پارتیا دەمۆکراتا کوردستانا ترکیێ (پەدەکە-ت) ئەنجامنامەیا جڤینا مەجلیسا خوەیا ل دیاربەکرێ بەلاڤ کر. پەدەکە-تێ دەستنیشان کر کو پرسا کورد تەنێ ب چەکدانینێ چارەسەر نابە و تەکەز کر کو پێڤاژۆیێن ئەنتەگراسیۆنێ یێن ل ھەرێمێ نابە ببن سەدەما تەسفیەکرنا دەستکەفتیێن نەتەوەیی یێن گەلێ کورد.
د داخویانیا بەرفرەھا مەجلیسا پەدەکەتێ دە ھات دیار کرن کو سەردەما نوو ژ ئالیەکی ڤە دەرفەتێن گرینگ و ژ ئالیێ دن ڤە مەترسیێن جدی ب خوە رە تینە. پارتیێ بال کشاند سەر ھەڤدیتن و گەشەدانێن ل ترکیە، رۆژئاڤا، ئیراق و ھەرێما کوردستانێ و نێرینێن خوەیێن ستراتەژیک د 5 خالێن سەرەکی دە رێز کرن:
1. چەکدانینا پەکەکێ و پێڤاژۆیا سیاسییا نوو
پەدەکە-ت بریارا پەکەکێ یا ژ بۆ بداویکرنا تێکۆشینا چەکداری و هلوەشاندنا رێخستنێ وەکی پێنگاڤەکا گرینگ نرخاند، لێ دەستنیشان کر کو دەست ژێبەردانا چەکان ب تەنێ پرسا کورد چارەسەر ناکە. پەدەکە-ت تەکەز کر کو دڤێت ئەڤ پێڤاژۆ رێ ل بەر سیاسەتا دەمۆکراتیک، ناسکرنا ناسنامە و زمانێ کوردی د پەروەردەیێ دە و راکرنا ئاستەنگیێن ل سەر پارتیێن کوردستانی ڤەکە.
2. ئەنتەگراسیۆنا ھەسەدێ ل رۆژئاڤا
ل سەر تەڤلیبوونا ئاڤاھیێن لەشکەری و ئیداری یێن ھەسەدێ د ناڤ سازیێن دەولەتا سووریەیێ دە، پەدەکە-ت راگھاند کو ئەڤ پێڤاژۆ نە تەنێ تەڤلیبوونا لەشکەرییە؛ دڤێت مافێن چاندی، ئیرادەیا سیاسی و دەستکەفتیێن رێڤەبەریێن ھەرێمی یێن کوردان د دەستوورێ دە ب ئاوایەکی فەرمی وەرن گارانتیکرن.
3. نرخاندنا پێڤاژۆیێن ئەنتەگراسیۆنێ
پەدەکە-ت ب توندی دژدەرکەتنا خوەیا ل بەر تەسفیەکرنا یەکالی نیشان دا و دیار کر کو ئەنتەگراسیۆن دڤێت ل سەر بنگەھا لھەڤھاتنا دوئالی و گارانتیا یاسایی بە. ھات تەکەز کرن کو سەرکەفتنا ڤێ پێڤاژۆیێ نە ب ئاڤاھیا سازیان، بەلکی ب ئاست و پیڤانا پاراستنا مافێن نەتەوەیی یێن کوردان تێ پیڤان.
4. پێشکەتنێن ل ئیراق و ھەرێما کوردستانێ
د داخویانیێ دە ھات دەستنیشانکرن کو پاراستنا ستاتوویا دەستووری یا ھەرێما کوردستانێ و سازیێن وێ خەتا سۆرە. ھەر وھا بال ھاتە کشاندن سەر گرینگیا ئەولەھی، ناسنامە و ئیرادەیا گەلێ ئێزدیێ ل شەنگالێ کو نابە د ناڤ ڤان لھەڤکرنێن سیاسی دە بێنە پاشگوھکرن.
5. دیالۆگ و ھەڤگرتنا نەتەوەیی
پەدەکە-ت بانگ ل ھەموو ئالیێن سیاسی یێن کورد کر کو چ پارتی خوە وەکی نوونەرێ یەکانەیێ گەلێ کورد نەبینە. د ئەنجامنامەیێ دە ھات دیار کرن کو ل بەرامبەری کریز و گوھەرتنێن ھەرێمی، سیاسەتا کورد ژ ھەر دەمێ زێدەتر پێدڤی دیالۆگ، ھەڤکاری و ئاقلێ ھەڤپارە.
