ھەڤسەرۆکا گشتی یا پارتیا وەکھەڤی و دەمۆکراسیێ یا گەلان (دەم پارتی) تولای ھاتمۆگولاری، د جڤینا کۆما پارتیا خوەیا ل پارلامەنا ترکیەیێ دە داخویانیێن بالکێش دان. ھاتمۆگولاری ژ بۆ پێشڤەچوونا پێڤاژۆیا نوو بانگ ل دەستھلاتێ کر کو گاڤێن لەزگین و شێنبەر بێن ئاڤێتن، قەیووم بێن راکرن و بریارێن دادگەھا مافێن مرۆڤان یا ئەورۆپایێ بێن بجھانین.
ھاتمۆگولاری د ئاخافتنا خوە دە بال کشاند سەر بریارێن ڤەکشینا ھێزان یا ژ ناڤ ئاخا ترکیەیێ و ھەرێمێن سینۆری و ئەڤ یەک وەکی “گاڤەکا دیرۆکی” بناڤ کر. وێ تەکەز کر کو نابە ئاڤێتنا پێنگاڤێن سیاسی بێ دەرەنگخستن یان ژی ل بەندا جڤینا ئاسایی یا لژنەیا ئەولەکاریا نەتەوەیی بێ ھشتن، ژ بەر کو جڤاک ل بەندێیە کو ئەنجامێن بەربچاڤ ژ ڤێ پێڤاژۆیێ ببینە.
ھەڤسەرۆکا دەم پارتیێ داخوازێن سەرەکی یێن ھەیاما نھا رێز کرن و دیار کر کو ژ بۆ سەرکەفتنا پێڤاژۆیێ دڤێت سیاسەتا قەیوومان ب داوی ببە، گرتیێن سیاسی یێن وەکی سەلاحەدین دەمیرتاش و فیگەن یووکسەکداگ سەربەست بێتن بەردان و “مافێ ھێڤیێ” ژ بۆ رێبەرێ پەکەکێ عەبدوللاھ ئۆجالان بێ سەپاندن. وێ دەستنیشان کر کو ژ بۆ مەشاندنا ساخلەم یا پێڤاژۆیێ، پێویستە عەبدوللاھ ئۆجالان خوەدی شەرت و مەرجێن ئازاد یێن ژیان و خەباتێ بە.
د بەردەوامیا داخویانیا خوە دە، ھاتمۆگولاری خوەست کو “لژنەیا ئاشتی و سیاسیبوونێ” کو تێ پێشبینیکرن د بن کۆۆردیناسیۆنا ئۆجالان دە بخەبتە، تەڤی ژێر-کۆمیتەیێن “لژنەیا شۆپاندن، ھەڤاھەنگی و پێکانینێ” د دەمەکێ نێزیک دە دەست ب خەباتێن خوە بکن. وێ ھەمان دەمێ دە دەرەنگکەتنا دامەزراندنا “لژنەیا شۆپاندنێ یا مەجلیسێ” رەخنە کر و تەکەز کر کو دڤێت ئەڤ لژنە نە تەنێ سەمبۆلیک بە، بەلکی مەکانیزمایەکا چالاک بە کو رێخستنێن ژنان و جڤاکا سڤیل ژی د ناڤ دە جھ بگرن.
