سیاسەتا “ئەنتەگراسیۆنێ”، کو د 10ێ ئادارا 2025ێ دە ل رۆژئاڤا دەست پێ کر و مهزلووم عهبدی د ٢٥ێ تەباخێ دە راگھاند کو تەمام بوویە، بلەز و بەز بەردەوام دکە.
ب راستی، دکارە وەرە گۆتن کو رۆژئاڤا مۆدێلەکە کو سیاسەتا “ئەنتەگراسیۆنێ”، ژ ھێلا ئۆجالان، وەکی چارەسەرییێ ژ بۆ کوردان پێشکێشی چار پارچەیێن کوردستانێ کر. رۆژئاڤا بەرێ وەکی موختەبەرەکێ دھات بکارئانین کو ئۆجالان ل گۆری فانتازییێن خوە کانتۆن، خوەسەرییا دەمۆکراتیک و… هتد ل رۆژئاڤا جەرباندن. ئەو جەرباندنا کانتۆنا دەمۆکراتیک، کو دگۆتن “دێ جیھانێ رزگار بکە”، ھلوەشیا، و نھا جەرباندنا “ئەنتەگراسیۆنێ” د ھەمان موختەبەرێ دە تێ مەشاندن.
و ئەم دکارن ببێژن کو تشتێ کو د سێ رۆژێن داوی دە ل رۆژئاڤا قەومی، کو ناڤەندا وێ حەسەکێ و کۆبانی یە، د راستیێ دە سیاسەتا “ئەنتەگراسیۆنێ” ب خوە یە.
د ئەنجاما ڤێ سیاسەتێ دە، جارەکە دن ژ بۆ کوردان تشتەک نەمایە ژ بلی دەرکەتنا کۆلانان، خوەپێشاندان، مرن، کوشتن و شینیێ و د داویێ دە قەبوولکرنا تشتێن ل سەر وان تێنه سەپاندن. وەرن ئەم ل تشتێن کو ل رۆژئاڤا قەومینە بنێرین ژ دەما کو مهزلووم عهبدی ل قەسرا شامێ گۆت “ئەنتەگراسیۆن تەمام بوویە، ههسهده ھاتییە ھلوەشاندن”.
ئارمانجا سیاسەتا ئەنتەگراسیۆنێ مێژتنا ئەنەرژییا کوردانە. مینا کەڤرێ ئاش کو ب بەردەوامی ل دۆرا خوە دزڤرە، ئەڤ گەل ب سالان د چەرخا (شۆرەش-شەھید-دەستکەفتن) دە ھاتییە گرتن، ئەنەرژییا وان دمژە. سیاسەتا ئەنتەگراسیۆنێ ژ بلی ھۆلانێ د ناڤبەرا پهكهكێ و پەرگالێن کۆلۆنیالیست دە تشتەکی ژ کوردان رە نائینە. پهكهكه ل سەر ماسەیێ ب دەولەتێ رە دانوستاندنان دکە، و دووڤ رە بانگ ل گەل دکە کو ژ بۆ مافێن خوە دەرکەڤن کۆلانان. دەما کو گەل دەردکەڤە کۆلانان، ژ دەولەتێ رە دبێژە، “ھنەکی زێدەتر دەرفەت، ھنەکی زێدەتر پلە، ھنەکی زێدەتر دەستھلات بدە مە دا کو ئەم ڤان کوردێن کۆلانان ئارام بکهین.”
ئۆجالان ژ دەولەتا ترکیەیێ رە دبێژە، “دەرفەتێن خزمەت کرنێ بدن من کو بخەبتم، دا کو ئەز بکاربم کوردان کۆنترۆل بکم، بارزانییان کۆنترۆل بکم و کوردان ب دەریێ وە ڤە گرێبدم.”
مهزلووم عهبدی دبە شێورمەندێ شهرع، دچە کۆبانیێ و ل سەر ناڤێ دەولەتا سووریێ کوردێن ھێرسبوویی ئارام دکە.
کورد خوینا خوە درێژن، زارۆکێن خوە قوربانی ددن، و پهكهكه ب ڤێ خوینێ د دەولەتێ دە جھی ژ خوە رە چێدکە. ئەو ل سەر ناڤێ دەولەتێن داگیرکەر کوردان کۆنترۆل دکە.
دڤێ کورد ژ بوویەرێن ل رۆژئاڤا دەرس دەرخن و ببینن کو تشتێ قەومی نە پرۆڤۆکاسیۆنە، نە بوویەرەک لۆکالە و پشتی دەمەکێ نە کو دسەکنە. دڤێ کورد ڤێ راستییێ ببینن کو فکرا ئەنتەگراسیۆنێ دێ وان رۆژ ب رۆژ بەر ب سیستەمەک جەھەننەمی ڤە بکێشە. ئەنتەگراسیۆن توونەبوونە، ئاسمیلاسیۆنە و خوە کوژییە.
