یاسایا پەسەندکرنا “رێکەفتنا مەککەیێ”یا کو د ناڤبەرا ترکیێ، پاکستان و عەرەبستانا سعوودی دە ھاتبوو ئیمزاکرن، د رۆژنامەیا فەرمی دە ھات وەشاندن و کەت وارێ جیبجیکرنێ. رێکەفتن ئارمانج دکە کو د وارێن ئەولەھی، بەرگری و پیشەسازیا لەشکەری دە ھەڤکاریەکا پرئالی و ستراتەژیک د ناڤبەرا ھەر سێ وەلاتان دە بێ ئاڤاکرن.
ل گۆری ناڤەرۆکا رێکەفتنێ، ھەر سێ وەلات دێ د وارێ پیشەسازیا بەرگرییێ دە پرۆژەیێن ھەڤبەش پێش ئێخن. د ڤێ چارچۆڤەیێ دە پارڤەکرنا تەکنۆلۆژیێ، بەرهەمئینانا ھەڤبەش، لێکۆلین و پێشخستن و ھاندانا داھێنانێن نوو د وارێ لەشکەری دە تێن ئارمانجکرن. ھەر وھا ژ بۆ بلندکرنا ئاستا ئامادەبوونا لەشکەری، بەرنامەیێن راھێنانێ یێن ھەڤبەش، مانۆڤر و پەڤگوھارتنا کارمەندان دێ هێن ئۆرگانیزەکرن دا کو شیانا کارکرنا ھەڤبەش یا ھێزێن چەکدار بهێن خورتکرن.
تێکۆشینا ھەڤبەش یا ل دژی تەرۆرێ
رێکەفتن ھەر وھا ھەڤکاریا د ئاستا کریاری دە ژ بۆ رووبرووبوونا ھەر جورە گەفێن تەرۆریستی یێن کو ئەولەھیا ھەرێمی و ناڤنەتەوەیی دخن مەترسیێ، بەرفرەھ دکە. ئالی دێ ل سەر مژارێن ئەولەھیێ د ناڤا شێورا بەردەوام دە بن و زانیاریێن ئیستخباراتی ب رێیا کانالێن تایبەت و ل گۆری رێزکێن پاراستنا نهێنی پارڤە بکن. د ھەمان دەمێ دە، د دەمێن ئاشتی، کریز یان شەری دە، پشگریا لۆژیستیکی د ناڤ دە دابینکرنا چەک، جەبلخانە و پارچەیێن یەدەک تێ مسۆگەرکرن.
کۆمیتەیا ستراتەژیک و سەکرەتەریا ل سعوودیێ
ژ بۆ شۆپاندن و چاڤدێریکرنا قۆناغێن جیبجیکرنا رێکەفتنێ، کۆمیتەیەکا سیاسی و بەرگرییێ یا ستراتەژیک کو ژ وەزیرێن دەرڤە، وەزیرێن بەرگرییێ و سەرۆک ئەرکانێن ھەر سێ وەلاتان پێک تێ، دێ هێت دامەزراندن. ئەڤ کۆمیتە دێ ب ئاوایەکی ئاسایی سالانە دو جاران بجڤە.
ھەر وھا ژ بۆ برێڤەبرنا کارووبارێن کۆمیتەیێ، سەکرەتاریەتەک ل عەرەبستانا سعوودی دێ هێت ئاڤاکرن. پۆستا سەکرەتەرێ گشتی دێ ھەر سێ سالان جارەکێ د ناڤبەرا وەلاتان دە ب رەنگەکی دۆرڤەگەر بگوھەرە و د قۆناغا یەکەم دە وەلاتیەکی پاکستانی دێ ڤی ئەرکی وەربگرە.
رێکەفتن ژ بۆ دەمەکێ نەدیار ھاتیە ئیمزەکرن و پشتی تەمامکرنا پێڤاژۆیێن پەسەندکرنا یاسایی کەت وارێ جیبجیکرنێ. ھەر ئالیەک دکارە پشتی دەرباسبوونا 10 سالان ب رێیا کانالێن دیپلۆماتیک داخوازا ڤەکشینێ بکە.
