وەزیرێن دەرڤەیێن سووریێ و ترکیەیێ ل ئەنقەرەیێ جڤینەکا رۆژنامەڤانی یا ھەڤپار ل دار خستن و تەکەزی ل سەر خورتکرنا تێکلیێن دوئالی، پاراستنا سەروەریا سووریەیێ و پێویستیا راوەستاندنا ئێریشێن ئیسرایلێ کرن. د جڤینێ دە وەزیرێ دەرڤەیێ سووریەیێ ئەسعەد شەیبانی راگھاند کو د دەستپێکا مەھا بهێت دە بالیۆزخانەیا سووریەیێ ل ئەنقەرەیێ ب رەنگەکی فەرمی دێ هێت ڤەکرن.
د جڤینێ دە وەزیرێ دەرڤەیێ ترکیەیێ ھاکان فیدان دیار کر کو وان ھەموو ئالیێن پێوەندیێن دوئالی، د ناڤ دە وارێن ئەولەھی، بەرەڤانی، تەندورستی و پەروەردەیێ نیقاش کرنە. فیدان ھەر وھا تەکەز ل سەر یەکپارچەییا ئاخا سووریەیێ کر، داخواز کر کو ئێریشێن ئیسرایلێ یێن ل سەر ئاخا سووریەیێ بێن راوەستاندن و ئیسرایل پابەندی پەیمانا 1974ێ ببە.
ئەسعەد شەیبانی ژی ژ ئالیێ خوە ڤە دا خویاکرن کو وان پێنگاڤێن داویێ یێن ئاڤاکرنا لژنەیا بلند یا ھەڤپار تەمام کرنە و ھەڤکاریا وان ل سەر ئەردێ دەست پێ کریە. د ڤێ چارچۆڤەیێ دە خەتا کارەبایێ یا حەلەب-بێرەجیکێ دهێت نووژەنکرن، گەشتێن ئاسمانی یێن راستەراست د ناڤبەرا شام و باژارێن ئانتالیا و ئیزمیرێ دە دەست پێ دکن و کار ژ بۆ ڤەکرنا بلەزا دەریێ سینۆری یێ قامشلۆ-نسێبینێ تێ کرن.
ل سەر ئاستا ستراتەژیک و ئابۆری، ھەر دو ئالیان ل ھەڤ کر کو پرۆژەیا گرێدانا خەتا ئاسنی یا کو ژ ترکیەیێ د ناڤا سووریەیێ رە دەربازی ئوردن و کەنداڤێ دبە بلەزینن. ھەر وھا ھاتە راگھاندن کو قەبارەیا بازرگانیێ د سالا 2025ێ دە گھیشتیە 3.7 ملیار دۆلاران و ئارمانج ئەوە کو ئەڤ ھەژمار بگھیژە 10 ملیار دۆلاران، ژ بۆ ڤێ یەکێ ژی ھێسانکاری ژ بۆ بەرھەمێن سووریەیێ و پاراستنا وەبەرھێنەران تێن کرن.
د مژارا ئەولەھیا ئاڤێ دە، شەیبانی دیار کر کو وان بەردانا دادپەروەرانە یا ئاڤا چەمێ فراتێ نیقاش کریە و ئەو ل بەندا تەڤلیبوونا ترکیەیێ یا د جڤینا سێ ئالی یا ل گەل ئیراقێ دە نە. د دەربارێ رەوشا ھەرێمی دە، شەیبانی ئەولەھیا کەنداڤێ وەکی بەشەک ژ ئەولەھیا سووریەیێ ب ناڤ کر و گۆت کو نێرینا وان و یا ترکیەیێ ل سەر چارەسەرکرنا پرسگرێکان ب رێیا دانوستاندنان یەکە.