فیدان: ئەندامەتیا یەکیتیا ئەورۆپایێ ژ بۆ ترکیەیێ ئارمانجەکا ستراتەژیکە
وەزیرێ دەرڤەیێ ترکیەیێ ھاکان فیدان، پشتی ھەڤدیتنا خوەیا لگەل شاندەیا پلەبلندا یەکیتیا ئەورۆپایێ راگھاند کو ژ بۆ ئەنقەرەیێ ئەندامەتیا تەمام یا د ناڤا یەکیتیێ دە ئارمانجەکا ستراتەژیکە. فیدان بانگ ل یەکیتیا ئەورۆپایێ کر کو د ڤێ پێڤاژۆیێ دە ل سەر بنگەھا پیڤانێن لێھاتی و ب ئاوایەکێ “بێ جوداکاری” تەڤبگەرە.
وەزیرێ دەرڤە ھاکان فیدان، ل ئەنقەرەیێ لگەل شاندەیەکا ئاستبلندا یەکیتیا ئەورۆپایێ کو ژ نوونەرا بلندا سیاسەتا دەرڤە و ئەولەکاریێ کاژا کاڵاس، کۆمیسەرا بەرفرەھبوونێ مارتا کۆس و کۆمیسەرێ کارێن ناڤخوەیی و کۆچبەریێ ماگنوس برونەر پێک دھات، جڤیا. د جڤینا دوئالی دا، مژارێن سەرەکی یێن وەکی سیاسەتا دەرڤە، بازرگانی، برێڤەبرنا کۆچبەریێ و ھێسانکاریا ڤیزەیێ ھاتن گۆتوبێژکرن. ھەر وھا ئالیان گەشەدانێن ھەرێمی و گەردوونی، ب تایبەتی شەرێ رووسیا-ئوکراینایێ و کریزا بەردەواما ل رۆژھلاتا ناڤین نرخاندن.
“ئەنقەرە ژ بۆ پێشخستنا پەیوەندیان ئامادەیە”
فیدان د داخویانیا خوەیا پشتی جڤینێ دە دەستنیشان کر کو ئەنقەرە ئامادەیە پەیوەندیێن خوەیێن لگەل یەکیتیا ئەورۆپایێ د ھەر واری دە بپێش بخە. فیدان بال کشاند سەر ئاستەنگێن ل پێشیا پێڤاژۆیا ئەندامەتیێ و وھا گۆت:
“ترکیە ل بەندێیە کو یەکیتیا ئەورۆپایێ ل سەر بنگەھا پیڤانێن لێھاتی تەڤبگەرە و ژ ھەر جورە جوداکاریا سیاسی دوور بکەڤە. ئەندامەتیا د ناڤا یەکیتیا ئەورۆپایێ دە ژ بۆ مە هێژ ژی ئارمانجەکا ستراتەژیکە.”
دیرۆکا ھەولدانێن ترکیەیێ یێن ژ بۆ ئەندامەتیا یەکیتیا ئەورۆپایێ ڤەدگەرە دەھان سالان. ئەنقەرەیێ د سالا 1987ێ دە ب فەرمی داخوازا ئەندامەتیێ کربوو و د سالا 1999ێ دا وەکی “وەلاتێ کاندید” ھاتبوو ناسکرن. د جۆتمەھا 2005ێ دە دانوستاندنێن فەرمی دەست پێ کرن، لێ ئەڤ پێڤاژۆ ژ بەر چەندین سەدەمێن وەکی پرسگرێکێن سیاسی، قەیرانا قبرسێ و نیگەرانیێن ئەورۆپایێ یێن دەربارێ مافێن مرۆڤان دا ھات راوەستاندن. ب تایبەتی پشتی ھەولدانا دەربەیێ یا سالا 2016ێ، دانوستاندنێن ئەندامەتیێ ب تەمامی ھاتن جەمداندن.
تەڤی کو پێڤاژۆیا ئەندامەتیا تام ئەڤە دەمەکێ درێژە راوەستیایە ژی، بەرپرسێن ترکیەیێ د سەردەما نوو دە ھەول ددن پەیوەندیێن خوەیێن لگەل بروکسەلێ نوو بکن. ئەنقەرە د ڤێ قۆناغێ دە زێدەتر گرانیێ ددە داخوازێن وەکی نووکرنا پەیمانا یەکیتیا گومروکێ و ھێسانکرنا پرۆسەیا وەرگرتنا ڤیزەیێ ژ بۆ ھەموەلاتیێن خوە.
