ناڤێن ھەموو ئەندامێن نوو یێن مەجلسا گەل یا سووریێ ھاتن راگھاندن

سەرۆکێ کۆمیسیۆنا بلندا ھلبژارتنان یا سووریەیێ، ناڤێن ئەندامێن نوویێن مەجلسا گەل (پەرلەمان)ی ب فەرمی راگھاندن. ل گۆری داخویانیا کۆمیسیۆنێ، سەرۆککۆمارێ سووریەیێ ل گۆری دەستھلاتێن خوەیێن دەستووری، 70 ئەندامێن کو سێیەکا پارلامەنێ پێک تینن، راستەراست دەستنیشان کرنە.

سەرۆکێ کۆمیسیۆنا بلندا ھلبژارتنان محەمەد تەھا ئەحمەد، ئیرۆ 1ێ تیرمەھا 2026ێ ل ئاڤاھیا مەجلسا گەلا ل شامێ جڤینەکا رۆژنامەڤانیێ ل دار خست. ئەحمەد د جڤینێ دە بریارنامەیا سەرۆکاتیێ یا ھەژمار 143 کو ژ ئالیێ سەرۆککۆمار ئەحمەد شەرع ڤە ھاتیە ئیمزەکرن خواند و ناڤێن پارلامەنتەرێن نوو راگھاندن.

ئەحمەد دیار کر کو جڤینا یەکەما مەجلسا نوو دێ رۆژا دوشەمبێ، 6ێ تیرمەھا 2026ێ وەرە لدارخستن. ھەر وھا دەستنیشان کر کو ل گۆری نامیلکەیا دەستوورا بنگەھین، خولا خەباتێ یا ڤێ مەجلسێ دو سال و نیڤ (30 مەھ)ە و ئەڤ دەم دکارە ل گۆری شەرت و مەرجان وەرە درێژکرن.

دابەشبوونا کورسیان بۆ پارێزگەھان ژ بۆ 70 ئەندامێن کو ژ ئالیێ سەرۆککۆمار ڤە ھاتنە دەستنیشانکرن وھایە:

حەلەب: 14 ئەندام

حەسەکێ: 7 ئەندام

حۆمس و دێرەزۆر: ھەر یەک 6 ئەندام

شام، گوندەوارێ شامێ، ئیدلب و حەما: ھەر یەک 5 ئەندام

لازقیە و دەرعا: ھەر یەک 4 ئەندام

رەقا: 3 ئەندام

تەرتووس، سوەیدا و قونەیترا: ھەر یەک 2 ئەندام

سیستەما نوو یا پەرلەمانی: سێیەکا تەمامکەر

ل گۆری سیستەما نوو یا ھلبژارتنێ یا ل سووریەیێ، مەجلسا گەل ب گشتی ژ 210 ئەندامان پێک دهێت. ژ ڤان پارلامەنتەران 140 کەس (ژ سەدی 66) ب رێیا ھلبژارتنێ ھاتنە دیارکرن. 70 ئەندامێن دن ژی کو وەکی “سێیەکا تەمامکەر” تێ ناسکرن، راستەراست ژ ئالیێ سەرۆککۆمار ڤە ھاتنە دەستنیشانکرن.

ئەڤ گاڤا نوو پشتی سالەکێ ژ دەرچوونا بریارنامەیا سەرۆکاتیێ یا ھەژمار 66 (یا سالا 2025ێ) تێ کو ئەرکێ چاڤدێریا پێڤاژۆیا ھلبژارتنێ دابوو کۆمیسیۆنا بلند. ل گۆری بەندا 24ێ یا نامیلکەیا دەستوورا بنگەھین، سەرۆککۆمار خوەدی مافە کو سێیەکا ئەندامێن مەجلسێ دەستنیشان بکە، دا کو پێکھاتەیێن جودایێن جڤاکێ و پسپۆرێن وارێن جودا د بن بانێ پەرلەمانی دە جھ بگرن.

سیستەما ھلبژارتنێ یا دەمکی کو د تەباخا 2025ێ دە ھاتبوو پەژراندن، سووریە ل سەر ئاستێن ئیداری دابەشی ھەرێمێن ھلبژارتنێ کربوو و مافێ کاندیدیێ تەنێ دابوو ئەندامێن دەستەیێن ھلبژێر.