مەسروور بارزانی سەرساخیێ ژ کەسووکارێن قوربانیێن لەھیا ھەولێرێ رە دخوازە
سەرۆکێ ھکوومەتا ھەرێما کوردستانێ ب رێیا تەلەفۆنێ ھەڤخەمیا خوە گھاند مالباتێن ھەر دو قوربانیێن لەھیا ھەولێرێ و پارێزگارێ ھەولێرێ ژی وەکی نوونەرێ وی تەڤلی شینا وان بوو.
فەرمانگەھا مەدیا و زانیارانا ھکوومەتا ھەرێما کوردستانێ بەلاڤ کر کو سەرۆکێ ھکوومەتا ھەرێما کوردستانێ ماسروور بارزانی پشتی نیڤرۆیا ئیرۆ یەکشەم، 8ێ مژدارا 2026ێ، ب رێیا تەلەفۆنێ سەرساخی ژ بنەمال و کەسوکارێن قوربانیێن لەھیا شەڤا بۆرییا باژارێ ھەولێرێ، خودێژێرازی مھەمەد رەسوول و مستەفا سەرکەوت، کر و ھەڤخەمیا خوەیا زێدە گھاند وان.
فەرمانگەھا مەدیا و زانیاران ئاماژە ب وێ یەکێ ژی کر کو پارێزگارێ ھەولێرێ ئۆمێد خۆشناو وەکی نوونەرێ سەرۆکوەزیرێ ھەرێما کوردستانێ تەڤلی شینا وان ھەر دو قوربانیان بوو و سەرساخی ژ مالباتێن وەخەرکریان رە خوەست.
شەڤا بۆری لەھی بوو سەدەما گھاندنا زرارێ ژ بۆ ھەژمارەکە تاخ، خانی و ملکێن وەلاتیان ل ھەولێرێ. ژ بۆ ئالیکاریکرنا زراردیتیان ژی چەندین تیمێن رزگارکرنێ و خوەبەخش چوونە مەیدانێ.
پێلەکە بھێزا بارانێ ژ رۆژا پێنجشەم، 5ێ مژدارا 2026ێ ڤە دەڤەرێن ھەرێما کوردستانێ ڤەگرتن و د شەڤا شەمی، 7ێ مژدارێ دە گھیشت ئاستا ھەری بلند. بارینا رێژەیەکا گەلەک زێدەیا بارانێ د دەمەکە کورت دە بوو سەدەما چێبوونا لەھیێ ل ھەژمارەکا تاخ و جادەیێن باژارێ ھەولێرێ و ئاستەنگیەکە زێدە ژ بۆ چوونووھاتنا وەلاتیان چێ کر.
ل گۆری ئامارێن فەرمی، ژ بەر لەھیێ دو کەسان ل باژارێ ھەولێرێ جانێ خوە ژ دەست دا، کو یەک ژ وان مستەفایێ 5 سالی بوو ویێ دن ژی جوانەکی خوەبەخشێ 25 سالی بوو کو د دەما رزگارکرنا خەلکێ دە خەنقی.
ژ بۆ پاراستنا ژیانا وەلاتیان و پەیداکرنا دەرفەتێ بۆ تیمێن شارەداریێ ژ بۆ پاقژکرنا جادەیان، پارێزگەھا ھەولێرێ بریار دا کو ئیرۆ یەکشەم، 8ێ مژدارێ ل ھەمی باخچە، دبستان و زانینگەھان بێھنڤەدانا فەرمی بە. ھکوومەتا ھەرێما کوردستانێ ژی تەڤاھیا تیمێن رزگارکرن و قەیرانان خستن رەوشا ئامادەباشیێ ژ بۆ ئالیکاریکرنا لێقەومیان و کێمکرنا زراران.
