دەستەیا سەرۆکاتیا پارلامەنتۆیا کوردستانێ ھات ھلبژارتن
جڤینا ئیرۆیا پارلامەنتۆیا کوردستانێ دە ب ئامادەبوونا 52 پارلامەنتەران، دەستەیا سەرۆکاتیا نوو یا پارلامەنتۆیێ ھاتە ھلبژارتن. د دەنگدانێ دە ڤالا فەرید وەکی سەرۆکا پارلامەنتۆیێ، رامی نووری وەکی جیگر و مونا قەھوەچی ژی وەکی سەکرەتەر ھاتن دەستنیشانکرن.
ئیرۆ چارشەمێ، 4ێ مژدارا 2026ان، پشتی دو سالان ل سەر لدارخستنا ھلبژارتنێن گشتی، پارلامەنتۆیا کوردستانێ ب بەشداریا 52 پارلامەنتەران جڤیا و پرۆسەیا ھلبژارتنا دەستەیا سەرۆکاتیێ ب داوی ئانی. ھەر سێ ئەندامێن دەستەیێ ب تەڤاھیا دەنگێن 52 پارلامەنتەرێن ئامادەبوویی ھاتن ھلبژارتن.
ئەندامێن دەستەیا نوویا سەرۆکاتیا پارلامەنتۆیێ
-
سەرۆکا پارلامەنتۆیێ: د. ڤالا فەرید
ڤالا فەرید ب وەرگرتنا 52 دەنگان وەکی سەرۆکا پارلامەنتۆیا کوردستانێ ھاتە ھلبژارتن.
– ژینە نیگاری: ئەو د سالا 1976ان دە ل ھەولێرێ ژ دایک بوویە.
– خوەندن و زانست: خوەدی باوەرنامەیا دۆکتۆرایێ یە د بەشا یاسایا گشتی دە و ل سەر ئاستا زانینگەھا سەلاحەدینێ خوەندەکارا یەکەم بوویە.
– ئەزموونا پیشەیی: بەریا نھا مامۆستەیا زانینگەھێ بوویە، د خولا چارەما پارلامەنتۆیا کوردستانێ دە ئەندام و سەرۆکا لژنەیا کاروبارێن یاسایی بوویە. ھەر وھا خوەدی گەلەک لێکۆلینێن زانستییە و خوەدی ئەزموونەکە بەرفرەھا کاروبارێن یاسایییە ل ناڤخوە و دەرڤەیی ھەرێمێ.
-
جیگرێ سەرۆکێ پارلامەنتۆیێ: رامی نووری
رامی نووری ب دەنگێ تەڤاھیا 52 ئەندامێن ئامادەبوویی وەکی جیگرێ سەرۆکێ پارلامەنتۆیێ ھاتە پەسەندکرن.
– ژینەنیگاری: ناڤێ وی یێ تەڤاھی “رامی نووری عۆدیش دانیال”ە و د سالا 1985ان دە ل بەغدایێ ژ دایک بوویە و نشتەجیھێ عەنکاوێ یە.
– ئەزموونا ئیداری و جڤاکی: بەریا نھا قەیمەقام و رێڤەبەرێ ناحیەیا عەنکاوێ بوویە. ئەو پارێزەرێ شێورمەند، نڤیسکار و چالاکڤانێ جڤاکی یە.
-زمان: ژ بلی زمانێ خوەیێ زکماکی سریانی، زمانێن کوردی، عەرەبی و ئینگلیزی ژی ب باشی دزانە.
-
سەکرەتەرا پارلامەنتۆیێ: مونا قەھوەچی
مونا قەھوەچی ژی ب بدەستخستنا ھەموو 52 دەنگان وەکی سەکرەتەرا پارلامەنتۆیا کوردستانێ ھاتە دیارکرن.
– ژینەنیگاری: ناڤێ وێ یێ تەڤاھی “مونا نەبی نادەر عه‌بدوللا”یە؛ د سالا 1978ان دە ل ھەولێرێ ژ دایک بوویە و باوەرنامەیا لیسانسێ د یاسایێ دە ھەیە.
– خەباتا سیاسی: د تەڤگەرا سیاسی و رێخستنییا پێکھاتەیا ترکمەن دە، خوەدی رۆلا سەرەکەیە و بەرێ ئەنداما ئەنجومەنا بلندا رەفەراندوومێ بوویە.
– ئەزموونا پارلامەنتۆیێ: مونا قەھوەچی کو بەرێ مامۆستە و پارێزەر بوویە، د ھەر دو خولێن چارەم و پێنجەمێن پارلامەنتۆیا کوردستانێ دە وەکی پارلامەنتەر، سەرۆکا فراکسیۆنێ و سەکرەتەرا پارلامەنتۆیێ خزمەت کریە.
