کورتولموش: پرۆژەیاسایا پێڤاژۆیا ئاشتیێ ڤێ ھەفتەیێ دێ هێتە پەژراندن
تێ چاڤەرێکرن کو د ناڤا ڤێ ھەفتەیێ دە پرۆژەیاسایا چارچۆڤەیا “پێڤاژۆیا ئاشتیێ” ب فەرمی پێشکێشی سەرۆکاتیا پارلامەنتۆیا ترکیەیێ بێ کرن و بەریا دەستپێکرنا وەرزێ بێھنڤەدانێ ب یەکجاری بهێتە پەژراندن. ل گۆری ئاگاھیێن د مەدیایێن نێزیکی دەستھلاتێ دە ھاتنە بەلاڤکرن، ئەڤ پێشنیار ب چ ئاوایی رێبەرێ پەکەکێ عەبدوللاھ ئۆجالان، سەرکردەیێن پایەبلندێن رێخستنێ و وان کەسێن کو سزایێ گرتنا ھەتاھەتایێ یا گران ل سەر وان ھەیە، ڤەناگرە.
ل گۆری ناڤەرۆکا ڤێ پرۆژەیێ، ئەو ئەندامێن پەکەکێ یێن کو دخوازن ڤەگەرن ترکیەیێ، ھەگەر دەستێ وان د چ تاوانێن کوشتن و توندوتیژیێ دە نەبیت، د چارچۆڤەیا پیڤانێن پۆشمانیێ دە نایێن سزادان. دێ ژ بۆ ڤان کەسان ھەیامەکا چاڤدێریێ یا دادوەری کو د ناڤبەرا 3 ھەتا 5 سالان دەیە هێت سەپاندن و د ڤێ پێڤاژۆیێ دە مافێ وان نینە کو د سازیێن حکوومی دە کار بکەن یان ژی چالاکیێن سیاسی بمەشینن. جیبجیکرنا ڤان گاڤان ب مەرجێ پشتراستکرنا میتێ و ئارتێشا ترکیەیێ و ئەرێکرنا فەرمی یا ئەنجوومەنا ئەولەکاریا نەتەوەیی ڤە ھاتیە گرێدان.
سەرۆکێ پارلامەنتۆیا ترکیەیێ نومان کورتولموش دیار کر کو ئەڤ پێنگاڤ قانوونەکا چارچۆڤەیی، دەمکی و سەربخوەیە و ب چ ئاوایی نە لێبۆرینەکا گشتییە. کورتولموش تەکەز کر کو دهێت چاڤەرێکرن د ڤێ ھەفتەیێ دە پرۆژە بگەھیتە پارلامەنتۆیێ، ژ بۆ کۆمیسیۆنێن پێوەندیدار بهێت ڤەگوھەستن و بەری کو مەجلس بکەڤیتە بێھنڤەدانێ دانوستاندن ل سەر بێن کرن و بهێت قەبوولکرن.
ئەڤ گەشەدانا یاسایی پشتی ھەولدانێن ژ بۆ دەستپێکرنا پێڤاژۆیا ئاشتیێ کو ژ داویا سالا 2024ێ ڤە ب بانگا سەرۆکێ مەھەپێ دەولەت باخچەلی یا ژ بۆ ھلوەشاندنا پەکەکێ دەست پێ کربوون، وەکی گاڤێن پراکتیکی یێن یەکەم تێنە نرخاندن.
