سەرۆکێ پارلامەنتۆیا ترکیەیێ نومان کورتولموش کو ژ بۆ بەشداربوونا ل کۆنفەرانسا سەرۆکێن پارلامەنتەرێن ئەورۆپایێ ل ئیتالیایێ بوو، ل بالیۆزخانەیا رۆمایێ یا ترکیەیێ د بەرنامەیا “ھەڤدیتنا لگەل جڤاکا ترک” دە ئاخڤی. کورتولموش دەربارێ پێڤاژۆیا کو وەکی “ترکیەیا بێتەرۆر” تێ بناڤکرن دە تەکەز کر کو ئەگەر پەکەکە چەکان نەدانە، یاسایا چارچۆڤەیێ قەت ناکەڤە وارێ جێبەجێکرنێ و د ڤێ مژارێ دە گارانتیێن پێویست د یاسایێ دە ھاتنە بجھکرن.
کورتولموش د ئاخافتنا خوە دە بال کشاند سەر وێ یەکێ کو پرسگرێکا تەرۆرێ نیڤ سەدسالییە و ترکیەیێ د ڤێ رێیێ دە بەردێلێن مەزن دانە. وی دا زانین کو ژ ھاڤینا سالا 2025ێ و ڤر ڤە ب پێشەنگیا پارلامەنتۆیێ “کۆمسیۆنا ھەڤگرتنا نەتەوەیی، براتی و دەمۆکراسیێ” راپۆرا خوە ئامادە کریە و د 10ێ تەباخێ دە ژی “یاسایا سازکرنا ھەڤگرتنا نەتەوەیی و یەکتیا جڤاکی” ب دەنگێن 467 پارلامەنتەران ھاتیە قەبوولکرن. کورتولموش دەستنیشان کر کو ئەڤ تفاق و پشتگریەکا بێھەمپایە د دیرۆکا دەمۆکراسیا ترکیەیێ دە.
سەرۆکێ پارلامەنتۆیێ دیار کر کو پێنگاڤا یەکەم یا ڤێ پێڤاژۆیێ خوەهلوەشاندنا رێخستنا تەرۆرێ و دانینا چەکانە و ئەڤ پێڤاژۆ ب ئاوایەکی نەتەوەیی تێ برێڤەبرن. کورتولموش گۆت: “جار جاران د ناڤ وەلاتیێن مە دە فکارێن وەکی ‘ئەگەر چەکان نەدانن؟’ تێن رۆژەڤێ. تشتەکی وھا نینە. ئەگەر چەکان نەدانن، ژخوە ئەڤ یاسایا کو ھاتیە قەبوولکرن ناکەڤیتە وارێ جێبەجێکرنێ. ل ڤر وەکی دەولەت، مە خوە و گەلێ خوە ئەولە کریە و مە گارانتییێن وێ د ناڤ یاسایێ دە ب جھ کرنە.”
د داویا ئاخافتنا خوە دە، کورتولموش سێ گارانتیێن سەرەکی یێن د یاسایێ دە رێز کرن: یەکەم، تەسبیتکرنا یەکەیێن ئەولەھیێ و پشتراستکرنا لژنەیا ئەولەھیا نەتەوەیی؛ دویەم، لژنەیا بەرپرسیارا د بن سەرۆکاتیا ئالیکارێ سەرۆککۆمار دە؛ و سێیەم ژی کۆمیسیۆنا شۆپاندنێ یا کو دێ د ناڤا پارلامەنتۆیێ دە هێت ئاڤاکرن. وی ھەر وھا ئانی زمان کو ئەڤ پێڤاژۆ دێ باندۆرێن ئەرێنی ل سەر ھەرێمێ، ب تایبەتی ل سووریە و ئیراقێ ژی بکە.
