جەمیل بایک، کەسایەتیەک گرینگ د پەکەکێ دە، د بەرنامەیەکێ دە کو بەشداری وێ بوو، ژ بەر قەبوولکرنا رۆلا شێورمەندیێ ب توندی رەخنە ل مەزلووم عەبدی گرتن.
بایک گۆت: “دەستپێکێ وی گۆت کو ئەو دێ چ وەزیفەیان وەرنەگرە، لێ پاشێ وی رۆلا شێورمەندیێ “مستەشاریێ” قەبوول کر. د ھەمان دەمێ دە، ئەو نە شێورمەندێ کارووبارێن کوردانە، لێ تەنێ شێورمەندەکی بورۆکراتە. رەخنەیێن کو ل سەر ڤێ یەکێ ھاتنە گرتن راستن و ئەم ژی رەخنە دکن. دڤیابوو کو وی ئەڤ پۆست قەبوول نەکربا.”
بایک ب رەخنەیێن خوە مەزلووم عەبدی ئارمانج گرت، ب ڤێ یەکێ بایک بەرێ ھەمی رەخنەیان بەر ب مەزلووم عەبدی ڤە زڤراند.
بایک وێنەیەکی وسا دانی کو قەندیلێ ئەڤ وەزیفەیا مەزلووم عەبدی ئەرێ نەکریە و ئەو ب سەربخوە تەڤگەریایە.
لێ گەلۆ ئەڤە راستە؟
مەزلووم عەبدی کادرۆیەکی پەکەکێ یە. ل رۆژئاڤا ژ دەستپێکێ ڤە، ژ رێخستنا کادرۆیان بگرە ھەتا ئابۆری، سیاسەت و دیپلۆماسیێ ھەر تشت ل گۆری بەرنامەیێن کو ژ ئالیێ قەندیلێ ڤە ھاتنە دانین و ب ئەرێکرنا وان ھاتیە مەشاندن. ھەتا پشتی ھلوەشینا ئەسەد ژی، تەڤ بوویەرێن ل رۆژئاڤا قەومین ب ئەرێکرنا پەکەکێ پێک ھاتن. ھەم پەیمانا 19ێ ئادارێ و ھەم ژی پەیمانا 29ێ چلە ب ئەرێکرنا پەکەکێ ھاتنە چێکرن.
سیپان حەمۆ، مەزلووم عەبدی، و ئیلھام ئەحمەد ھەموویان ب دەستوورا پەکەکێ وەزیفەیێن خوە وەرگرتن.
ب گۆتنەکە دن، رەخنەیێن جەمیل بایک یێن ل سەر مەزلووم عەبدی، کو مینا وەلاتیەکی ئاسایی یێ ژ رەوشێ بێخەبەر تێن گرتن، تەنێ تاکتیکەکە ژ بۆ خاپاندنا رایا گشتی و پاراستنا خوە ژ کارڤەدانا رایا گشتی. جەمیل بایک ئارمانج دکە کو ھەموو سووجداریێ باڤێژە سەر مەزلووم عەبدی دا کو ئۆجالان، پەکەکێ و سەرۆکاتیا وێ بپارێزە.
لێبەلێ، مەزلووم عەبدی پیۆنەکە کو تشتێ ژێ رە ھاتیە گۆتن کریە.
سیاسەتا نەخوەستنا ستاتویەکا تایبەت ژ بۆ رۆژئاڤا د بن ناڤێ کانتۆن و کۆنفەدەرالیزما دەمۆکراتیک دە، کو 12 سالان ل رۆژئاڤا ھات مەشاندن، بەرھەما ئۆجالان و پەکەکێ یە.
رۆژئاڤا، کو ھەتا سالا 2025ێ ب داھاتا پەترۆلێ، کۆنترۆلکرنا سینۆران و ھەبوونەکا لەشکەری یا مەزن ھەما ھەما وەک دەولەتەکێ تەڤدگەریا، د ناڤ دو سالان دە دیت کو دەستکەفتیێن وێ کێم دبن، ئەڤ ژی ژ ئەنجاما پەیمانا ئەنتەگراسیۆنێ یا ئۆجالان لگەل دەولەتا ترکیێ یە.
ل رۆژئاڤا، پشتی مرنا ب ھەزاران جوانێن کورد، پەکەکێ مافێ سێ دەمژمێران دەرسێن بژارتە، شێورمەندبوونا مەزلووم عەبدی، و پارلامەنتەربوونا ئیلھام ئەحمەد، ب دەست خست. ل ھەمبەری ڤێژی بێ گومان، گۆرستانێن کو ب ھەزاران جوانێن کورد لێ ھاتنە ڤەشارتن ھەنە.
ئەڤ ئەنجاما وێرانکەر تەنێ ب دامەزراندنا مەزلووم عەبدی وەکی شێورمەند نایێ راڤەکرن. بەرپرسیارێ ڤێ پێڤاژۆیێ ھەموو پەکەکەیە.
