ناکۆکیێن سیاسی و جڤاکی یێن د ناڤا هەڤپەیڤینا جەمیل بایک «میرێ تاریتیێ» دە
هەڤپەیڤینەکا ھەڤسەرۆکێ کۆنسەیا رێڤەبەرا کەجەکێ جەمیل بایک د 17ێ ئیلۆنا 2026ێ دە د نووچە تیڤییێ دە هات پارڤەکرن، بایک د ڤێ هەڤپەیڤینێ دە وەکە هەرجار نرخاندنێن خوە یێن بێ نرخ ل سەر کۆمەکە مژارێن گرێدایی کوردان کرن، وی ب زەلالی و بێی کو شەرم بکە بەحسا ڤێ یەکێ کر کو ئەو دەولەتێ ژ بۆی کوردان ناخوازن و هەبوونا دەولەتێ ئازادیێ ژ کوردان رە نایینە، هەر وەها ب زەلالی دەستنیشان کر کو ئەو ناخوازن سینۆرێن دەولەتا ترکیەیێ بگوهەرن.
ئەڤ هەڤپەیڤینا ھەڤسەرۆکێ کۆنسەیا رێڤەبەرا کەجەکێ جەمیل بایک یا ژ بۆ کانالا نووچە تیڤی، د ئالیێ فەلسەفەیا سیاسی، ستراتەژیا لەشکەری و هەستێن نەتەوەیی دە شکەستنەکە کوور و ناکۆکیەکە مەزن دەرخست ھۆلێ. ژ بەر کو دەما گەلێ کورد ل بەندا ھەلوەستەکە پەکەکێ یا خورت بوو ل دژی دەولەتێن داگیرکەرێن کوردستانێ، بەرەڤاژی ب زەلالی دیار بوو کو پەکەکە و رێڤەبەرێن وێ ب تەمامی ل گۆری پارادیگمایا رێبەرێ خوە تەسلیمی دەولەتا ترک بوونە و ڤێ یەکێ ژی ناڤەشیرن، نرخاندنێن بێ نرخ یێن بایک نە تەنێ پرسێن گەلەکی گران د مەژیێ جڤاکێ دە چێکرن، بەلکو د هەمان دەمێ دە برینێن گەلەکی کوور د دلێ ب ھەزاران مالباتێن شەھیدان و بریندارێن ڤێ رێیێ دە چێکرن و گەلێ کورد خست ناڤ ترس و دلگرانیەکە کوور.
یەک ژ خالێن ھەری بریندارکەر د گۆتارا بایک دە، نێزیکاتیا بەرامبەری تێگەھا “دەولەت”ێ بوو. بایک ژ ئالیەکی ڤە رادگھینە کو دەولەت ئامرازەکی زەخت و ئینکارێیە کو چ ئازادیێ نادە کوردان، لێ ل ئالیێ دن گەلەکی ب ھێسانی دبێژە: “ئەم ناخوازن دەولەتا ترکیێ پارچە بکن و دەولەتەکێ ئاڤا بکن.” ئەڤ داخویانی برینەکە کوور د دلێ جڤاکا کورد دە ڤەدکە؛ ژبەرکو گەلێ کورد ب دەھان سالانە ھەر تشتێ خوە د رێیا ئازادی و رزگاریێ دە دایە، گەلێ کورد ب هەزاران زارۆکێن خوە د ڤێ رێیێ دە فەدا کرنە، ب ملیۆنان کورد کۆچبەر بوونە و ب هەزاران گوند ژی هاتنە شەوتاندن ئەڤ هەمی تەڤ د رێیا ئازادییا کورد و کوردستانێ دە بوون، ئەڤ گەل گاڤا دبینە کو ئارمانجا داوی تەنێ پاراستنا سینۆرێن داگیرکەرانە، ب ئێشەکە گران و هەستێن خاپاندنێ رە روو ب روو دمینە. ئەگەر دەولەت زەختکارە و مافان نادە، چما دڤێ کورد ببن پارێزڤانێن ھەمان وان سینۆرێن کو ئەو ل سەر خاکا وان زنجیر کرنە؟
ناکۆکیا دویەما کو هەستا نەتەوەیی ئێشاند، نێزیکاتیا دو روو یا ل بەرامبەری ھێزێن لەشکەری یێن کوردانە. بایک ئەنتەگرەبوونا یەبەشێ یا د ناڤ سیستەما لەشکەری یا ئیراقێ دە وەکی “گاڤەکا باش” دنرخینە و پشتگریێ ددە نێزیکبوونا قەسەدێ ب رەژیما سووریەیێ رە، لێ گاڤا مژار دبە یەکیتیا ناڤخوەیی یا کوردستانێ، دەرگەھ تێن گرتن و دڤێ هەر تشت ل گۆر خواستەک و بەرژەوەندیێن پەکەکێ بە، گەر نا ت تشتەک ب ناڤێ یەکیتییا نەتەوی نامینە. ئەڤ ھەلوەست دلێ گەلێ کورد دشەوتینە: چما پەکەکە ئامادەیە خۆرت و کەچێن کوردان تەسلیمی وان دەولەتان بکە کو دەستێن وان ب خوینا ئەنفال و کۆمکوژیان سۆرە، لێ رەد دکە کو وان ئەنتەگرەیی سازیێن نەتەوەیی یێن ھەرێما کوردستانێ بکە؟ ئەڤ رەڤا ژ براتی و یەکیتیا خاکا خوە، خەنجەرێ ل ھێڤیا یەکیتیا نەتەوەیی دخە.
