هەسەدە و “رێڤەبەریا خوەسەر” د ڤێ ھەفتەیێ دە ب فەرمی تێن حەلاندن
قۆناغا لەشکەری و سیاسی یا ھەرێما رۆژھلاتێ فراتێ بەر ب گوھەرینەکا بنگەھین ڤە دچە. پشتی سالێن درێژ یێن رێڤەبەریا خوەسەر و ھێزێن ھەرێمی، داخویانیێن داوی یێن ژ ئالیێ شامێ ڤە نیشان ددن کو ستراکتورا ھەیی ب تەمامی دهێت گوھارتن.
لووتکەیا کو ل شامێ د ناڤبەرا سەرۆکێ سووریێ ئەحمەد شەرع و فەرماندارێ گشتی یێ ھەسەدێ مەزلووم عەبدی دە پێک ھات، بوو خالا وەرچەرخانێ. د ڤێ روونشتنێ دە مژارا سەرەکی میکانیزما پێکانینا بەندێن رێکەفتنا 29ێ چلەیێ بوو.
پشتی ڤێ جڤینێ، ئالیکارێ وەزیرێ بەرەڤانیێ یێ سووریێ ل دەڤەرا رۆژھلات، سەمیر ئۆسۆ تەکەز کر کو سازیێن ھەیا نھا کار دکرن نکارن د فۆرما خوەیا کەڤن دە بمینن. ئۆسۆ دیار کر کو ھەبوونا دو دەستھلاتان د ناڤا یەک دەولەتێ دە نایێ قەبوولکرن و خەباتێن ھەسەدێ و رێڤەبەریا خوەسەر د ناڤا ڤێ ھەفتەیێ دە ب فەرمی ب داوی دبن.
ل گۆری نەخشەرێیا نوو، ھەموو ناڤەند، سازی و دەڤەرێن ئیداری یێن کو د بن کۆنترۆلا رێڤەبەریا خوەسەر دە بوون، راستەراست دەرباسی بن رێڤەبەریا حکوومەتا ناڤەندی دبن. ئۆسۆ دەستنیشان کر کو رۆلا ڤان سازیان پشتی لھەڤکرنێ ھاتیە گوھارتن و بەرپرسیاری ئێدی دکەڤیتە سەر ملێ رێڤەبەریا گشتی یا دەولەتێ.
