ھاکان فیدان: ئیسرایل ب ھنجەتا پاراستنا دورزیان ئامادەکاریا ئۆپەراسیۆنەکا لەشکەری ل دژی سووریێ دکە

ھاکان فیدان: ئیسرایل ب ھنجەتا پاراستنا دورزیان ئامادەکاریا ئۆپەراسیۆنەکا لەشکەری ل دژی سووریێ دکە

وەزیرێ کارێن دەرڤەیێ ترکیەیێ ھاکان فیدان د ھەڤپەیڤینەکا مەدیایی یا ل گەل راگھاندنا ترک دە راگھاند کو ئیسرایل سینارۆیەکێ ژ بۆ ئێریشەکا ل دژی سووریەیێ ئامادە دکە و دخوازە ژ بۆ ڤێ ئۆپەراسیۆنێ ھنجەتەکێ چێبکە. فیدان دا زانین کو ئیسرایل پلان دکە ب ھنجەتا پاراستنا دورزیان ئۆپەراسیۆنەکا لەشکەری پێک بینە و ھشیاری دا کو دڤێت ئاکتۆرێن ھەرێمی و ناڤدەولەتی ب جدیەتەکا مەزن ل ھەمبەری ڤێ ئەگەرێ تەڤبگەرن.

ل گۆری گۆتنێن فیدان، ژ سێ ئێلێن سەرەکی یێن دورزیان ل باشوورێ سووریەیێ، دو ئێل لگەل حکوومەتا سووریەیێ نە و ل دژی ئیسرایلێ رادوەستن، لێ ئیسرایل پشتگریێ ددە ئێلا سێیەم. وی دەستنیشان کر کو ئیسرایل ھەفتانە ب رێیا ھەلیکۆپتەران چەک و تەقەمەنیان دگھینە ڤێ ئێلا سێیەم و ئەڤ ئالی ھەول ددە ئالۆزیان لگەل ئارتێشا سووریەیێ دەرخە دا کو ژ بۆ ئۆپەراسیۆنا زەمینی ئامادە ببە.

ھشیاریا ل سەر کارڤەدانێن ھەرێمی

وەزیرێ کارێن دەرڤەیێ ترکیەیێ بال کشاند سەر ئەنجامێن موحتەمەل یێن ڤێ سیناریۆیێ و تەکەز کر کو کارڤەدان تەنێ ب سووریەیێ ڤە سینۆردار نامینن. فیدان ھشیاری دا کو ئەنجامدانا ئۆپەراسیۆنەکا وھا دکارە ببە سەدەما شەرەکی نوو و پرسگرێکێن ھەیی ل سەرانسەرێ ھەرێمێ کوورتر بکە.