پشتی راگھاندنا ھلوەشاندنا پەکەکێ ژ ئالیێ عەبدوللاھ ئۆجالان ڤە، چاڤێن ھەموویان ل سەر داتایێن “قانوونا چارەسەریێ” بوون.
ژ ئاڤابوونا پەکەکێ 48 سال و ژ دەستپێکرنا تێکۆشینا چەکداری 42 سال دەرباس بوون. د ڤێ ناڤبەرێ دە:
50 ھەزار مرۆڤان ژیانا خوە ژ دەست دا،
5 ملیۆن کورد ژ گوندێن خوە کۆچبەر بوون،
17 ھەزار کەس ژی بوون قوربانیێن کوشتنێن کریار نەدیار.
لێ ل بەرامبەری ڤان بەردێلێن گران، د رەشنڤیسا قانوونا کو ھاتیە ئامادەکرن دە، نە تەنێ چ دەستکەفتیەک ژ بۆ کوردان تونەیە؛ بەلکو د ناڤەرۆکێ دە ھەتا پەیڤا “کورد” ژی دەرباس نابە!
ئاستا ھەری گرینگ یا کو کەس ب دەنگێ بلند بەحس ناکەت، رەوشا کەسێن ژ پەکەکێ ڤەقەتیایییە.
ژ سالا 1980 ھەتا ئیرۆ، نێزیکی 25 ھەزار کەس ژ رێخستنێ ڤەقەتیا نە و نھا ل ھەرێما کوردستانێ و ئەورۆپایێ دژین.
ڤەقەتینا ھەری مەزن د سالێن 2004 و 2005ێ دە روو دا. وێ چاخێ 25 رێڤەبەرێن پایەبلند و نێزیکی 3 ھەزار کادرۆ، ژ بەر کو ل دژی بداویکرنا فکرا “کوردستانا سەربخوە” و دەستپێکرنا شەرێ نوو دەرکەتن، ژ پەکەکێ ڤەقەتیان.
پەکەکێ ئەڤ کەسە ب “سیخورتیێ” تۆھمەتبار کرن؛ کەسێن وەکی کانی یلماز، کەمالێ سۆر و شاپوور بۆدیشاڤا ھاتن قەتلکرن.
ئەڤ کۆما مەزن، ژ ئالیێ پەکەکێ ڤە وەکی “خایین” و ژ ئالیێ دەولەتا ترک ڤە ژی وەکی “تەرۆریست” ھاتن بناڤکرن و د بن گەفا ھەر دو ئالیان دە ژیان.
یا بالکێش ئەوە کو ئەڤ کەسێن کو ل دژی شەری دەرکەتبوون، نکارن ژ قانوونا نوویا کو دێ دەرکەڤە سوودێ وەربگرن. ژ بەر کو قانوون کادرۆیێن بەری سالا 2005ێ تەڤلی پەکەکێ بوونە ناگرە ناڤ خوە.
ل گۆری ئیدیعایان، ئۆجالان ژ دەولەتێ داخواز کریە کو قانوون رێڤەبەرێن بەرێ نەگرە ناڤ خوە. رێڤەبەریا پەکەکێ ژی ب گۆتنا “ئەگەر ئەو ڤەگەرن دێ چ جوداھیا مە و وان بمینە؟” نەخوەستیە کو کەسێن ڤەقەتیایی ڤەگەرن ترکیەیێ.
د ئەنجامێ دە، ئۆجالان و پەکەکێ ژ بۆ تۆلا خوە ژ ڤان مرۆڤان ھلینن، رێ ل بەر ڤەگەرا وان یا بۆ سەر ئاخا باب و کالان گرتنە.
ھەتا ئەو کەسێن کو دکارن سوود ژ قانوونێ وەربگرن ژی، سزایێن وان دێ ژ بۆ 5 ھەتا 10 سالان هێن پاشخستن. واتە، ژیانا وان دێ ژ بۆ سالان د بن کۆنترۆل و گومانێ دە رەھین بمینە.
ئەڤ رەشنڤیسا قانوونێ، نە پرۆژەیەکا ئاشتیێیە؛ بەلکی بازارکرنەک و حەسابپرسینەکا ئۆجالان و پەکەکێیە کو ل سەر ژیانا جوانێن کورد ھاتیە ئاڤا کرن.
