رێڤەبەرییا په‌كه‌كه‌یا هلوه‌شیایی تێکلداری دویەمین سالڤەگەرا «پێڤاژۆیا ئاشتی و جڤاکا دەمۆکراتیک» داخویانیەکە بەرفرەھ دا رایا گشتی. د داخویانیێ دە ھات دیارکرن، ھەموو ھێزێن چەکدار ژ ناڤا سینۆرێن ترکیەیێ ھاتنە ڤەکشاندن و په‌كه‌كه ھاتییە ھلوەشاندن؛ لەوما ت ھنجەت ل پێشیا چارەسەرییا سیاسی و ئازادییا عه‌بدوللا ئۆجالان نەمایە.
د داخویانیێ دە ئاماژە ب وێ ھات کرن، پێڤاژۆ بەریا دو سالان، د 23ێ جۆتمەھا 2024ان دە ب بەرسڤا عه‌بدوللا ئۆجالان یا ژ بۆ دەڤلەت باھچەلی دەست پێ کر کو گۆتبوو: “ھێزا من ھەیە کو شەر بکشینم سەر زەمینا حقووقی و سیاسی». تەڤگەرێ دا زانین، ب بانگا ئۆجالان یا د 27ێ سباتا 2025ان دە وان راوەستاندنا شەر راگھاند و پشترە ب لدارخستنا کۆنگرەیا 12مین د ناڤبەرا 5-7ێ گولانا 2025ان دە، په‌كه‌كه ب ئاوایەکی فەرمی ھاتییە ھلوەشاندن و داوی ل تێکۆشینا چەکداری یا ل دژی ترکیەیێ ھاتیە ئانین.
د دەواما داخویانیێ دە بال ھات کشاندن سەر ئەنجامێن ئەرێنی یێن پێڤاژۆیێ و ھات گۆتن: “ل ترکیەیێ ئەڤ دو سالن قەت شەر ناقەومە و جوانەکی ب تەنێ یێ کورد و ترک ژیانا خوە ژ دەست نادە. ئەڤ رەوش قەدر و قیمەتا پێڤاژۆیێ رادخە پێش چاڤان». ھات دەستنیشانکرن ژی، چارەسەرنەبوونا ڤێ پرسگرێکێ د دیرۆکێ دە بوویە سەدەما جانژدەستدانا ب دەهان هەزاران مرۆڤان و خەرجکرنا تریلیۆنان دۆلاران، لێ ب ڤێ پێڤاژۆیێ رە زەمینا ئاشتیێ ھاتییە ئاڤاکرن.
ل سەر رەوشا لەشکەرییا داوی ژی تەڤگەرێ ئاشکەرە کر، ژ بۆ دەستھلاتدارییا ئاكه‌پێ ت ھنجەتان نەبینە، وان ھەموو ھێزێن خوەیێن مانە ژ ترکیەیێ ڤەکشاندنە و بەریا چەند رۆژان ژی 4 تونەلێن شەر یێن ل ھەرێما مەتینایێ ڤالا کرنە. ھەروھا گۆت: “مە ھەموو ھێزێن خوە یێن چەکدارێن ل ناڤا سینۆرێن ترکیەیێ و ل دەڤەرێن کو نێزی سینۆرێ ترکیەیێ ڤەکشاندیە. ” ب ڤی رەنگی تەکەز ھات کرن کو ئێدی ت گەفەکە چەکداری ل سەر ترکیەیێ نەمایە.
تەڤگەرێ رەخنە ل دەستھلاتداریێ گرت کو ھەتا نھا گاڤێن پێویست یێن قانوونی و دەمۆکراتیک نەئاڤێتنە و دەستنیشان کر کو قانوونا چارچۆڤەیێ یا ل مەجلیسێ ھاتی ئامادەکرن، کێم مایە. ھەروھا ھات گۆتن کو سۆزێن ژ بۆ ھەڤدیتنا ئۆجالان یا ل گەل رۆژنامەڤان و ئالیێن جڤاکی نەھاتنە بجھئانین و ژ بلی ھەیئەتا دەم پارتیێ، تەجریدا گران یا ل سەر ئیمرالیێ بەردەوام دکە.
د بەشەکە دن یا داخویانیێ دە ھشیاریەکە توند ھات دایین و ھات دیارکرن کو نابە ئەڤ پرسگرێکا سەد سالی ببە قوربانا بەرژەوەندیێن ھلبژارتنێ و پۆلیتیکایێن رۆژانە. ھات گۆتن: “ئەگەر دەستھلاتداریا ئاكه‌پێ بفکرە کو ڤێ پێڤاژۆیێ ل دەمێ بەلاڤ بکە و تەڤگەرا ئازادیێ لاواز بخە، ئەڤێ ببە شاشتییا ھەری مەزن یا دیرۆکا ترکیەیێ و زیانەکە مەزن بدە ھەموو گەلان”.
رێڤەبەرییا په‌كه‌كه‌یا هلوه‌شیایی بانگ ل دەستھلاتداریێ کر کو دەست ژ نێزیکاتیێن تاکتیکی بەردە و دەملدەست گاڤێن قانوونی باڤێژە. ھەروھا بانگ ل ھەموو گەلێن ترکیەیێ، ھێزێن کەد و دەمۆکراسیێ و وەلاتپارێزان کر کو خوەدی ل ڤێ دەرفەتا دیرۆکی دەرکەڤن و ژ بۆ سەرکەفتنا پێڤاژۆیا ئاشتیێ ب ئەرکا خوە رابن.
