پێڤاژۆیا ئەنتەگرەبوونا رۆژئاڤا لگەل شامێ، ژ ئالیێ رایا گشتی یا کورد ڤە راستی بەرتەکەکا خورت ھاتیە. د ڤێ ناڤبەرێ دە، مەدیایا پەکەکێ د ھەولدانەکا پرئالی دەیە کو ڤان بەرتەکێن رەوا لاواز بکە و تێگھشتنا رایا گشتی برێڤە ببە. ئەو گەلەک ھەول ددن کو رایا گشتی رازی بکن کو تشتێ دقەومیت ‘پێڤاژۆیەکا نۆرمال’ و خوە ‘قازەنجەک’ە. وەکی بەشەک ژ ڤێ ھەولدانێ، سەرکردەیێن رۆژئاڤا جارەکا دن ب جل و بەرگێن خوەیێن ھەری خوەشک ل بەر رایا گشتی یا کورد تێن نمایێشکرن. یەک ژ پلاتفۆرمێن سەرەکی یێن کو ڤێ کامپانیایا سپیکرنێ دمەشینە، ئیلکە تیڤی یە، کو ژ ترکیەیێ وەشانێ دکە.
رۆژەڤا سەرەکی یا ئیلکە تیڤی ئەوە کو سیاسەتا ئەنتەگراسیۆنێ یا ئۆجالان ب ئاوایەکی کو کورد بکاربن قەبوول بکن پێشکێش بکە. ژ بۆ ڤێ ئارمانجێ، ئەو رۆژانە بەرنامەیێن تایبەت دوەشینن. د ڤان دەمێن داوی دە، ھەڤپەیڤینێن کو وان لگەل مەزلووم عەبدی و ئیلھام ئەحمەد کرنە ژی خزمەتا وێ ئارمانجێ دکن کو کوردان رازی بکن دا کو پێڤاژۆیا تەسلیمیەتێ یا کو ل رۆژئاڤا دقەومە قەبوول بکن.
ھەڤپەیڤینا ئیلھام ئەحمەد یا لگەل بانو گووڤەن ل سەر ئیلکە تیڤی تام د چارچۆڤەیا ڤێ یەکێ دە جھ دگرە. ھەڤپەیڤینا بانو گووڤەن ب رێیا سیناریۆیەکا وسا ب ھوورگلی ھاتیە ئامادەکرن، بانو گووڤەن ژێھاتیبوونا خوەیا رۆژنامەگەریێ ب ئاوایەکێ وسا نیشان ددە کو پرسێن وێ ژ بۆ ئیلھام ئەحمەد جیھەکی ڤەدکن دا کو تەڤاھیا پێڤاژۆیا رۆژئاڤا رەوا بکە. ئیلھام ئەحمەد ژی، ژ ئالیێ خوە ڤە، وسا دئاخڤە مینا کو ئەو نە نوونەرا ھەرێمەکە کو 15.000 شەھیدێن خوە وندا کریە بە، بەلکو نوونەرا وەلاتەکی بەختەوەر وەکی نەرویجێ یە. ب ھەڤ رە، ھەردویان رێبازەک وسا داھێناندیە کو ب وێ ‘مینا کو مرۆڤ دارەکا مەزن تەنێ ب بەلگێ وێ پێناسە بکە’ رێویتیا 15 سالی یا رۆژئاڤا یا تژی فەداکاری، تەنێ ب چەند ھەڤدیتنێن ل شامێ ھاتنە کرن سینۆردار دکن. ئەو ب بەرتەنگکرنا هزرکرنێ، راستیێ ڤەدشێرن.
ب کورتاسی: ژ بۆ کوردان ھەبوونا دەولەتا خوە یا سەربخوە یان فەدەرال “خراب و پاڤەچوون”ە، لێ بوونە وەلاتی یان کارمەندێ سڤیلێ دەولەتا عەرەبی یا کو ژ ئالیێ رەژیما بەعس ڤە ھاتیە دامەزراندن، یان ژی دەولەتەکا کو ژ ئالیێ چەکدارێن داعشێ ڤە ھاتیە ئاڤاکرن، “ئازادی و دەستکەفتی”یە!
دیارە ئیلھام ئەحمەد نھا فێم کریە کو ھێز ل کویە؛ ژ بەر ڤێ یەکێ ب زانینا باش یا باندۆرا بریاردەر یا دەولەتا ترک ل سەر سووریێ، ئۆجالان و پەکەکێ، ئەو ژ پەسندایینا ئەنقەرێ و پەسندایینا ئۆجالان پاشدە نامینە.
د ئەنجامێ دە؛
ئەنجاما کو پشتی 15 سالێن وێرانکارییێ، ب ھەزاران شەھیدان و ئێش و ئازارێن بێداوی یێن گەلێ کورد کشاندی قەت نەبە دڤیابا ھەری کێم خوەدی ستاتویەکا ئیداری-سیاسی بان. لێ مخابن تشتا کو ھاتیە بدەستخستن، نە زێدەتری چەند کورسیان ل پارلامەنتۆیا شامێ، خازۆکی ژ بۆ زمانێ کوردی و د ئاستا پەنابەریێ دە ھندەک مافێن تاکەکەسی یە. یێن کو دگۆتن “ئەم ل دژی دەولەتێ نە” رێ ل بەر بدەستخستنا ستاتویا کوردان دگرتن. نھا ئەنتەگرەبوونا رەژیما کۆمارا عەرەبی یا سووریێ وەکی سەرکەفتنێ نیشان ددن. دڤێت رایا گشتی یا کورد ئەو بنکەتنا مەزن یا ل رۆژئاڤا ھاتیە ژیان کرن، ب چ ھنجەت و سەختەکارییان قەبوول نەکن. دڤێت رایا گشتی یا کورد یێن ئەڤ بنکەتنا مەزن ئانی سەرێ کوردان بناسە و ژ وان حەسابێ بپرسە.
