤێ ترافیکا ئیمارالییێ ھەیە؟ میتا ترک دزانە، کۆنسەیا ئەولەکاریا نەتەوەیی یا ترک دزانە، وەزارەتا ناڤخوە یا ترک دزانن، سەرۆکێن پایەبلندێن پەکەکێ یێن ل قەندیلێ دزانن.
گەلۆ ژ کێ تێ ڤەشارتن؟ ژ گەلێ کورد!
کورد ژ بریارێن ل سەر چارەنووسا وان تێن گرتن، ژ دانوستاندنێن کو ل پشت دەریێن گرتی دمەشن بێخەبەرن. ژ بەر کو لیستکەک مەزن و خەتەرناک ب چارەنووسا گەلێ کورد رە تێ لیستن.
ئۆجالان خیانەتەکا وەها ئۆرگانیزە دکە کو نە تەنێ پێشەرۆژا کوردێن باکور، لێ د ھەمان دەمێ دە پێشەرۆژا رۆژئاڤا، باشوور و رۆژھلاتێ کوردستانێ ژی پێشکێشی ھێزێن داگیرکەرێن کوردستانێ دکە. و نھا، ژ بۆ ڤەشارتنا ڤێ خیانەتا خوە یا مەزن، ئەو دانوستاندنان ڤەدشێرن. ئەو ئاخافتن-پەیمانێن کو ھاتنە کرن ڤەدشێرن.
د دەمەکێ دە کو ژ رایا گشتی رە دبێژن “تەنێ ھەژمارەکا سینۆردارکری یا کادرۆیان دێ ژ پێڤاژۆیێ سوود وەربگرن”، لێ د پاشخانەیێ دە، تەڤاھیا سەرکردەیێن رێخستنێ ھێدی ھێدی دکەڤن ناڤ پێڤاژۆیێ.
دەولەت ستراتەژیا خوە دشۆپینە و سەرکردەیێن پەکەکێ ھەول ددن کو پێشەرۆژا خوە مسۆگەر بکن. د ڤێ ناڤبەرێ دە، رۆژئاڤا فرۆتن دەولەتا سووریێ، و ھەولددن شنگالێ ژی ب فرۆشن دەولەتا ئیراقێ. و د دەمەکێ وھا بازارێ سییاسی گەرم و ل سەر چارەنووسا وان بازار تێ کرن، لێ مخابنی ڤە ھاژا گەلێ کورد پێ تونە.
ئیرادەیا کوردان ل سەر ڤان میزێن کو ل سەر چارەنووسا وان ھاتنە دانین نایێ حەسباندن. ئەڤ پێڤاژۆیا دانوستاندنا، کو ل پشت دەریێن گرتی تێ مەشاندن، بەشەک ژ لیستکەکێیە کو دێ پێشەرۆژا کوردان تاری بکە. لێ راستی نایێ ڤەشارتن!
