نومان کورتولموش ژ بۆ قانوونا “پێڤاژۆیا ئاشتیێ” سەردانا فراکسیۆنێن پارلامەنتۆیێ دکە
سەرۆکێ پارلامەنتۆیا ترکیەیێ نومان کورتولموش، د چارچۆڤەیا دانوستاندنێن گرێدایی ئامادەکرنا پرۆژەیاسایا چارچۆڤەیا “پێڤاژۆیا ئاشتیێ” دە، سبە سێشەمێ (21ێ تیرمەھا 2026ێ) دەست ب سەردانا فراکسیۆنێن پارتیێن سیاسی یێن د پارلامەنتۆیێ دە دکە. ل گۆری ئاگاھیێن ژ ئالیێ مەدیایا نێزیکی پارتیا دەمۆکراسی و وەکھەڤیا گەلان (دەم پارتی) ڤە ھاتنە راگھاندن، ئارمانجا سەرەکی یا ڤان سەردانان ئاڤاکرنا لھەڤھاتن و یەکدەنگیەکا گشتییە ل سەر ڤێ پرۆژەیاسایێ.
ل گۆری بەرنامەیا فەرمی یا سەردانان، نومان کورتولموش دێ سبە دەمژمێر 12:30 دە دەستپێکێ لگەل سەرۆکێ پارتیا تەڤگەرا نەتەوەیی (مەھەپێ) دەولەت باخچەل بجڤە. پاشێ دەمژمێر 14:00ێ دە، سەرۆکێ پارلامەنتۆیێ دێ بچە سەردانا فراکسیۆنا دەم پارتیێ و دێ لگەل ھەڤسەرۆکێن گشتی توولای ھاتمۆگولای و تونجەر باکرهان و جیگرێن سەرۆکێن ڤێ فراکسیۆنێ ھەڤدیتنەکێ ئەنجام بدە. تێ چاڤەرێکرن کو کورتولموش د رۆژا چارشەمێ (22ێ تیرمەھا 2026ێ) دە ژی سەردانا فراکسیۆنا پارتیا داد و گەشەپێدانێ (ئاک پارتی) بکە.
د ڤان جڤینان دە، سەرۆکێ پارلامەنتۆیێ دێ ئالیێن سیاسی د بارێ ناڤەرۆکا پرۆژەیاسایا چارچۆڤەیێ دە ئاگاھدار بکە و ژ بۆ دەرباسبوونا وێ یا ب لھەڤھاتنێ داخوازا پشتگریا وان بکە. د پشتا ڤان تەڤگەر و ھەڤدیتنان دە، ئامادەکاریێن لەزگین یێن ئەنقەرەیێ ھەنە ژ بۆ شاندنا پرۆژەیاسایێ بۆ مەجلسێ. ل گۆری زانیاریێن ھاتنە ئەشکەرەکرن، ئەڤ پرۆژەیاسا دێ ب تایبەتی چارەنووس و پێناسەیا قانوونی یا وان چەکدارێن پەکەکێ چارچۆڤە بکە کو چەکێن خوە دادنن.
