د دەستێ پەکەکەیا ھلوەشاندی دە چەکێن گرینگ ھەنە. ب تایبەتی لگەل پێڤاژۆیا رۆژئاڤا، پەکەکێ گەلەک مووشەک، درۆن و چەکێن دوور مەودا ب دەست خستن. دیسا، ژ بەر ھەڤکاریا خوە یا لگەل حەشدا شەعبی ل ئیراقێ، بوون خوەدی کووژمەکی گرینگ ژ مووشەک و جەبلخانەیێن نەقەیدکری. پەکەکێ خوە ھلوەشاند و د مەراسیمەکێ دا د 11ێ تیرمەھا 2025ێ دە چەکێن خوە شەوتاندن.
د 10ی تەباخێ 2026ێ دە، ل ترکیەیێ یاسایەکا چارچۆڤەیی یا 12 خالی ھاتە دەرخستن، کو چەکێن خوە رادەستی دەولەتێ بکن. ئۆجالان، ل ئیمرالیێ، لگەل دەولەتا ترکیێ ل سەر چەکبەردانا پەکەکێ پەیمانەک چێکریە.
ژ بەر ڤێ گەلۆ دێ پەکەکە چ ب چەکێن خوە بکە؟
رۆژنامەیا یەنی شەفەک، کو نێزیکی ئاکەپێ یە و ب زاردەڤێ ئاگاھیێن ژ دەولەتێ، ل سەر مژارێ سەکنی.
ل گۆری ڤێ رۆژنامەیێ، پەکەکە دێ چەکێن خوە رادەستی وەزارەتا پاراستنا نەتەوەیی یا ترکیێ بکە.
ل گۆری ڤێ پرۆسەسێ؛
1. دەستپێکێ، وەزارەتا پاراستنا نەتەوەیی دێ چەکێن کو ژ ھێلا پەکەکێ ڤە ھاتنە رادەستکرن لگەل راپۆرتێن میتێ یێن دەربارێ چەکێن د دەستێ پەکەکێ دە بەراورد بکن کو بکاربن زەلال بکن کا چەکێن وندا ھەنە یان نا.
2. چەکێن ئاسایی کو ل گۆری ستانداردێن ناتۆیێ نە و چەکێن پاراستنا ھەوایی یێن نووژەن (درۆن) دێ بکەڤن ناڤا لیستا کەلوپەلێن ھێزێن چەکدارێن ترکیێ دە.
3. چەکێن کو ل گۆری ستانداردێن ناتۆیێ نینن دێ هێنە حەلاندن و ژ نوو ڤە هێن بکار ئانین.
4. ھندەک ژ چەکێن مایی ژی دێ هێن فرۆتن یان ژی لگەل وەلاتێن گونجاو هێن ھەڤگوھەرین.
5. داھاتا کو ژ ڤێ پێڤاژۆیێ دهێت بدەستخستن دێ بکەڤە سەر حەسابا وەزارەتا خەزینەیێ یا ترکیێ.
پەکەکە خوەدی جەبلخانە و ھێزەک لەشکەری یا مەزنە. نھا کو خوە ھلوەشاندییە ژ ڤێ یەکێ دێ کی سوودێ وەربگرە؟ دێ ئەڤ ھێزا ھەیی چلێ هێت؟
د 19ێ جۆتمەھا 2023یێ دە، پەکەکە ژ چەپەر و تونەلێن ل چیایێ قاراچۆخ و دەورووبەرێن وارگەھا مەخموورێ ڤەکشیا و ئەو رادەستی ئارتێشا ئیراقێ کر.
ھێزێن یەبەشێ یێن ل شنگالێ تەڤلی حەشدا شەعبی کرن و هێژ ژی رێگرییێ ل کەتنا پێشمەرگەیان بۆ ھەرێما شنگالێ دکن.
ب سالانە کو پەکەکێ پێشمەرگەیێن رۆژ یێن ژ رۆژئاڤا وەک دژمن راگەهاندینە، لێ پاشێ وان ھەسەدە تەڤلی ئارتێشا سووریێ کر و ھێزێن سووریێ ئانین رۆژئاڤایێ کوردستانێ.
پشتی کو پێڤاژۆیا لگەل ترکییێ دەست پێ کر، وان تونەل و مەخزەنێن جەبلخانەیێ یێن ل ھەرێما بەھدینانێ رادەستی دەولەتا ترک کرن. نھا ئەو ئامادەکاریێن رادەستکرنا جەبلخانەیێن مایی دکن بۆ ئارتێشا ترکییێ.
نھا ھێزێن رۆژھلات پژاک مایە دەست پەکەکێ دە ل سەر وان بازارێ دکن، لێ ھێژ چارەنووسا وان نە دیارە. ژ بەر کو بەحسا یەکپارچەیییا خاکا ئیرانێ و ئەنتەگراسیۆنا دەمۆکراتک دکن.
واتە، پەکەکێ ھێز و چەکێن لەشکەری یێن خوە ل سەر دەولەتێن ئیراق، سووریێ و ترکیێ بەلاڤ کرن. ئانگۆ رادەستی داگیرکەران کرن. چ سەنگەر و جەبلخانە رادەستی کوردان نەکرن.
لێ بەلێ، ژ سالا 2019ێ ھەتا 2024ێ ، رەخمێ داخواز و تەلەبییێن پێشمەرگە کو ئارتێشا ترک نەکەڤە ھەرێما کوردستانێ، لێ پەکەکێ ئەڤ داخوازی وەکە سەدەما شەری پێناسە کر و ئێرشی ھێزێن پێشمەرگێ کوردستانێ کر. نھا، پشتی کو پەکەکێ خوە ھلوەشاندی ژی، وان نە سەنگەرەک، نە چەکەک، نە رێیەک، نە توونێلەکا د بن کۆنترۆلا خوە دە نەدایە ھێزێن پێشمەرگە.
ب کورتی و کورمانجی، ژ بلی کوردان، ھەر کەسی ژ چەک و سەنگەرێن پەکەکێ سوود وەرگرت…
