ھەڤسەرۆکا پارتیا وەکھەڤی و دەمۆکراسیا گەلان (دەم پارتی) توولای ھاتیمۆگوولاری، د جڤینا کۆما پارتیا خوەیا ل پارلامەنتۆیا ترکیەیێ دە داخویانیێن گرینگ دان. ھاتیمۆگوولاری دەستنیشان کر کو پرسا کورد ل ترکیەیێ راستەقینیە و ژ بۆ چارەسەریەکا دەمۆکراتیک بانگا ئازادیا عەبدوللاھ ئۆجالان و جێبەجێکرنا یاسایا چارچۆڤەیێ کر.
“پێویستی ب ئاشتیەکا روومەتدار ھەیە”
ھاتیمۆگووللاری بەرسڤ دا داخویانیێن دەربارێ نەبوونا پرسا کورد دە و ئانی زمان کو ئەڤ پرسگرێک راستەراست ب ئارامیا ھەرێمێ ڤە گرێدایییە. وێ گۆت: “ئەز ژ وان رە دبێژم یێن کو دبێژن پرسا کوردان نینە، ئەم ب جدی تەکەز دکن کو ل ڤی وەلاتی و دەڤەرێ پرسا کوردان ھەیە. ئەم وەکی دەم پارتی ئالیگرێن ئاشتیەکا روومەتدارن ل سەر بنگەھەکا دەمۆکراتیک. ژ بۆ ڤێ یەکێ ژی، دڤێت دەملدەست تەجریدا ل سەر ئیمرالیێ بهێت راکرن و ئۆجالان بهێت ئازادکرن.”
“گرتیێن سیاسی تێن ھشتن”
د بەردەوامیا ئاخافتنا خوە دە، ھاتیمۆگوولاری بال کشاند سەر سالڤەگەرا ئۆپەراسیۆنێن سیاسی یێن 4ێ مژدارا 2016ێ و بال کشاند سەر دۆسیایا دۆزا کۆبانیێ. ھەڤسەرۆکا دەم پارتیێ رەخنە ل نەهاڤێتنا گاڤێن ل گۆری بریارێن دادگەھا مافێن مرۆڤان یا ئەورۆپایێ گرت و ئانی زمان کو نوونەرێن سیاسەتێ یێن وەکی سەلاحەدین دەمیرتاش و فیگەن یوکسەکداغ ھین ژی د گرتیگەھێ دە وەکی “رەھینەیێن سیاسی” تێنە گرتن. وێ ھەر وھا نەرازیبوونا خوە ل دژی پۆلیتیکایێن دانانا قەیوومان ئانی زمان.
بانگا لەزگین ژ بۆ قانوونا چارچۆڤەیێ
توولای ھاتیمۆگوولاری دا زانین کو دەرحەقێ پێڤاژۆیێ دە پرسێن زەلال د جڤاکێ دە ھەنە و بەرپرسیاریا ڤان پرسان سپارت دەستھلاتێ: “ب ملیۆنان وەلاتی دپرسن کا دێ قانوون کەنگی بکەڤە دەورێ، ڤەگەر و گارانتی دێ چاوا بن. ئەڤ پرس ئەرک و بەرپرسیاریا دەستھلاتێ نە. دڤێت بێ دەرەنگخستن دەست ب یاسایا چارچۆڤەیێ بهێت کرن. چ ھێز نکارە پێشیا ھاتنا ئاشتیێ ل سەر ڤێ ئاخێ بگرە.”
د جڤینێ دە دایکێن ئاشتیێ کو ژ 24 باژاران ھاتبوون ئەنقەرەیێ ژی ئامادە بوون. ھاتیمۆگوولاری دیار کر کو ئەوێ سەردانا گرتیگەھێن ئەدیرنە و کاندرایێ بکن و تێکۆشینا وان ھەتا ئازادیا ھەموو گرتیێن سیاسی دێ بەردەوام بکە.