بایک و سەرۆک و رێخستنا وی، ئەنتەگراسیۆنا هێزێن لەشکەری ب تایبەتی یێن گرێدایی پەکەکێ ب تەڤ دەولەتێن داگیرکەر رە دخوازن، ژ بۆ ڤێ یەکێ ژی دەستبەرداری هەر تشتی دبن و ب هێسانی تەسلیم دبن، لێ بەلێ دەما بەحسا حکوومەتا هەرێما کوردستانێ تێ کرن، د سەری دە پەکەکە ددانێن خوە تووژ دکە و ب ت ئاوایی ناکەڤە بن یاسایێن حکوومەتا هەرێمێ، نە ب تەنێ ئەڤ، بایک و رێخستنا وی ئاستەنگێن هەری مەزن و ب باندۆرن د رێیا یەکییتیا نەتەوی یا کوردان دە، لێ دبێژە ئەم بێی شەرت ئامادەنە بۆ یەکیتییا نەتەوی!
کەس نزانە بایک و رێخستنا وی بەحسا کیژان یەکیتییا نەتەوی دکن، ژ خوە هوون ل دژی دەولەتا نەتەوی یا کوردانە، هوون نەتەوەییبوونێ وەکە پاشڤەرووتی دحەسبینن، وێ دەما چما هوون ئەوقاس بەحسا یەکیتییا نەتەوی دکن؟ هەر تشت زەلالە، ب تەنێ ئەڤ هەڤووک ژ بۆی خاپاندنا کوردان تێ بکارئانین، گەر نا چەوا دبە کەسەک ل دژی دەولەتا نەتەوی بە ژ بۆی گەلێ خوە، داخوازا ئەنتەگرەبوونا ب داگیرکەرێن وەلاتێ خوە رە بکە و د هەمان دەم دە بەحسا یەکیتییا نەتەوی بکە؟ گەلۆ یەکیتییا نەتەوی یا کوردان وێ ب ئەنتەگرەبوونا دناڤا دەولەتێن داگیرکەر دە پێک وەرە؟
تشتا هەری بالکێش و ب ناکۆک د هەڤپەیڤینا بایک دە رەخنەکرنا مەزلووم عەبدی بوو، بایک گۆت، “نەدبوو مەزلووم عەبدی ب وەزیفەیا شێورمەندێ ئەحمەد شەرع رازی ببوویا”. لێ بەلێ بایک بەحسا ئۆجالان ناکە کا چەوا بوویە شێورمەنێ ئەردۆگان و رێنیشاندەرێ وی ژ بۆی بنخستنا کوردان د ناڤا ترکیەیێ دە د بن ناڤێ ئەنتەگراسیۆن و جڤاکا دەمۆکراتیک دە. یا راست هەم شێورمەندییا مەزلووم عەبدی و هەم ژی یا ئۆجالان ب تەمامی دشبهن هەڤ و چ جوداهییا وان لگەل شێورمەندێن سەدام حوسێن تونەیە. بێی گومان مەزلووم عەبدی شێورمەندیا ئەحمەد شەرع د بن سییا تەعلیمات و بریارێن پەکەکێ و ئۆجالان دە قەبوول کریە و ئەو نکارە بێی بریارا قەندیل و ئیمرالیێ تو گاڤەکە بچووک ژی باڤێژە.
کورت و کورمانج، وەکە هەرجار ب قاسی کو تەڤلیهەڤی و ناکۆکی د ناڤا ئاخافتنێن بایک دە هەبوون، ئەوقاس زانیاریێن نوو و رێیێن چارەسەریێ تونەبوون.
