10 سال ب سەر ھەولا كۆدهتایا سەربازییا 15 تیرمەھا 2016یا ترکیێ رە دەرباس دبن
10 سال ب سەر ھەولا كۆدهتایا سەربازییا 15 تیرمەھا 2016یا ترکیێ رە دەرباس دبن. ل گەل دەرباسبوونا 10 سالان، ئۆپەراسیۆنێن دەستەسەرکرنا کەسێن ب تۆمەتا ئەندامتیا جەماعەتا گولەن ددۆمن. ل گۆر داتایێن فەرمی، نێزیکی دو ملیۆن کەس ژ كۆدهتایێ راستەراست بباندۆر بوون.
ئیرۆ 10 سال د سەر ھەولا كۆدهتایا سەربازییا 15ێ تیرمەھا 2016ان رە دەرباس دبن. د وێ شەڤا ب خوین دە، کو چەندین ناڤەندێن ستراتەژیک یێن مینا پارلەمەن، کۆچکا سەرۆکۆماریێ و پرا بۆسفۆرێ ھاتن ھەدەفگرتن، نێزیکی 300 کەسان ژیانا خوە ژ دەست دان و نێزیکی 3 ھەزار کەس ژی بریندار بوون.
ل گۆری دانەیێن فەرمی، د ناڤا 10 سالێن بۆری دە نێزیکی 2 میلیۆن کەس راستەراست ژ ئەنجامێن ھەولا كۆدهتایێ و پێڤاژۆیا “رەوشا ئاوارتە” بباندۆر بوونە. ئامارێن گرنگێن ڤێ سەردەمێ وەھا نە:
-
لێپرسین: دەربارێ زێدەتری 720 ھەزار کەسان دە لێپرسین و دۆز ھاتن ڤەکرن.
-
جەزاکرن: زێدەتری 127 ھەزار کەس ب جەزایێن جودا ھاتن سزا کرن.
-
ژ کار دەرخستن: زێدەتری 125 ھەزار فەرمانبەرێن دەولەتێ ژ کار ھاتن دوورخستن کو ژ وان 56 ھەزار ئەفسەر و پۆلیس بوون.
-
گرتی: نھا زێدەتری 10 ھەزار کەس د گرتیگەھان دە نە و ژ وان 3 ھەزار کەس ب جەزایێ ھەتا-ھەتایێ ھاتنە مەحکوومکرن.
ئاكهپه و رایەدارێن دەولەتێ ھەولا كۆدهتایێ وەکی “پرۆژەیەکە فەتۆ یا ژ بۆ ھلوەشاندنا ترکیەیێ” پێناسە دکن. جیگرێ سەرۆکێ گشتیێ ئاكهپێ ئەفکان ئالان دیار کر، وان ئەڤ رێخستن ژ ناڤا دەولەتێ پاقژ کریە.
وەزیرێ بەرگریێ یاشار گولەر ژی بال کشاند سەر بەرخوەدانا مللەت و گۆت: “وێ شەڤێ نیشان دا کو دەولەتا خوەدی پشتەڤانیا مللەت بە، ب چ ھێزان نایێ ھلوەشاندن.”
ھەولا كۆدهتایێ نە تەنێ د وارێ سەربازی دە، لێ د وارێ سیاسی دە ژی بوو وەرچەرخەکە مەزن. سێ مەھ و نیڤ پشتی كۆدهتایێ، پارێزبەندیا پارلامەنتەران ھات راکرن. د ئەنجامێ دە ھەڤسەرۆکێن وێ دەمێ یێن ھهدهپێ سەلاحەدین دەمیرتاش و فیگەن یوکسەکداغ ل گەل ھەژمارەک پارلامەنتەرێن ههدهپێ ھاتن گرتن و ھین ژی د زیندانێ دە نە.
ھەر وھا، ب رەفەراندوما سالا 2017ان، ترکیە ژ سیستەما پارلەمەنتەری دەرباسی “سیستەما سەرۆکاتیێ” بوو کو ئەڤ وەکی مەزنترین گوھەرینا حکومرانیێ یا د دیرۆکا کۆمارێ دە تێ قەبوولکرن. ئۆپەراسیۆنێن ل دژی کەسێن ب تۆمەتا ئەندامتیا جەماعەتا گولەن، پشتی 10 سالان ھین ژی بەردەوام دکن.
