گوھەرتنا جھێ رێبەرێ پەکەکێ عەبدوللاھ ئۆجالانێ ل گرتیگەھا ئیمرالیێ، د رۆژەڤا سیاسی یا ترکیەیێ دە بوو سەدەما نیقاشێن گەرم. ل ھەمبەر گۆتەگۆتێن دەردۆرێن نەتەوەپەرەستێن کو دبێژن ئۆجالان ھاتیە بەردان، دەم پارتیێ بەرتەک نیشان دا و ئەو گۆتەگۆت ب تەمامی رەد کرن.
نیقاش پشتی داخویانیێن ئەندامێ شاندەیا ئیمرالیێ میتحەد سانجار دروست بوون. سانجار د ھەڤپەیڤینەکا تەلەڤیزیۆنێ دە راگھاندبوو کو ژ بۆ ئۆجالان کاربە ل ئیمرالیێ خەباتێن خوە بمەشینە، جھەکی نوو ھاتیە ئامادەکرن و ئەو دەرباسی ور بوویە.
ل سەر ڤێ یەکێ، سەرۆکێ گشتی یێ پارتیا زەفەرێ ئومید ئۆزداگ، دەستھلاتداری و دەم پارتی کرن ئارمانج و ئیدیعا کر کو ئۆجالان ب تەمامی ھاتیە بەردان.
ئۆزداگ ئیدیعا کر کو ئۆجالان وەکی ئەندامێ کۆمیسیۆنێ ھاتیە دەستنیشانکرن و ل گۆری یاسایان چ مەحکوومەک نکارە ببە ئەندامێ کۆمیسیۆنێ؛ لەوما سزایێ وی ب داوی بوویە و ئێدی د گرتیگەھێ دە نینە. ئۆزداگ ھەر وھا ئیدیعا کر کو ئۆجالان لگەل ئالیکارێن خوە د ڤیلایەکا تایبەت دە دمینە کو قادا وی یا خەباتێ ژی ل ورە و دەستھلاتداری ھەول ددە ڤێ رەوشێ د ناڤا جڤاکێ دە وەکی رەوشەکا ئاسایی نیشان بدە.
بولدان: ستاتویا وی یا یاسایی نەگوھەریە
ل ھەمبەر ڤان گۆتەگۆتان، ئەنداما شاندەیا ئیمرالیێ و پارلامەنتەرا دەم پارتیێ پەروین بولدانێ داخویانیەک دا و ھەموو گۆتنێن ئۆزداگ دەرەواندبوون. بولدانێ دەستنیشان کر کو گوھەرتنا جھ، نایێ وێ واتەیێ کو ستاتویەکا فەرمی ژ ئۆجالان رە ھاتیە دایین.
بولدانێ دا زانین کو جھێ ناڤبۆری دیسا راستەراست د ناڤا سینۆرێن گرتیگەھا ئیمرالیێ دەیە و گۆت: “ستاتویا یاسایی یا برێز ئۆجالان نەھاتیە گوھەرتن و ئەو نەھاتیە بەردان؛ ل ور تەنێ شەرت و مەرجێن خەباتێ ھاتنە رێکخستن.”
پەروین بولدانێ ھەر وھا تەکەز کر کو ئەڤ ئیدیعا ب ئارمانجا رەشکرن و بریندارکرنا کەسایەتیا ئۆجالان تێن بەلاڤکرن و وان ئەڤ ھەلوەست ب چ ئاوایی قەبوول نەکرنە.
