ھات راگھاندن کو جەمیل بایک، رێڤەبرێ پلەبەرزیێ پەکەکێ، سەردانا ئیمرالیێ کریە و لگەل ئۆجالان ھەڤدیتن کرییە. ل گۆری ئاگاھیێن کو دارکا مازی ژ چاڤکانیێن خوە وەرگرتینە و ژ ھێلا چاڤکانیێن یەنەکێ ڤە ھاتنە پشتراستکرن، جەمیل بایک، ھەڤسەرۆکێ کەجەکێ و ئەندامێن دامەزرینەرێ پەکەکێ، د ھەفتەیا یەکەما تەباخێ دە ب بالافرەکێ ژ بالافرگەھا سلێمانیێ چوویە ترکیێ. بایک، دگەل دو کەسێن دن، دو رۆژان ل ئیمرالیێ مایە. لگەل ڤێ سەردانێ، ھەما ھەما ھەموو رێڤەبەریا پایەبلندا رێخستنا پەکەکێ، ژ بلی چەند کەسان، لگەل ئۆجالان رووبروو ھەڤدیتن کرنە.
کرۆنۆلۆژیا (رێزکرنا بوویەران ل گۆر دەما قەومینا وان) ترافیکێ ل ئیمرالیێ
ل گۆری ئاگاھیێن دەست مە دە ھەنە، عەڤدللا ئۆجالان پشتی بانگا ھلوەشاندنێ یا 27ێ سباتێ دو جاران لگەل بەرپرسێن پەکەکێ ب ئۆنلاین ئاخڤتیە. وەکی دن، ترافیکا کادرۆیێن پایە بلندێن کو سەردانا ئیمرالییێ کری رۆژ ب رۆژ زێدە بوویە:
خزیرانا 2025ێ: سەبری ئۆک و بەسێ ھۆزات چوونە ئیمرالیێ.
شوباتا 2025ێ: دوران کالکان، ھێلین ترک، راپەرین دێرسم و بشار قۆسەر دو رۆژان ل جەم ئۆجالان مان. پشتی ڤێ سەردانێ مەزلووم عەبدی و ئیلھام ئەحمەد ل ئیمرالیێ ھەڤدیتن پێک ئانین.
تیرمەها 2026ێ: دوران کالکان لگەل 2 ژن و 2 زلامان جارا دویەمین چوو ئیمرالیێ ھەڤدیتن لگەل ئۆجالان کر.
رەوشا رێڤەبرێن دن: ھەر چەند دهێتە ئیدیعاکرن کو مستەفا قاراسو ب رێیا رۆژئاڤا چوویە ئیمرالی، لێ ئەڤ ئاگاھی هێژ نەھاتیە پشتراستکرن. لێبەلێ، تێ گۆتن کو قاراسو ژ بەر پرسگرێکێن ئێشا دلی و نەخوەشییا گێژبوونێ نەکاریە سواری بالافرێ ببە و دەما کو پرسگرێکێن وی یێن تەندورستیێ چارەسەر ببن ئەو ژی دێ چیت. دەربارێ موراد قارایلان دە، تێ گۆتن کو دەولەتێ سەردانا وی ب بەهانەیا “ئەگەر سەردانا وی ئەشکەرە ببە دێ ببە سەدەما پرسگرێکان” لۆما ژی خوەستەکا سەرەدانا قەرایلان ھاتییە پاشخستن؛ و ئۆجالان گۆتییە قارایلان “ئەو ژ خەتا من دەرناکەڤە.” ژ ئالیەکی دن ڤە، تێ راگھاندن کو د ناڤبەرا بەرپرسێن ژن یێن د ناڤ پەکەکێ/پژاکێ دە د دەربارێ سەردانا ئیمرالیێ دە ھەڤرکییەک جدی ھەیە و ل دژی پێشنیارکرنا ھێلن ترک کارڤەدان ھەیە.
چما سەردانا بایک واتەدارە؟
سەردانا جەمیل بایک د پێڤاژۆیێ دە خالەکا شکەستۆکە. بایک د کانوونا 2025ێ دە رەد کر کو بچیتە ئیمرالیێ و وەکە کاەڤەدان وی خوەست ل دەرڤەیی پێڤاژۆیێ بمینیت، ب بەهانەیا پرسگرێکێن خوەیێن تەندورستی. وی ھەر وھا بانگا ئۆجالان یا ” بلا بھێتە ڤێرە نشتەرگەریێ بکەت” ب ھەلوەستەک ھشک رەد کر. بایک ب تەڤاھی ژ پێڤاژۆیێ ڤەکشیا، ب بەهانەیا نەخوەشیێ و وی بۆ ئۆجالان گۆت “سەرۆک دین بوویە.”
