چەپێن ترکیەیێ ژ دەم پارتیێ ڤەدقەتن و ھەڤپەیمانیەکا نوویا چەپگر ئاڤا دکن

د قادا سیاسەتا ترکیەیێ دە گەشەدانەکا گرینگ روو دا و ھات راگھاندن کو چەند فراکسیۆن و پێکھاتەیێن چەپگر یێن ترک ژ ناڤ رەفێن پارتیا دەمێ ڤەقەتیانە. ل گۆری زانیاریان، پشتی ڤێ پارچەبوونێ د بن پێشەنگیا چەند پارتیێن سۆسیالیست دە بەرەیەکێ نوویێ سیاسی و هەڤپەیمانیەکا نوویا چەپگران ھاتیە ئاڤاکرن.

د ڤێ دەستپێشخەریا نوو دە، پارتیێن مینا پارتیا سۆسیالیستا بندەستان (ESP)، پارتیا ژ نوو ڤە ئاڤاکرنا سۆسیالیست (SWKP)، پارتیا تەڤگەرا کارکەران (EHP) و پارتیا ئازادیا جڤاکی (TOP) جیھ دگرن. ھاتە دەستنیشانکرن کو ئەڤ بەرەیێ نوو، پارتیێن دن یێن چەپگر یێن دەرڤەیی دەم پارتیێ ژی د ناڤا خوە دە دحەوینە، کو د ناڤ وان دە پارتیا کارکەرێن ترکیەیێ (TIP)، پارتیا کەدێ (EMEP)، پارتیا چەپگر (سۆل پارتی) و تەڤگەرا کۆمونیستا ترکیەیێ (TKH) ھەنە. ڤان پارتیان ب داخویانیەکێ راگھاندن کو ئەو دێ خەباتێن خوەیێن سیاسی یێن ھەڤپار ژ نھا و پێ دە د بن سیوانا “نا ژ بۆ کۆۆردیناسیۆنا ناتۆیێ” دە برێڤە ببن.

ئەڤ دابەشبوونا نوو وەکی نیشانەیا گوھەرتنەکا بنیادی د ناڤبەرا رێزا چەپگرێن ترکیەیێ دە تێ نرخاندن. ھەر چەندە کو د ناڤ رایا گشتی دە ھندەک ئالیان ھەولدانێن وەھا دکرن کو دەم پارتیێ تەنێ وەکی پارتیەکا نەتەوەیی یا کوردان بدن نیشاندان ژی، د راستیێ دە بناغەیێ ڤێ پارتیێ ل سەر بنگەھا هەڤپەیمانیەکا بەرفرەھ یا چەپگر و سۆسیالیستێن ترکیەیێ ھاتبوو ئاڤاکرن. چاڤدێرێن سیاسی دیار دکن کو تەڤی ڤێ دابەشبوونێ ژی، ھین ژی ھەژمارەکا زێدە یا پارلامەنتەر، رێڤەبەر و ھەتتا ھەڤسەرۆکێن دەم پارتیێ بخوە ژی ژ ئەنیا چەپگر و کەمالیستێن ترکیەیێ پێک تێن.

ئەڤ نەخشەرێیا کو وەکی ئەنجاما راستەراستا سیاسەتا “براتیا گەلان” یا پەکەکێ تێ حەسباندن، د ناڤا سالێن بۆری دە بووبوو سەدەم کو جەماوەرێ کورد دەنگێن خوە بدن ڤێ پلاتفۆرمێ داکو مافێن خوەیێن نەتەوەیی بپارێزن. لێ بەلێ، ئاڤابوونا ڤێ ئەنیا نوویا دەرڤەیی دەم پارتیێ نیشان ددە کو ناکۆکیێن ئایدۆلۆژیک و ستراتەژیک گھیشتنە ئاستەکێ وەھا کو ھەر دو ئالیان ژ ھەڤ جودا بکە، و ھێژ نایێ زانین کا ئەڤ پێنگاڤ دێ د ھلبژارتنێن پێش دە باندۆرەکا چاوا ل سەر ھێزا دەنگێن کوردان و پێوەندیێن سیاسی یێن ھەرێمێ بکە.