جیگرێ سەرۆکێ پارتیا تەڤگەرا نەتەوەپەرەست (مەھەپێ) فەتحی یلدز، د بەرنامەیا “ترکیەیا بێ تەرۆر، ھەرێما بێ تەرۆر ل سەر رێیا ئاشتی، ئیستیقرار و پێشڤەچوونێ” یا ل ناڤەندا چاند و ھونەرێ یا “ئووسکوودار باگلارباش” ھات لدارخستن دە، ھوورگلیێن رەشنڤیسا د چارچۆڤەیا پێڤاژۆیا نوو دە ئەشکەرە کرن. یلدز دیار کر کو ژ 4 ھەزار و 897 مەحکووم و گرتیێن پەکەکێ و کەجەکێ یێن ل گرتیگەھێن ترکیەیێ، 4 ھەزار و 800 کەس دکارن ژ ڤێ رەشنڤیسێ سوود وەربگرن.
ل گۆری داخویانیا یلدز، کەسێن کو ب تاوانا کوشتنێ ھاتنە مەحکوومکرن، کەسێن کو سزایێ زیندانا ھەتا ھەتایێ یان ژی زیندانا ھەتا ھەتایێ یا گرانکری ل وان ھاتیە برین و ھندەک کەسێن کو هێژ د بن لێپرسین یان دادوەریێ دە نە، دێ ژ دەرڤەیی چارچۆڤەیا یاسایی بمینن. یلدز رەخنە ل کەسێن کو رێزکنامەیێ رەخنە دکن گرت و داخواز کر کو بەندێن یاسایی ب رێکووپێک بهێن خوەندن و فێمکرن.
مەرجێن پاشخستنا سزایان و تاوانێن نوو
یلدز شەرت و مەرجێن پاشخستنا پێڤاژۆیێن دادوەری و سزایان ئەشکەرە کر و گۆت کو ژ بۆ تاوانێن کو سزایێ وان ھەری زێدە ھەتا 15 سالانە، لێپرسین، دۆزگەری یان ژی مەحکوومکرن دێ 5 سالان هێن پاشخستن. وی ئانی زمان کو ژ بۆ تاوانێن کو سزایێ وان ژ 15 سالان زێدەترە ژی، ئەڤ دەما پاشخستنێ 10 سالە.
جیگرێ سەرۆکێ مەھەپێ ھشیاری دا کو ھەکە د دەما پاشخستنێ دە تاوانەکا نوو بهێت کرن، پێڤاژۆیێن لێپرسین، دۆزگەری و بجیھانینا سزایان دێ ژ جھێ کو راوەستیانە بەردەوام بکن و د ڤێ ھەیامێ دە دەمدرێژی دێ نەقەدە.