لێبەلێ، تەعلیماتێن ئۆجالان کو د مەھا تیرمەھێ دە ب رێیا دوران کالکان ھاتبوون راگھاندن، و نەرەحەتیا دەولەتا ترک ژ بەر دوورمایینا بایک ژ پێڤاژۆیێ، ھەڤسەنگی گوھەراند. سەردانا بایک بۆ ئیمرالیێ، وەکی یەکانە کەسایەتیێ د ناڤ پەکەکێ دە کو دکاریت خەتەک ئالتەرناتیف ل دژی ئۆجالان ئاڤا بکەت، و ب تایبەتی ب تێکلیێن خوەیێن لگەل ئیرانێ دهێت ناسین، نیشانا خورتکرنا تەڤاھییا دەستھلاتداریا ئۆجالان ل سەر رێخستنێ مسۆگەر دکەت. دهێتە نرخاندن کو ھەکە بایک ڤەخواندنا بۆ ئیمرالییێ رەد کربا دا لسەر ژییانا وی مەترسییەک مەزن چێبیت لۆما ژی وی سەردانا ئیمرالییێ قەبوول کر.
ستراتەژیا دەولەتێ و سەردەما پێشەرۆژێ
ئەڤ ھەڤدیتنێن لگەل سەرکردەیێن پەکەکێ نە ژ ئالیێ دەولەتێ و نە ژی ژ ئالیێ رێخستنێ ڤە ب فەرمی نەھاتنە قەبوولکرن. ھەر چەند ئالیێ ترکی ل سەر نهێنییا پێڤاژۆیێ ب ھشیاری تەڤبگەریت ژی، لێ بەلێ ئالیێ پەکەکێ ژ بۆ رێخستنکرنا جەماوەرێ خوە ئاگاھییێن ھەڤدیتنێ دانە چاپەمەنیێ.
سەرەدانا ھێدی ھێدی و پەرچە پەرچە یا رێڤەبرێن پەکەکێ بۆ ئیمرالیێ ئەشکەرە دکەت کو داخویانیا گشتیجیا دەولەتا ترکا کو “تەنێ 800 کەس دێ ژ قانوونێ سوود وەربگرن، کەسایەتێن پایەبلند سوودمەند نابن” تەنێ پرۆپاگاندایە. ب راستی، مستەفا قاراسو، یەک ژ کەسایەتێن پێشەنگێن رێخستنێ، د داخویانیەکێ دە کو د 2یێ ئیلۆنا 2026ێ دە ، ب ئەشکەرەیی ئەڤ نیەتا خوە پشتراست کر و گۆت، “ئەم دخوازین بچنە ترکیێ و سیاسەتا دەمۆکراتیک بکین.”
ئەڤ ھورگولی نیشان ددەن کو ئەنقەرە ئارمانج دکەت کو د قۆناغا یەکەم دە ھێزا شەری یا بنگەھین یا رێخستنێ ب تەڤاھی بێباندۆر بکەت، و تەنێ کۆمەک پر سینۆردار و کۆنترۆلکری ل دۆرا رێڤەبرێن پایەبلندێن پەکەکێ بھێلە. یەک ژ مژارێن سەرەکی یێن کو ل پشت پەردێ تێنە نیقاشکرن تام ئەڤەیە: دهێتە گۆتن کو رەوشا داوی یا ڤان رێڤەبرێن مایی و پێکھاتەیا رێخستنی دێ ل گۆری ھەڤسەنگیێن ھەرێمی یێن ل سەرانسەرێ رۆژھلاتا ناڤین، ب تایبەتی ل ئیرانێ، پێش بکەڤن، زەلال بیت.
تەکتیکا دەولەتێ یا برنا رێبەرێن پەکەکێ یەک ب یەک بۆ ئیمرالیێ ب تەڤاھی لگەل ئارمانجا ئۆجالان ل ھەڤ دکەت کو رێبەرێن پەکەکێ د بن کۆنترۆلا خوە دە بھێلیت. ب راستی، چاڤکانیێن د ناڤ رێخستنێ دە دبێژن کو ھەم شاندەیێن ئیمرالیێ و ھەم ژی کادرۆیێن دێرین یێن پەکەکەیا ھلوەشییایی دێ د پێشەرۆژێ دە سەردانێن خوەیێن بۆ ئیمرالیێ ھێژ پتر زێدە بکن.
