ل باژارێ حه‌سه‌كێ، خوەندەکارێن کو ژ بۆ مافێ پەروەردەیا ب زمانێ زکماکی ل بەر ئاڤاھیا پارێزگاریێ داکەتبوون قادان، راستی ئێرشا ب دار و کەڤران ھاتن.
ل باژارێ حه‌سه‌كێ کۆمەک ژ خوەندەکاران ژ بۆ رەدکرنا سینۆردارکرنێن ل سەر زمانێ کوردی و داخوازکرنا مافێ خوەندنا ب زمانێ دایکێ، ل بەر ئاڤاھیا پارێزگەھا حه‌سه‌كێ چالاکیا نەرازیبوونێ لدار خست. لێ چالاکی راستی ئێرش و دەستوەردانێ ھات.
خوەندەکارێن بەشداری چالاکیێ بووبوون دیار کرن کو کۆمەک ژ تاخا خوێرانێ بەر ب وان ڤە ھاتیە و کەڤر ئاڤێتنە چالاکڤانان.
ئەڤ نەرازیبوونا خوەندەکاران، د چارچۆڤەیا پێلەکە بەرفرەھا چالاکیان دە تێ کو ھەرێمێن جودایێن پارێزگەھا حه‌سه‌كێ ل خوە گرتیە. چالاکڤان و خەلکێ ھەرێمێ وان سینۆردارکرنان رەد دکن کو ل سەر خوەندنا ب زمانێ کوردی تێن سەپاندن.
بەریا نھا ل گۆری بریارا حکوومەتا شامێ، زمانێ کوردی وەکی “زمانەکی نشتمانی” ھاتبوو قەبوولکرن و ل دبستانێن وان ناڤچەیێن کو پرانیا نشتەجھێن وان کوردن، ھەفتانە تەنێ 3 وانە (لگەل وانەیەکە چالاکیان) ژێ رە ھاتبوون ڤەقەتاندن.
لێ بەلێ خوەندەکار، مامۆستە، سازیێن سڤیل و شێنیێن ھەرێمێ ڤێ بریارێ وەکی ھەولدانەکە ژ بۆ تەنگکرنا قادا زمانێ کوردی دبینن و قەبوول ناکن. داخوازا بنگەھینا خوەپێشاندەران ئەوە کو زمانێ کوردی ببە زمانێ فەرمییێ پەروەردەیێ.
